ຈີນ ເຕືອນ ສ.ອາເມຣິກາ ເລື່ອງສົງຄາມການຄ້າວ່າ: ຕ້ອງການເຈັບຕົວທັງຄູ່ ຫຼື ຕ້ອງການຕ່າງຝ່າຍຕ່າງມີຜົນປະໂຫຍດ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgIfv_DTCS6aUhHzaQkR3QznBcqSrBLLmXIGnAWJ6Yj1557uHysZAss-J662NbbwBNrV91tZ-rWfMHEXC57UA2GzZquqtrwePBQEVpiJyIwIW7QH6Tkj3haSWmuUPDTgh6FSDoZ36LAiQw/s1600/1432.jpg)
ສຳນັກຂ່າວຕ່າງປະເທດລາຍງານ 15 ມິຖຸນາ 2018 ວ່າ: ທ່ານ ສີ ຈິ້ນຜິງ ປະທານປະເທດຈີນ ໄດ້ໃຫ້ການຕ້ອນຣັບທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ທີ່ມະຫາສາລາປະຊາຊົນ ໃນນະຄອນຫຼວງປັກກິ່ງ ເມື່ອວັນພະຫັດ 14 ມິຖຸນາ 2018 ທີ່ຜ່ານມາ ເຊິ່ງຜູ້ນຳຈີນກ່າວໃນຕອນໜຶ່ງຂອງການສົນທະນາ ສະແດງຄວາມຫວັງວ່າລັດຖະບານສະຫະລັດ ອາເມຣິກາ ຈະແກ້ໄຂຢ່າງເໝາະສົມກັບບັນຫາທີ່ລະອຽດອ່ອນຫຼາຍບັນຫາ ເຊິ່ງກ່ຽວຂ້ອງກັບສາຍພົວພັນສອງຝ່າຍ ບໍ່ວ່າຈະເປັນກໍລະນີຂອງໄຕ້ຫວັນ ແລະ ຄວາມຂັດແຍ່ງທາງການຄ້າລະຫວ່າງສະຫະລັດ ອາເມຣິກາ ກັບ ຈີນ.
ໃນສ່ວນຂອງບັນຫາເກົາຫຼີເໜືອນັ້ນ, ຜູ້ນຳຈີນກ່າວວ່າ ລັດຖະບານຈີນມຸ່ງຫວັງທີ່ຈະເຫັນຂະບວນການປົດອາວຸດນິວເຄຼຍຢູ່ແຫຼມເກົາຫຼີເປັນໄປດ້ວຍດີ ຄຽງຄູ່ໄປກັບສະຖຽນລະພາບ ແລະ ສັນຕິພາບໃນພູມມິພາກ, ຂະນະທີ່ທ່ານ ໄມ ພອມແພວ ກ່າວວ່າໃນຖານະຜູ້ແທນຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຂໍຂອບໃຈຈີນເປັນຢ່າງຍິ່ງ ສຳລັບຄຳແນະນຳທີ່ສຳຄັນ ໃນການແກ້ໄຂສະຖານະການຢູ່ແຫຼມເກົາຫຼີ.
![](https://blogger.googleusercontent.com/img/b/R29vZ2xl/AVvXsEg0ps2u_4PSGOOiv_qJlsbMyOuQDpjOccc5BgO1UIuY3IbRgOha1J0793xXY2uvMimsVBODLpTj4Em_CeTFkqytIg_lcp_H7qVDarM9tVb8S61EdUeqO4Eib4hTmGzwz58b02tsFb_BbMs/s1600/1431.jpg)
ຕໍ່ຈາກນັ້ນ, ທ່ານ ໄມ ພອມແພວ ໄດ້ພົບປະຫາລືກັບທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຂອງຈີນ ເຊິ່ງບັນຫາທີ່ຖືກຍົກຂຶ້ນມາເວົ້າເພີ່ມເຕີມຄືສະຖານະການໃນທະເລຈີນໃຕ້ ໂດຍລັດຖະມົນຕີກຊວງການຕ່າງປະເທດສະຫະລັດ ອາເມຣິກາກ່າວເຖິງ ຄວາມເປັນຫ່ວງດ້ວຍຄວາມເຄົາລົບຕໍ່ການເຄື່ອນໄຫວທາງການທະຫານຂອງຈີນທີ່ມີຕໍ່ພື້ນທີ່ຄວາມຂັດແຍ່ງໃນທະເລຈີນໃຕ້ ວ່າຈະສົ່ງຜົນກະທົບຕໍ່ສະຖຽນລະພາບ ແລະ ຄວາມໝັ້ນຄົງໃນບໍລິເວນດັ່ງກ່າວ.
ໃນດ້ານຂອງທ່ານ ຫວັງ ອີ້ ຍັງກ່າວປະຕິເສດຄຳຖະແຫຼງຂອງທ່ານ ໄມ ພອມແພວ ແລະ ກ່າວເຖິງບັນຫາການຄ້າວ່າ ສະຫະລັດ ອາເມຣິກາ ມີທາງເລືອກ 2 ທາງຄື: ການຮັກສາລະດັບການຮ່ວມມືເພື່ອຜົນປະໂຫຍດຮ່ວມກັນ ຫຼື ການປະເຊີນໜ້າແລ້ວຕ່າງຝ່າຍຕ່າງເສຍຫາຍໄປພ້ອມໆກັນ ແລະ ຫວັງວ່າລັດຖະບານສະຫະລັດ ອາເມຣິກາ ຈະເລືອກທາງເດີນດ້ວຍຄວາມສະຫຼາດ ເຊິ່ງຄຳກ່າວຂອງທ່ານ ຫວັງ ອີ້ ເກີດຂຶຶ້ນໃນເວລາດຽວກັນກັບທີ່ມີລາຍງານຈາກນະຄອນຫຼວງວໍຊິງຕັນວ່າ ທ່ານ ສະຕີບ ມະນູຊິນ ລັດຖະມົນຕີກະຊວງການເງິນ ຕ້ອງການໃຫ້ຜູ້ນຳສະຫະລັດ ອາເມຣິກາ ເລື່ອນການຕັ້ງກຳແພງພາສີຕໍ່ຈີນອອກໄປກ່ອນອີກໄລຍະໜຶ່ງ ແຕ່ທ່ານ ໂດໂນ ທຣຳ ບໍ່ເຫັນດີນຳ ແລະ ກ່າວວ່າທ່ານ ກຳລັງພິຈາລະນາລາຍຊື່ສຸດ້ທາຍຂອງລາຍການສິນຄ້າ ເຊິ່ງຈະຕ້ອງພົບກັບກຳແພງພາສີມູນຄ່າ 50,000 ລ້ານໂດລາສະຫະລັດ ແລະ ຈະມີການປະກາດພາຍໃນວັນສຸກ 15 ມິຖຸນາ 2018 ນີ້ ແຕ່ລາຍຊື່ສິນຄ້າຈະຫຼົດລົງຈາກ 1,300 ລາຍການ ເຫຼືອ 800 ລາຍການ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ