ອິດສະຣາແອນ ໂຈມຕີເຂດກາຊາຢ່າງໜັກໜ່ວງ ເພື່ອຕອບໂຕ້ກຸ່ມຮາມາສ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEiWJkGT2B2drBFFO93GBr0bOJIKGnp9Y2T6tC2pKF2OqLRyqf8a2DOvTU0pSUulwwqu0fmTOk6OQf7EJieiyV6WRTLQJ7ahZI7mnLH2Il3zUwOCviSkqcbN7SubXUT8mkGzdmfwZSN-iyM/s1600/1619.jpg)
ສຳນັກຂ່າວຕ່າງປະເທດລາຍງານ 21 ກໍລະກົດ 2018 ວ່າ: ກອງກຳລັງປ້ອງກັນອິດສະຣາແອນ (IDF) ໄດ້ປະຕິບັດການໂຈມຕີທາງອາກາດຕໍ່ເປົ້າໝາຍກວ່າ 40 ແຫ່ງໃນເຂດກາຊາ ຂອງປາເລສໄຕ ຕະຫຼອດວັນສຸກທີ່ຜ່ານມາ ໂດຍໂຈມຕີໃນທິດເໜືອຂອງເຂດກາຊາ 15 ຈຸດ ແລະ ອີກກວ່າ 25 ຈຸດຢູ່ໃນເຂດຂານ ຢູນິສ ທີ່ຢູ່ທາງທິດໃຕ້ຂອງຊາຍແດນອິດສະຣາແອນ ໂດຍປະຕິບັດການດັ່ງກ່າວເກີດຂຶ້ນພາຍຫຼັງທີ່ທະຫານຂອງກອງກຳລັງປ້ອງກັນອິດສະຣາແອນຄົນໜຶ່ງຖືກຍິງເສຍຊີວິດ ໃນລະຫວ່າງການອອກລາດຕະເວນ ແລະ ລະງັບເຫດປະທ້ວງຕາມເຂດຊາຍແດນ ຖືເປັນການເສຍຊີວິດຂອງທະຫານອິດສະຣາແອນໃນປະຕິບັດການທີ່ເຂດກາຊາຄັ້ງທຳອິດໃນຮອບ 4 ປີ ຫຼື ນັບຕັ້ງແຕ່ສົງຄາມລະຫວ່າງອິດສະຣາແອນ ກັບ ກຸ່ມຮາມາສເມື່ອປີ 2014.
![](https://blogger.googleusercontent.com/img/b/R29vZ2xl/AVvXsEjOdwBRj-tepwCLAuKh6cDyZ-YtNDr_YJqd0kbnQBoqIKnA6KjtWTtKPrepK5iSerBdMANx5N2WuEDxWKszpdy6KF7ddhtJV9xOn_-X_oKG-2miPsLAzSBCgxXW_9DIJRdWqVngduXQ0WI/s1600/1618.jpg)
ຂະນະດຽວກັນທ່ານ ເອວິກດໍ ລີເບີແມນ ລັດຖະມົນຕີກະຊວງປ້ອງກັນປະເທດອິດສະຣາແອນ ເຕືອນກຸ່ມຮາມາສວ່າອິດສະຣາແອນ ຈະຕອບໂຕ້ຢ່າງໜັກໜ່ວງຫາກມີວັດຖຸລອຍຂ້າມແດນມາຈາກເຂດກາຊາ ພາຍຫຼັງທີ່ມີລາຍງານວ່າລະບົບປ້ອງກັນໄພທາງອາກາດຂອງອິດສະຣາແອນ ສາມາດສະກັດຈະຫຼວດ 2 ໃນ 3 ລູກທີ່ລອຍຂ້າມແດນມາຈາກເຂດກາຊາ, ເຊິ່ງທ່ານ ເອວິກດໍ ລີເບີແມນ ບໍ່ໄດ້ກ່າວວ່າມີປະຊາຊົນປາເລສໄຕເສຍຊີວິດຈາກປະຕິບັດການໂຈມຕີທາງອາກາດຂອງກອງກຳລັງປ້ອງກັນອິດສະຣາແອນຄັ້ງນີ້ຫຼືບໍ່, ແຕ່ກະຊວງສາທາລະນະສຸກຂອງປາເລສໄຕລາຍງານວ່າມີຜູ້ເສຍຊີວິດຢ່າງໜ້ອຍ 4 ຄົນ ຈາກສະຖານະການຄວາມຮຸນແຮງເມື່ອວັນສຸກທີ່ຜ່ານມາ ໂດຍ 3 ຄົນເສຍຊີວິດຈາກການໂຈມຕີທາງອາກາດຂອງອິດສະຣາແອນ ແລະ ມີຜູ້ໄດ້ຮັບບາດເຈັບອີກຫຼາຍກວ່າ 120 ຄົນ.
![](https://blogger.googleusercontent.com/img/b/R29vZ2xl/AVvXsEg5Yotn8VlMRqeVCoVoMbFQb8_3ulf93WLjdTNIdZiPvFwSEG4T0URN5q85cRsDw4lIQCasY6-cj3ks2L1iwk_uzDd8GfKQ53l3dB1V9CtSQfIChHMm3H_9ocqn_-Pap_oNAOVrp9JMPRg/s1600/1620.jpg)
ຕໍ່ມາກຸ່ມຮາມາສອອກຖະແຫຼງການວ່າ ລັດຖະບານອິດສະຣາແອນ ກັບ ກຸ່ມຮາມາສໄດ້ບັນລຸຂໍ້ຕົກລົງຢຸດຍິງ ເມື່ອຕອນເຊົ້າມືດຂອງວັນເສົານີ້ ຕາມເວລາທ້ອງຖິ່ນ ຕາມການໄກ່ເກ່ຍຂອງສະຫະປະຊາຊາດ ແລະ ເອຢິບ ເຖິງແມ່ນວ່າອິດສະຣາແອນຈະຍັງບໍ່ສະແດງທ່າທີ ແຕ່ໄດ້ຢືນຢັນວ່າຍັງບໍ່ໄດ້ປະຕິບັດການທາງທະຫານເພີ່ມເຕີມ ແລະ ການຢຸດຍິງຄັ້ງນີ້ຖືເປັນຄັ້ງທີ 2 ພາຍໃນອາທິດດຽວ ພາຍຫຼັງທີ່ອິດສະຣາແອນໂຈມຕີທາງອາກາດໃນເຂດກາຊາ ຄັ້ງໃຫຍ່ທີ່ສຸດໃນຮອບ 4 ປີ ເມື່ອອາທິດທີ່ຜ່ານມາ ຕອບໂຕ້ທີ່ກຸ່ມຮາມາສລະດົມຍິງຈະຫຼວດ ແລະ ປືນໃຫຍ່ລວມກັນຫຼາຍກວ່າ 200 ລູກ ເຂົ້າໃນດິນແດນອິດສະຣາແອນ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ