ປະຫວັດ "ວັນວິສາຂະບູຊາ" ວັນທີ່ສຳຄັນທີ່ສຸດ ຂອງສາສະໜາພຸດ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEjuRdrf9r3hKfUTMCQKLkpstQx6RZiRVb1dyPO_BQtMxuSAqtiJ1SOLRGNZJ2fClZk8PneMsJICuvNz33_hQJZniZ2dH-z6fKOPb44DXykc85yJw3ul8ar-fAqC2Dt3MgDKIdeRSriyrZY/s1600/737.jpg)
ຄວາມໝາຍຄຳວ່າ "ວິສາຂະບູຊາ" ໝາຍເຖິງການບູຊາໃນມື້ເພັງ 15 ຄ່ຳ ເດືອນ 6 ຫຍໍ້ມາຈາກ "ວິສາຂະປຸລະນະມີບູຊາ" ແປວ່າ "ການບູຊາໃນມື້ເພັງເດືອນວິສາຂະ" ຖ້າປີໃດມີອະທິກະມາດ ຫຼື 8 ສອງຫົນກໍ່ເລື່ອນໄປເປັນກາງເດືອນ 7.
ຄວາມສຳຄັນຂອງວັນວິສາຂະບູຊາ ເປັນວັນສຳຄັນຍິ່ງທາງພະພຸດທະສາສະໜາ ເພາະເປັນວັນທີ່ພະພຸດທະເຈົ້າປະສູດຄືເກີດ, ໄດ້ຕັດສະຮູ້ຄືສຳເລັດ ແລະ ໄດ້ປະລິນິພານຄືດັບ ເກີດຂຶ້ນກົງກັນທັງ 3 ຢ່າງໃນມື້ເພັງ 15 ຄ່ຳ ເດືອນ 6.
1. ເມື່ອເຈົ້າຊາຍສິທັດຖະປະສູດທີ່ພະລາດຊະອຸດທະຍານລຸມພິນີວັນ ລະຫວ່າງນະຄອນກະບິນລະພັດກັບເທວະທະຫະ ເມື່ອຕອນເຊົ້າວັນສຸກ ຂຶ້ນ 15 ຄ່ຳ ເດືອນ 6 ປີຈໍ ກ່ອນພຸດທະການ (ພສ) 80 ປີ.
2. ເມື່ອເຈົ້າຊາຍສິທັດຖະຕັດສະຮູ້ ເປັນພະພຸດທະເຈົ້າເມື່ອພະຊົນມາຍຸໄດ້ 35 ພັນສາ ທີ່ໃຕ້ຮົ່ມຕົ້ນໄມ້ສີມະຫາໂພ ຝັ່ງແມ່ນໍ້າເນລັນຊະລາ ໃນຕອນເຊົ້າວັນພຸດ ຂຶ້ນ 15 ຄ່ຳ ເດືອນ 6 ປີລະກາ ກ່ອນພຸດທະການ 45 ປີ ຫຼັງຈາກອອກບວດໄດ້ 6 ປີ ປັດຈຸບັນສະຖານທີ່ຕັດສະຮູ້ແຫ່ງນີ້ຮຽກວ່າ "ພຸດທະຄະຍາ" ຢູ່ທີ່ເມືອງຄະຍາ ລັດພິຫານຂອງອິນເດຍ.
3. ຫຼັງຈາກຕັດສະຮູ້ແລ້ວ ໄດ້ປະກາດພະພຸດທະສາສະໜາ ແລະ ໂພດເວໄນຍະສັດໄດ້ 45 ປີ ພະຊົນມາຍຸໄດ້ 80 ພັນສາ ກໍ່ສະເດັດດັບຂັນປະລິນິພານ ເມື່ອວັນອັງຄານຂຶ້ນ 15 ຄໍ່າ ເດືອນ 6 ປີມະເສັງ ທີ່ສາລະວະໂນທະຍານ ຂອງມັນລະກະສັດ ເມືອງກຸລິນາລາ ແຄວ້ນມັນລະ (ປັດຈຸບັນຢູ່ໃນເມືອງກຸສີນະຄອນ ແຄວ້ນອຸດຕະລະປະເທດ ຂອງປະເທດອິນເດຍ).
ຖືວ່າເປັນເລື່ອງທີ່ໜ້າອັດສະຈັນຍິ່ງ ທີ່ເຫດການທັງ 3 ກ່ຽວກັບວິຖີຊີວິດຂອງພະສຳມາສຳພຸດທະເຈົ້າ ເຊິ່ງມີຊ່ວງໄລຍະເວລາຫ່າງກັນເປັນເວລາຫຼາຍສິບປີ ບັງເອີນເກີດຂຶ້ນໃນມື້ເພັງ 15 ຄ່ຳ ເດືອນ 6.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ