ທ່ານນາຍົກ ຈະເຂົ້າຮ່ວມກອງປະຊຸມອະນາຄົດອາຊີ ຄັ້ງທີ 24 ທີ່ປະເທດຍີ່ປຸ່ນ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhgjOhWk97UecnMXM-zeeMaGi1lr1PVJlgYxGPKjflWzdCV0T0o5fum9PTu48bAzBTUb1-iyKjAsE3BM8x5l-5-rYlWePFavUy_hHLWTP2QRJXwmBCj_02X5G2Gyrgp1adBeBCNr7m6p3Y/s1600/1319.jpg)
ສຳນັກຂ່າວສານປະເທດລາວລາຍງານວ່າ: ໃນວັນທີ 10 ມິຖຸນາ 2018 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີຂອງລາວ ພ້ອມດ້ວຍຄະນະຈະເດີນທາງເຂົ້າຮ່ວມກອງປະຊຸມສາກົນກ່ຽວກັບອະນາຄົດຂອງອາຊີ ຄັ້ງທີ 24 ຕາມການເຊື້ອເຊີນຂອງສຳນັກໜັງສືພິມເສດຖະກິດ ຍີ່ປຸ່ນ ຫຼື ນິກເກ (NIKKEI) ໃນວັນທີ 11-12 ມິຖຸນາ 2018 ທີ່ໂຕກຽວ, ປະເທດຍີ່ປຸ່ນ.
ກອງປະຊຸມຄັ້ງນີ້, ຈະດຳເນີນໄປພາຍໃຕ້ຫົວຂໍ້ “ສືບຕໍ່ເປີດກວ້າງອາຊີ-ຈະເຮັດແນວໃດ ເພື່ອບັນລຸຄວາມວັດທະນາຖາວອນ ແລະ ມີສະຖຽນລະພາບ” (Keeping Asia Open-How to Achieve Prosperity and Stability), ເຊິ່ງທ່ານນາຍົກລັດຖະມົນຕີ ຈະໃຫ້ກຽດຂຶ້ນກ່າວບົດປາໄສຕໍ່ຫົວຂໍ້ດັ່ງກ່າວ ແລະ ຈະໃຫ້ສຳພາດຂ່າວທີ່ປິ່ນອ້ອມວຽກງານການພັດທະນາເສດຖະກິດ-ັສັງຄົມ ຂອງ ສປປ.ລາວ ແລະ ທັດສະນະຕໍ່ການເຊື່ອມໂຍງເສດຖະກິດພາກພື້ນ ແລະ ສາກົນໃນປັດຈຸບັນ.
![](https://blogger.googleusercontent.com/img/b/R29vZ2xl/AVvXsEgfV6fyfXGOh9eJgdj7lXikRHJtxx_Z5O_lYQ3QBWLz8lIwcrOtcAiMrX7Yp00jre-06qfZkwI39t10nCTDqm3v0lfDOdGvd-KazISptDXPqI0gBp8ALYNm1_ej1ZE2_d6aCK4qDz8gpOU/s1600/1321.jpg)
ໃນໂອກາດເຄື່ອນໄຫວຢູ່ປະເທດຍີ່ປຸ່ນຄັ້ງນີ້, ທ່ານ ທອງລຸນ ສີສຸລິດ ຈະໄດ້ພົບປະສອງຝ່າຍກັບທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນຢ່າງເຕັມຮູບແບບ ແລະ ຮັບການເຂົ້າຢ້ຽມຂ່ຳນັບຂອງບັນດາການນຳທີ່ຈະເຂົ້າຮ່ວມກອງປະຊຸມໃນຄັ້ງນີ້ ແລະ ບັນດາອົງການ/ສະມາຄົມທີ່ສຳຄັນຂອງປະເທດຍີ່ປຸ່ນອີກດ້ວຍ.
![](https://blogger.googleusercontent.com/img/b/R29vZ2xl/AVvXsEiZJFtUzmeyDVgMeaEOqYmxZbq-4Pc4qB1KgZnJA3e4SZWXu08YQIiUlVeuj-U3QC0CdTM2DF_iNwaKLYwGDP4zbwPVd1RVsA99zvpqplJUaVf8bJKAAjv0HXtfLOOc2uEzStNv7idn6hU/s1600/1320.jpg)
ກອງປະຊຸມສາກົນກ່ຽວກັບອະນາຄົດຂອງອາຊີ ແມ່ນໄດ້ຈັດຂຶ້ນທຸກໆປີ ນັບແຕ່ປີ 1995 ເປັນຕົ້ນມາ ໂດຍສຳນັກໜັງສືພິມນິກເກ ຂອງຍີ່ປຸ່ນ, ເຊິ່ງໄດ້ເຊື້ອເຊີນບັນດາຜູ້ນຳ, ຜູ້ບໍລິຫານຂັ້ນສູງຂອງພາກລັດ ແລະ ເອກະຊົນ ລວມທັງອະດີດການນຳ, ຜູ້ຊົງຄຸນນະວຸດທິ, ປະທານອົງການ ແລະ ສະຖາບັນພາກພື້ນ ແລະ ສາກົນ ໃນທົ່ວພາກພື້ນອາຊີເຂົ້າຮ່ວມເພື່ອລະດົມແນວຄວາມຄິດ ແລະ ມີຂໍ້ສະເໜີແນະໃໝ່ໆທີ່ສ້າງສັນ ແນ່ໃສ່ສືບຕໍ່ພັດທະນາພາກພື້ນອາຊີ ໃຫ້ມີຄວາມເຂັ້ມແຂງ ແລະ ຍືນຍົງ, ເຊິ່ງທ່ານນາຍົກລັດຖະມົນຕີກໍ່ໄດ້ເຂົ້າຮ່ວມກອງປະຊຸມດັ່ງກ່າວໃນປີ 2017 ທີ່ຜ່ານມາ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ