ທ່ານປະທານປະເທດຢ້ຽມຢາມແຂວງອຸດົມໄຊ ແລະ ໂອ້ລົມສະຫະພັນນັກຮົບເກົ່າ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEjUZhbsQX62hIYBwcQjfnHulmr_gNxvWufsicJqFmlxYalImlHdAE_b4XMqxEInXYcd1GWnRI_sxbvqJIDbP8PX6-DlekY4-2Nwp9okHCcdlEnmWNKtkxHBT2bQu0OzvFPmv2scvCYIOXSj/s1600/537.jpg)
ໃນວັນທີ 15 ກຸມພາ ທີ່ຜ່ານມາ, ທ່ານ ບຸນຍັງ ວໍລະຈິດ ເລຂາທິການໃຫ່ຍ ປະທານປະເທດແຫ່ງ ສປປ.ລາວ ໄດ້ເດີນທາງມາຢ້ຽມຢາມແຂວງອຸດົມໄຊ ໃຫ້ການຕ້ອນຮັບໂດຍທ່ານ ເພັດສາຄອນ ຫຼວງອາໄພ ເຈົ້າແຂວງໆອຸດົມໄຊ ພ້ອມດ້ວຍການນຳຂອງແຂວງ, ພະແນກການ, ຄະນະພັກສອງກອງບັນຊາການ ທະຫານ ຕຳຫຼວດ, ບັນດາອົງການຈັດຕັ້ງມະຫາຊົນ ຕະຫຼອດຮອດພະນັກງານຫຼັກແຫຼ່ງພາຍໃນແຂວງຢ່າງອົບອຸ່ນ.
![](https://blogger.googleusercontent.com/img/b/R29vZ2xl/AVvXsEj3j5_a4dcsML7DsO0z-cD_vZ4VAlw3RR9IbwffN-_bGB6zCww9yow5YStRppTaj7DeoV6T9hvlzPvkmtRqfAvywmGZpmlhA1WVK8ioxzfBoUNKLy7nPet_k4DwKF5je3-CMNCCGqVe6IQn/s1600/535.jpg)
ຈາກນັ້ນ ທ່ານ ບຸນຍັງ ວໍລະຈິດ ໄດ້ເຂົ້າພົບປະໂອ້ລົມພະນັກງານສະຫະພັນນັກຮົບເກົ່າແຂວງອຸດົມໄຊ ຢູ່ທີ່ຫ້ອງປະຊຸມຂອງແຂວງ, ກ່ອນອື່ນທ່ານໄດ້ຮັບຟັງການລາຍງານສະພາບການເຄື່ອນໄຫວວຽກງານທີ່ພົ້ນເດັ່ນຂອງສະຫະພັນນັກຮົບເກົ່າແຂວງອຸດົມໄຊ ໃນໄລຍະຜ່ານມາໂດຍຫຍໍ້ ພ້ອມທັງໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ທາງສະຫະພັນນັກຮົບເກົ່າຂອງແຂວງອຸດົມໄຊຍາດມາໄດ້ໃນໄລຍະຜ່ານມາ ພ້ອມນີ້ທ່ານ ໄດ້ຍົກໃຫ້ເຫັນສະພາບການຂອງໂລກທີ່ພວມຜັນແປ ລວມທັງສະພາບພາຍໃນປະເທດເປັນຕົ້ນແມ່ນ ບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນພາຍໃນສັງຄົມໃນປັດຈຸບັນ ລ້ວນແຕ່ເປັນສິ່ງທ້າທາຍຫລາຍຢ່າງຕໍ່ການພັດທະນາປະເທດຊາດຂອງພວກເຮົາ. ຕໍ່ກັບວຽກງານສະຫະພັນນັກຮົບເກົ່າ ຍາມໃດພັກ-ລັດຖະບານກໍໄດ້ຕີລາຄາສູງຕໍ່ຜົນງານທີ່ທາງສະຫະພັນນັກຮົບເກົ່າຍາດມາໄດ້ໄລຍະຜ່ານມາ ໂດຍສະເພາະແມ່ນພາລະກິດຕໍ່ສູ້ກູ້ຊາດ ປົກປັກຮັກສາໃນເມື່ອກ່ອນ ກໍຄືການສ້າງສາພັດທະນາປະເທດຊາດໃນປັດຈຸບັນ ເຊິ່ງລ້ວນແຕ່ເປັນການປະກອບສ່ວນສຳຄັນເຂົ້າໃນການສ້າງສາພັດທະນາປະເທດຊາດໃຫ້ນັບມື້ໄດ້ຮັບການພັດທະນາ.
![](https://blogger.googleusercontent.com/img/b/R29vZ2xl/AVvXsEiwfPoqBP9byxs26MV4gtXpKJQlh-0ZJ8KCoZ0f19pXIopZaDiNRVRX7qNMNmuWNcRpFsy8H-LjbASEuQPJ5m-zTdpX6l4bT9Vk4s6pjkBueuQm9QcMmrcGBkUiKJHV5wsrxOe2og44meYn/s1600/536.jpg)
ຕໍ່ກັບບັນຫາຕ່າງໆ ທ່ານ ບຸນຍັງ ວໍລະຈິດ ໄດ້ເນັ້ນໃຫ້ສະຫະພັນນັກຮົບເກົ່າແຂວງອຸດົມໄຊພ້ອມກັນເອົາໃຈໃສ່ມີສະຕິຕໍ່ກົນອຸບາຍມ້າງເພຂອງກຸ່ມຄົນບໍ່ດີ, ເພີ່ມທະວີຄວາມສາມັກຄີພາຍໃນ, ເສີມຂະຫຍາຍມູນເຊື້ອຮັກຊາດ ແລະ ການປະຕິວັດ, ເປັນເຈົ້າການໃນການນຳໃຊ້ຄວາມຮູ້ຄວາມສາມາດ ເຊີດຊູບົດບາດຂອງນັກຮົບເກົ່າ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ຕາມແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດທີ່ໄດ້ວາງອອກໃຫ້ບັນລຸໝາກຜົນຕົວຈິງ, ເສີມຂະຫຍາຍບົດຮຽນ, ບົດບາດຂອງຕົນເອງເຂົ້າໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ລະບຽບກົດໝາຍຂອງລັດເຂົ້າໃນວຽກງານຕ່າງໆ ໂດຍສະເພາະແມ່ນວຽກງານທີ່ນອນຢູ່ໃນຄວາມຮັບຜິດຊອບຂອງຕົນເອງໃຫ້ເປັນຮູບປະທຳ ແລະ ມີປະສິດທິຜົນດີກວ່າເກົ່າ, ເອົາໃຈໃສ່ລົງຕິດຕາມກວດການຈັດຕັ້ງປະຕິບັດບັນດາໂຄງການຕ່າງໆພາຍໃນແຂວງຢ່າງໃກ້ຊິດ ເພື່ອເຮັດໃຫ້ມີປະສິດທິພາບ ແລະ ນຳເອົາຜົນປະໂຫຍດມາສູ່ການພັດທະນາປະເທດຊາດ ກໍ່ຄືປະຊາຊົນຢ່າງແທ້ຈິງ ພ້ອມທັງ ເອົາໃຈໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ10 ຂອງພັກ ກໍຄື ມະຕິກອງປະຊຸມໃຫຍ່ຂອງແຂວງໃຫ້ໄດ້ຮັບຜົນສຳເລັດຕາມຄາດໝາຍ, ສຸມໃສ່ແກ້ໄຂ ຕ້ານ ແລະ ສະກັດກັ້ນທຸກປະກົດການຫຍໍ້ທໍ້, ກົນອຸບາຍແບ່ງແຍກຂອງສັດຕູໃຫ້ຫມົດໄປຈາກສັງຄົມລາວ ເວົ້າສະເພາະແມ່ນພາຍໃນແຂວງອຸດົມໄຊໃຫ້ທັນການ, ພ້ອມທັງສືບຕໍ່ເຕົ້າໂຮມຄວາມສາມັກຄີຂອງບັນດາເຜົ່າໃຫ້ມີຄວາມແຫນ້ນແຟ້ນຍິ່ງຂຶ້ນ.
ໂອກາດດັ່ງກ່າວ ທ່ານ ບຸນຍັງ ວໍລະຈິດ ຍັງໄດ້ນຳເອົາລົດຈັກຍີ່ຫໍ້ຮອນດ້າ ເວບ100 ຈຳນວນ 8 ຄັນ ລວມມູນຄ່າ 92 ລ້ານກີບ ມາມອບໃຫ້ແກ່ສະຫະພັນນັກຮົບເກົ່າພາຍໃນແຂວງອຸດົມໄຊ ເພື່ອຮັບໃຊ້ເຂົ້າໃນວຽກງານຕື່ມອີກ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ