ລາວ-ກຳປູເຈຍເຫັນດີ ຂໍແຜນທີ່ຈາກຝຣັ່ງ ເພື່ອເປັນບ່ອນອີງໃນການແກ້ໄຂບັນຫາຊາຍແດນຂອງສອງປະເທດ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEj2oHhLEtDq3VrsRJ07X9EgT8LQKwmrF-e4Jd7naUalcuc_9_t1sL3jg9hduMU6NHy4LCInJA4q8EMX1Owsu7quSz8GUZdFq5NctD-vQNyvlAV3Pf3cByHpHozDVAYyrLFRFZfSEmCSQjY/s1600/473.jpg)
ໃນວັນທີ 1 ກັນຍາ 2017 ທີ່ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີຂອງລາວ ໄດ້ເດີນທາງໄປນະຄອນຫຼວງພະນົມເປັນ ເພື່ອພົບປະກັບສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ ເພື່ອສືບຕໍ່ແກ້ໄຂບັນຫາຊາຍແດນລະຫວ່າງລາວ-ກຳປູເຈຍຢູ່ບໍລິເວນແກ້ງຕໍມໍຄອຍ ແລະ ຫ້ວຍຕະເງົາ ແຂວງອັດຕະປື ທີ່ສືບຕໍ່ມາຈາກການພົບປະກັນເມື່ອຄັ້ງວັນທີ 12 ສິງຫາ 2017 ທີ່ຜ່ານມາທີ່ນະຄອນຫຼວງວຽງຈັນ ລັດຖະມົນຕີທັງສອງປະເທດໄດ້ຕົກລົງແກ້ໄຂບັນຫາຊາຍແດນລະຫວ່າງສອງປະເທດຄື:
- ມອບໃຫ້ລັດຖະມົນຕີກະຊວງການຕ່າງປະເທດຂອງສອງປະເທດພົບກັນເພື່ອປຶກສາຫາລືເຖິງລາຍລະອຽດ ແລະ ວິທີການແກ້ໄຂບັນຫາ
- ມອບໃຫ້ຄະນະກຳມະການຊາຍແດນຂອງສອງປະເທດລົງກວດກາພື້ນທີ່ຕົວຈິງ ເພື່ອແກ້ໄຂບັນຫາຊາຍແດນຢູ່ 4 ຈຸດຄົງຄ້າງ
- ມອບໃຫ້ຄະນະກຳມະການຊາຍແດນຂອງສອງຝ່າຍລົງກວດກາຕົວຈິງຢູ່ບໍລິເວນແກ້ງຕໍມີຄອຍ ແລະ ຫ້ວຍຕະເງົາ ເພື່ອກຳນົດທີ່ຕັ້ງຫຼັກໝາຍຊາຍແດນ ແລະ ປັກຫຼັກໝາຍຊາຍແດນໃຫ້ສຳເລັດໂດຍໄວ ຈຸດໃດທີ່ສອງຝ່າຍສາມາດຕົກລົງກັນໄດ້ກໍ່ໃຫ້ປັກຫຼັກໝາຍໃນທັນທີ ເພື່ອກ້າວໄປສູ່ການປັກຫຼັກໝາຍຕໍ່ໆໄປ
ເຊິ່ງທັງສອງນາຍົກລັດຖະມົນຕີລາວ-ກຳປູເຈຍ ໄດ້ມີການຕົກລົງເຫັນດີວ່າ: ຈະຂຽນຈົດໝາຍເຖິງປະທານປະເທດຝຣັ່ງ ເພື່ອໃຫ້ຝຣັ່ງສົ່ງແຜນທີ່ມາດຕາສ່ວນ 1/100,00 ແລະ 1/50,000 ທີ່ພິມໂດຍພະແນກແຜນທີ່ອິນດູຈີນ ແລະ ເອກະສານອື່ນໆທີ່ກ່ຽວຂ້ອງກັບການກຳນົດຊາຍແດນລະຫວ່າງລາວ-ກຳປູເຈຍ ສົ່ງໃຫ້ລັດຖະບານລາວ ແລະ ລັດຖະບານກຳປູເຈຍ ເພື່ອນຳໃຊ້ເປັນຂໍ້ມູນ ແລະ ຫຼັກຖານ ໃນການແກ້ໄຂບັນຫາເສັ້ນຊາຍແດນລະຫວ່າງສອງປະເທດ.
ນອກຈາກນີ້ທັງສອງນາຍົກລັດຖະມົນຕີຍັງໄດ້ຕົກລົງຈະຮັກສາຄວາມສະຫງົບ ແລະ ຄວາມໝັ້ນຄົງລະຫວ່າງຊາຍແດງຂອງສອງປະເທດ ບໍ່ໃຫ້ປະເທດໃດປະເທດໜຶ່ງສ້າງສະຖານນະການຄວາມເຄັ່ງຕຶງຂຶ້ນໃນບໍລິເວນຊາຍແດນ ເພື່ອໃຫ້ປະຊາຊົນໄດ້ທຳມາຫາກິນ ແລະ ດຳລົງຊີວິດແບບປົກກະຕິໃນຄວາມສະຫງົບ ແລະ ມີມິດໄມຕີທີ່ດີຕໍ່ກັນ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ