ຢືນຢັນການຄົ້ນພົບລະບົບສຸລິຍະໃໝ່ ຫ່າງໄກໂລກກວ່າ 2,500 ປີແສງ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgU57pYoWnIBk0Iw_vAswJoG4FSechNC1UfJT0UHo3vyr-ZGqsHbwgPWOYADxIQRQCpZHsV3BjIo19IT2pzBDTUjiBlI8jdpu3li4WpMswwdoOpriXP6tUTzWXduxbzWsaLpaZpi77ix0Q7/s1600/1069.jpg)
ສຳນັກຂ່າວຕ່າງປະເທດລາຍງານ 15 ທັນວາ 2017 ວ່າ: ອົງການບໍລິຫານການບິນ ແລະ ອະວະກາດແຫ່ງຊາດສະຫະລັດ ອາເມຣິກາ (NASA) ຮ່ວມກັບ Google ເປີດເຜີຍຜົນການຄົ້ນພົບລະບົບສຸລິຍະທີ່ມີລັກສະນະຄ້າຍຄືກັບລະບົບສຸລິຍະຂອງພວກເຮົາ ເປັນຮູບແບບຂອງດາວເຄາະ 8 ດວງ ໂຄຈອນອ້ອມຮອບດາວເລີກ (ດາວຫຼັກ).
ດາວເລີກ ຫຼື ດາວທີ່ມີບົດບາດເຊັ່ນດຽວກັນກັບດວງຕາເວັນຂອງພວກເຮົາ ຖືກຮຽກວ່າ Kepler-90 ຢູ່ຫ່າງອອກໄປປະມານ 2,545 ປີແສງ ຖືເປັນລະບົບດາວເຄາະທີ່ມີລັກສະນະແບບນີ້ແຫ່ງທຳອິດທີ່ເຄີຍຄົ້ນພົບ, ໂດຍດາວເຄາະລຳດັບທີ 3 Kepler-90i ເປັນດາວຫິນທີ່ຄ້າຍຄືກັນກັບໂລກຂອງພວກເຮົາ ແຕ່ຢູ່ໃກ້ດາວເລີກຫຼາຍຈຶ່ງມີອຸນຫະພູມພື້ນຜິວສູງເຖິງ 427 ອົງສາເຊ ແລະ ມີຮອບວົງໂຄຈອນພຽງ 14.4 ວັນ ເທົ່າກັບວ່າ 1 ປີຂອງດາວເຄາະດວງນັ້ນມີໄລຍະເວລາພຽງສອງອາທິດ.
ການຄົ້ນພົບໃນຄັ້ງນີ້ອາໄສການປະມວນຜົນຈາກຂໍ້ມູນທີ່ເກັບມາໄດ້ຈາກນັກລ່າດາວເຄາະຂອງ NASA ທີ່ໃຊ້ກ້ອງໂທລະທັດອະວະກາດ Kepler Space Telescope ໂດຍອາໄສການວິເຄາະຫາການຫຼີ່ແສງ ເຊິ່ງເປັນສັນຍານບົ່ງບອກເຖິງການທີ່ດາວເຄາະໂຄຈອນຜ່ານໜ້າດາວເລີກ.
ກ້ອງອະວະກາດ Kepler Space Telescope ໄດ້ບັນທຶກຮວບຮວມຂໍ້ມູນດາວເຄາະຜ່ານໜ້າດາວຫຼັກໄວ້ກວ່າ 35,000 ຂໍ້ມູນ, ຖືວ່າຫຼາຍເກີນກວ່າມະນຸດຈະປະມວນຜົນໄດ້ລະອຽດ ຈຶ່ງໄດ້ອາໄສປັນຍາປະດິດ ຫຼື AI ຂອງ Google ເຂົ້າຊ່ວຍໃນການປະມວນຜົນ.
ຄາດວ່າຈະພົບດາວເຄາະນອກລະບົບສຸລິຍະຂອງພວກເຮົາເພີ່ມຂຶ້ນອີກເປັນຈຳນວນຫຼາຍ ເນື່ອງຈາກກ້ອງ Kepler Space Telescope ໄດ້ບັນທຶກຂໍ້ມູນຈາກດາວເລີກໄວ້ກວ່າ 150,000 ດວງ ຈົນເຖິງປັດຈຸບັນນີ້ ນັກດາລາສາດຢືນຢັນການຄົ້ນພົບໂລກທີ່ຢູ່ຫ່າງໄກແລ້ວປະມານ 2,500 ດວງ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ