ກຳປູເຈຍນຳວັດຖຸບູຮານກັບຄືນປະເທດ ພາຍຫຼັງທີ່ລັກໄປໃນສະໄໝສົງຄາມກາງເມືອງ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEiDdiGZfs29Vb-ojvh8-d9JwRDhn-q7QDVxbiUEYBA9ssSE24yPWpoCY-6cugwxk5Otovw2VAAWEAUJ_jsNtYnNkESeLfms0rrPYzfu7Qh-Zeh7ihb1lcetkKkcBS9WdMSf8qOdt2iKEyXe/s1600/943.jpg)
ສຳນັກຂ່າວຕ່າງປະເທດລາຍງານ 3 ທັນວາ 2017 ວ່າ: ຊຸດເຄື່ອງປະດັບຄຳບູຮານ 10 ອັນ ທີ່ປະກອບມີມົງກຸດ, ຕຸ້ມຫູ, ປະລັກແຂນ ແລະ ເຄື່ອງປະດັບໜ້າເອິກທີ່ຖືກລັກໄປຈາກຜາສາດນະຄອນວັດ ໃນແຂວງສຽມຣຽບ ຂອງກຳປູເຈຍ ໃນລະຫວ່າງເກີດສົງຄາມກາງເມືອງໃນປະເທດ (1967-1979) ແລະ ຖືກພົບຢູ່ໃນລາຍການສິນຄ້າຂາຍທາງອອນລາຍ ຂອງນັກຄ້າວັດຖຸສິລະປະບູຮານລາຍໜຶ່ງ ໃນນະຄອນຫຼວງລອນດອນ ປະເທດອັງກິດ ເມື່ອປີທີ່ຜ່ານມາ.
![](https://blogger.googleusercontent.com/img/b/R29vZ2xl/AVvXsEjqNei4uGSkzdaLuawvH5bduFgcA4Nk1KMj7Z-3aeTb9vmBVYrjksoiPQItNf9BXwCryMn1BrBlMXyivoA4twsLwrtAogSIx6Fq0LYQX8hDMxz6ykcPddho3JhN0DgQ45eEOCbM3GntKEUI/s1600/944.jpg)
ເຄື່ອງປະດັບຄຳຊຸດນີ້ເຊື່ອກັນວ່າ ຢູ່ໃນຍຸກອານາຈັກຂອມບູຮານ ທີ່ເຄີຍຮຸ່ງເຮືອງແຜ່ອຳນາດຄວບຄຸມເຂດປະເທດກຳປູເຈຍ, ໄທ, ຫວຽດນາມ ແລະ ລາວ ໃນຍຸກປັດຈຸບັນລະຫວ່າງສະຕະວັດທີ 9-15.
ພາຍຫຼັງການຄົ້ນພົບຢູ່ໃນອັງກິດ ລັດຖະບານກຳປູເຈຍໄດ້ພະຍາຍາມທຸກວິທີທາງເພື່ອນຳກັບຄືນປະເທດ ແລະ ດ້ວຍຄວາມຊ່ວຍເຫຼືອຈາກຄະນະຜູ້ຊ່ຽວຊານ ຊ່ວຍກວດສອບດົນກວ່າ 1 ປີ ເພື່ອໃຫ້ແນ່ໃຈວ່າເປັນຂອງແທ້ຂອງເກົ່າດັ້ງເດີມທີ່ຖືກລັກໄປ.
ລັດຖະບານກຳປູເຈຍໄດ້ຈັດພິທີຕ້ອນຮັບກັບຄືນສູ່ປະເທດເມື່ອວັນເສົາທີ່ຜ່ານມາ ໂດຍໄດ້ມີຈັດຂະບວນແຫ່ຕ້ອນຮັບຈາກສະໜາມບິນໂປເຊນຕົງ ອ້ອມຮອບນະຄອນຫຼວງພະນົມເປັນ ໂດຍມີປະຊາຊົນຈຳນວນຫຼາຍແຫ່ຊື່ນຊົມ ວັດຖຸບູຮານດັ່ງກ່າວ ນອກຈາກນີ້ຍັງໄດ້ຈັດພິທີສົມໂພດອີກດ້ວຍ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ