ສະຫະລັດອາເມຣິກາຖິ້ມລະເບີດ ທີ່ໃຫຍ່ທີ່ສຸດໂຈມຕີຮັງຂອງ ISIS ໃນອາຟະການິດສະຖານ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgpCm4L0hZZW2zfmj4y8CznKyKDKPOXKJh1vw9nmmZmMakNblj1UuwDCo8FVWI_CwnozfQ5r8Ib7ehyphenhyphenhnz3EyTu1RnYyash7feJBHOzJ8xX4hRpilKvzLMBeuaKBiS6YUUcSZIWwNrb93c/s1600/534.jpg)
ສຳນັກຂ່າວຕ່າງປະເທດລາຍງານ 14 ເມສາ 2017 ວ່າ: ກອງທັບສະຫະລັດອາເມຣິກາໃນອາຟະການິດສະຖານອອກຖະແຫຼງການລະບຸວ່າ ກອງທັບສະຫະລັດໄດ້ຖິ້ມລະເບີດລູກໃຫຍ່ GBU-43 MOAB ຫຼື "ແມ່ແຫ່ງລະເບີດ" ໂຈມຕີເປົ້າໝາຍສະຖານທີ່ກົບດານໃຕ້ດິນຂອງກຸ່ມຫົວຮຸນແຮງ ISIS ໃນເຂດອາຊິນ ແຂວງນັກກາຮາ ປະເທດອາຟະການິດສະຖານ ເມື່ອເວລາ 19:32 ນາທີ ຂອງວັນພະຫັດທີ 13 ເມສາ 2017 ຕາມເວລາທ້ອງຖິ່ນ.
ຂະນະທີ່ໂຄສົກກອງທັບສະຫະລັດຖະແຫຼງວ່າ: ລະເບີດ GBU-43 MOAB ເປັນລະເບີດລູກໃຫຍ່ທີ່ສຸດທີ່ບໍ່ແມ່ນລະເບີດນິວເຄຼຍທີ່ຖືກນຳມາໃຊ້ໃນປະຕິບັດການທາງການທະຫານຄັ້ງນີ້ ໂດຍນຳຂຶ້ນເຮືອບິນຂົນສົ່ງ MC-130.
ທ່ານ ໂດໂນ ທຣຳ ປະທານປະເທດສະຫະລັດອາເມຣິກາ ກ່າວເຖິງປະຕິບັດການໂຈມຕີດັ່ງກ່າວວ່າ ປະສົບຄວາມສຳເລັດຢ່າງຍິງ ແລະ ຕົນມີຄວາມພູມໃຈຕໍ່ກອງທັບສະຫະລັດຫຼາຍ ທີ່ໄດ້ເປັນຜູ້ອະນຸມັດໃຫ້ດຳເນີນການປະຕິບັດການໂຈມຕີດັ່ງກ່າວດ້ວຍຕົນເອງ.
ໃນດ້ານຂອງອະດີດປະທານປະເທດອະຟະການິດສະຖານ ທ່ານ ຮາມິດ ຄາໄຊ ໄດ້ອອກມາກ່າວປະນາມວ່າ: ການໃຊ້ລະເບີດ GBU-43 MOAB ໃນດິນແດນຂອງອາຟະການິດສະຖານນັ້ນແມ່ນໄຮ້ມະນຸດສະທຳ ແລະ ລໍ້າເສັ້ນເກີນໄປແລ້ວ "ນີ້ບໍ່ແມ່ນສົງຄາມຕໍ່ຕ້ານການກໍ່ການຮ້າຍ ແຕ່ເປັນການໃຊ້ແຜ່ນດິນຂອງພວກເຮົາໃນທາງທີ່ຜິດຢ່າງໄຮ້ມະນຸດສະທຳ ແລະ ໂຫດຮ້າຍ ເພື່ອເປັນບ່ອນທົດລອງອາວຸດໃໝ່ ແລະ ອັນຕະລາຍແບບນີ້".
ລະເບີດ GBU-43 MOAB ເປັນລະເບີດຂະໜາດໃຫຍ່ມີຄວາມຍາວ 9 ແມັດ, ນໍ້າໜັກ 9,800 ກິໂລກຣາມ ແລະ ໃຊ້ລະບົບນຳທາງ GPS ໂດຍເຮືອບິນຂົນສົ່ງ MC-130 ເປັນພາຫະນະໃນການຖິ້ມລະເບີດ, ແຮງຂອງລະເບີດສາມາດແຜ່ຄື້ນອັດອາກາດຈຳນວນມະຫາສານກະຈາຍໄປໄດ້ໃນທຸກທິດທາງກວ່າ 1 ກິໂລແມັດ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ