ລັດຖະບານສັ່ງປິດໂຮງງານແຍກ ແລະ ຫຼອມສິ່ງເສດເຫຼືອອີເລັກໂຕນິກ ທີ່ກໍ່ມົນລະພິດຮ້າຍແຮງ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgfQ3p7Z9AqLz5kdh70ZsNb3ZLbrsbUYJqm8gLGi3a1dLkBS3IImrFT-ACAZ9e2SSMWN8rcsSVy444a16Z92Vkgx7K2IJuoN6sUI69TJ8dwBoxbF0Td38HgHQOU40wZQKcEbyY7UxdbJyxr/s1600/113.jpg)
ສູນຂໍ້ມູນຂ່າວສານ, ກະຊວງອຸດສາຫະກຳ ແລະ ການຄ້າລາຍງານເມື່ອວັນທີ 20 ກຸມພາ 2018 ທີ່ຜ່ານມາວ່າ: ຫ້ອງວ່າການສຳນັກງານນາຍົກລັດຖະມົນຕີ ອອກແຈ້ງການກ່ຽວກັບຜົນກະລົງຕິດຕາມກວດກາ ແລະ ເກັບຂໍ້ມູນໂຮງງານແຍກ ແລະ ຫຼອມສິ່ງເສດເຫຼືອອີເລັກໂຕນິກ ແລະ ໝໍ້ໄຟເກົ່າ ໃນທົ່ວປະເທດ ສະບັບເລກທີ 1855/ຫສນຍ.ກລຂ. ເພື່ອປ້ອງກັນ, ຄວາມຄຸມ ແລະ ຫຼຸດຜ່ອນມົນລະພິດທີ່ເກີດຈາກສານເຄມີເປັນພິດທີ່ບໍ່ສາມາດປ້ອງກັນໄດ້, ພ້ອມກັນນັ້ນ ກໍ່ເພື່ອຄົ້ນຄວ້າກ່ຽວກັບມາດຕະຖານ ແລະ ຄຸນນະພາບຂອງບັນດາໂຮງງານແຍກ ແລະ ຫຼອມສິ່ງເສດເຫຼືອອີເລັກໂຕນິກ ແລະ ໝໍ້ໄຟເກົ່າ ໂດຍສະເພາະການນຳເຂົ້າ ແລະ ການນຳໃຊ້ວັດຖຸດິບ (ເຄື່ອງອີເລັກໂຕນິກ ແລະ ໝໍ້ໄຟເກົ່າ).
![](https://blogger.googleusercontent.com/img/b/R29vZ2xl/AVvXsEjjUy22bcraxixFA7eG3Gh3-g3A6NakLEYZLGbLR5LKFf_8-Hy4zn6JdgUoCMm1NfWunJnHmTJoLWE8XZ90Nmwl5pt95BdFk_onKkDBZhu6LDHavS8ynbu78ePzDEgVciz1b4VToDRm-hSR/s1600/114.jpg)
ເພື່ອໃຫ້ໄດ້ມາດຕະຖານ ແລະ ຄຸນນະພາບຂອງສາກົນ, ບັນດາໂຮງງານແຍກ ແລະ ຫຼອມສິ່ງເສດເຫຼືອອີເລັກໂຕນິກ ແລະ ໝໍ້ໄຟເກົ່າຕ້ອງໄດ້ປະຕິບັດຕາມລະບຽບ ແລະ ການກຳນົດມາດຕະການຈາກກະຊວງທີ່ກ່ຽວຂ້ອງຢ່າງເຂັ້ມງວດ ໂດຍອີງຕາມບົດແນະນຳກ່ຽວກັບການຄຸ້ມຄອງສິ່ງເສດເຫຼືອເປັນພິດ ແລະ ອັນຕະລາຍ, ເລກທີ 0744/ກຊສ, ລົງວັນທີ 11 ກຸມພາ 2015.
ກະຊວງອຸດສາຫະກຳ ແລະ ການຄ້າສົມທັບກັບທ້ອງຖິ່ນທີ່ກ່ຽວຂ້ອງກວດກາຄືນໂຮງງານທັງໝົດ 13 ແຫ່ງ, ໂດຍມີໂຮງງານ 1 ແຫ່ງຢູ່ນະຄອນຫຼວງວຽງຈັນ ແລະ 1 ແຫ່ງ ຢູ່ແຂວງຫຼວງນ້ຳທາແມ່ນໃຫ້ຢຸດຕິການຜະລິດຢ່າງຖາວອນ.
ເນື່ອງຈາກວ່າສະຖານທີ່ຕັ້ງຂອງໂຮງງານດັ່ງກ່າວບໍ່ເໝາະສົມກັບສະພາບແວດລ້ອມ ເຊິ່ງສາມາດເປັນມົນລະພິດຕໍ່ລະບົບນິເວດ ແລະ ຊຸມຊົນໃນເຂດອ້ອມແອ້ມຂອງທີ່ຕັ້ງໂຮງງານ.
ນອກຈາກນັ້ນ, ເພື່ອປະຕິບັດຕາມເປົ້າໝາຍທີ 3 ຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ແມ່ນທິດທາງໜ້າທີ່ຫຼັກຂອງການບັນລຸການພັດທະນາຕົວເມືອງ ແລະ ຊົນນະບົດທີ່ມີຄວາມຍືນຍົງທາງດ້ານສິ່ງແວດລ້ອມ, ສີຂຽວສະອາດ ແລະ ງາມຕາ ເພື່ອໃຫ້ປະຊາຊົນມີຊີວິດການເປັນຢູ່ທີ່ດີ, ມີສຸຂະພາບທີ່ແຂງແຮງ ແລະ ປອດໄພຈາກມົນລະພິດ.
ແຈ້ງການສະບັບດັ່ງກ່າວ, ສະແດງໃຫ້ເຫັນຈຸດຢືນຂອງລັດຖະບານໃນການພັດທະນາເສດຖະກິດ-ສັງຄົມຕາມທິດສີຂຽວ ແລະ ຍືນຍົງ ເຊິ່ງມັນຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງຕ້ອງປະຕິບັດຕາມລະບຽບກົດໝາຍຢ່າງເຂັ້ມງວດ ເພື່ອຮ່ວມກັນປົກປ້ອງ ຫຼື ຮັກສາສິ່ງແວດລ້ອມ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ