ອົງຄະນະພັກ ຫສນຍ ດຳເນີນກອງປະຊຸມໃຫຍ່ສະມາຊິກພັກ ຄັ້ງທີ IV
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEjS-TP2pRFzEDo4wcy0bb5MirsNxxRFSbsP_A0quLaE2GAwBMStFqszvRIx1m6okCk0azsyLaU0RGEDPNAtyREbGuZft7xhkjPD6AncNfAf8Zj4tQQIZZN_XsmeJHPU3ddJcdFIi8tgb03k/s1600/976.jpg)
ກອງປະຊຸມໃຫຍ່ ສະມາຊິກພັກ ຄັ້ງທີ IV ຂອງອົງຄະນະພັກ ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ດຳເນີນຢ່າງເປັນທາງການ ໃນວັນທີ 8 ທັນວາ 2017 ທີ່ຫ້ອງປະຊຸມໃຫຍ່ຂອງ ຫສນຍ, ພາຍໃຕ້ການເປັນປະທານ ຂອງສະຫາຍ ເພັດ ພົມພິພັກ ກຳມະການສູນກາງພັກ, ເລຂາຄະນະພັກ, ລັດຖະມົນຕີ, ຫົວໜ້າ ຫສນຍ. ໂດຍການໃຫ້ກຽດເຂົ້າຮ່ວມ ຂອງສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ; ມີສະຫາຍກໍາມະການສູນກາງພັກ, ບັນດາສະຫາຍລັດຖະມົນຕີປະຈຳ ສນຍ, ສະຫາຍຄະນະພັກ ຫສນຍ, ພ້ອມດ້ວຍ ສະມາຊິກພັກສົມບູນ ຈຳນວນ 180 ກວ່າສະຫາຍ ແລະ ແຂກທີ່ຖືກເຊີນເຂົ້າຮ່ວມ.
![](https://blogger.googleusercontent.com/img/b/R29vZ2xl/AVvXsEjYUp6bMzeKLMsoAo-RwnkcYQqMDrRBm-Olos6dgsgn-w5MJH5LXkt5ZFvSnbZMyHDVeHlFhx8Ru_PQqiJc-RNsqA988TymQKMsz4R4mZe3q6sQ2dQRLToX5tsZG1DhIYiCAxMwFDoTt-gU/s1600/974.jpg)
ກອງປະຊຸມໃຫຍ່ຄັ້ງນີ້, ໄດ້ຮັບຟັງການລາຍງານ ແລະ ປະກອບຄຳຄິດຄຳເຫັນ ຕໍ່ບົດລາຍງານການເມືອງ ຂອງອົງຄະນະພັກ ຫສນຍ ແລະ ທິດທາງແຜນການໃນໄລຍະ 5 ປີຕໍ່ໜ້າ ທີ່ສະເໜີໂດຍ ສະຫາຍ ເພັດ ພົມພິພັກ; ຮັບຟັງການນຳສະເໜີ ບົດສຳຫຼວດການນຳພາລວມ ຂອງຄະນະພັກ ຫສນຍ ຈາກສະຫາຍ ນາງ ບຸບຜາ ເຄນວົງດາລາ ຄະນະພັກ ແລະ ປ່ອນບັດຄັດເລືອກເອົາຄະນະພັກ ຫສນຍ ຊຸດໃໝ່.
ໃນນັ້ນ, ເນື້ອໃນຂອງບົດລາຍງານການເມືອງ ກໍ່ຄື ຜົນສຳເລັດຈາກ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ຫສນຍ ໄດ້ສະແດງໃຫ້ເຫັນວ່າ: ໄດ້ເປັນເສນາທິການໃຫ້ແກ່ ນາຍົກລັດຖະມົນຕີ, ບັນດາທ່ານຮອງນາລັດຖະມົນຕີ ແລະ ລັດຖະມົນຕີປະຈຳ ສຳນັກງານນາຍົກລັດຖະມົນຕີ ໃນການອຳນວຍວຽກງານດ້ານການບໍລິຫານ, ການຄຸ້ມຄອງລັດ-ຄຸ້ມຄອງສັງຄົມ ເປັນຕົ້ນ ໄດ້ສ້າງແຜນເຄື່ອນໄຫວປະຈຳປີ, ປະຈຳງວດ, ປະຈຳເດືອນຂອງລັດຖະບານ, ຂອງນາຍົກ-ບັນດາຮອງນາຍົກລັດຖະມົນຕີ ໄດ້ຢ່າງຕໍ່ເນື່ອງ; ໄດ້ເອົາໃຈໃສ່ກະກຽມ ເນື້ອໃນກອງປະຊຸມຕ່າງໆ ໄດ້ຢ່າງຖືກຕ້ອງວ່ອງໄວ ແລະ ຊັດເຈນດີສົມຄວນ.
ໄດ້ສັງລວມ ແລະ ຄົ້ນຄວ້າຄຳເຫັນ ຕໍ່ເອກະສານລາຍງານຂອງສູນກາງ ແລະ ທ້ອງຖິ່ນ, ພ້ອມທັງ ໄດ້ເອົາໃຈໃສ່ເກັບກຳ, ສະໜອງຂໍ້ມູນຕ່າງໆ ໃຫ້ແກ່ຂັ້ນເທິງ; ໄດ້ຄົ້ນຄວ້າ, ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດ ແນວທາງນະໂຍບາຍຂອງພັກ, ກົດໝາຍ, ມະຕິຕົກລົງຂອງລັດຖະບານ ແລະ ການຜັນຂະຫຍາຍການຊີ້ນຳ ຂອງທ່ານນາຍົກ-ບັນດາທ່ານຮອງນາຍົກລັດຖະມົນຕີ ອອກເປັນແຈ້ງການ ແລະ ນິກຳຕ່າງໆ; ດ້ານການປະສານງານ: ໄດ້ປັບປຸງກົນໄກ ກໍ່ຄື ລະບອບລະບຽບການປະສານງານ, ເປັນໃຈກາງຈັດກອງປະຊຸມປຶກສາຫາລື ແລະ ແກ້ໄຂບັນຫາສຳຄັນຕ່າງໆ ຮ່ວມກັບບັນດາກະຊວງ, ອົງການ ແລະ ທ້ອງຖິ່ນ ໃຫ້ມີຄວາມກົມກຽວ, ວ່ອງໄວ, ຊັດເຈນ, ທັນການ, ຮັບປະກັນຄວາມປອດໄພ ແລະ ສອດຄ່ອງກວ່າເກົ່າ.
ທັງເຜີຍແຜ່ ຄວາມເຫັນຊີ້ນຳຂອງລັດຖະບານ ກໍ່ຄື ຂັ້ນເທິງ ໃຫ້ພາກສ່ວນຕ່າງໆ ໄດ້ຮັບຊາບ ແລະ ຈັດຕັ້ງປະຕິບັດໄດ້ທັນການສາ ມາດຮັບປະກັນໃຫ້ແກ່ການຈັດຕັ້ງປະຕິບັດ ວຽກງານຂອງລັດຖະບານ; ດ້ານການບໍລິການຮັບໃຊ້: ໄດ້ເອົາໃຈໃສ່ປັບປຸງ ວຽກງານອຳນວຍຄວາມສະດວກດ້ານຕ່າງໆ, ດູແລຄວາມປອດໄພ ໃຫ້ການນຳເປັນຢ່າງດີ ເຮັດໃຫ້ມີຄວາມເປັນລະບຽບຮຽບຮ້ອຍ ແລະ ທັນສະໄໝຂຶ້ນ; ປັບປຸງລະບົບການຄຸ້ມຄອງ ແລະ ບໍລິການເອກະສານ ຜ່ານປະຕູດຽວ ໂດຍຜ່ານລະບົບ ເຄືອຂ່າຍພາຍໃນ ແລະ ລະບົບ ເຕັກໂນໂລຊີຂໍ້ມູນຂ່າວສານ. ພ້ອມກັນນັ້ນ, ກົງຈັກຂອງ ຫສນຍ ກໍ່ໄດ້ຮັບການປັບປຸງບູລະນະ ໃຫ້ສອດຄ່ອງ-ເໝາະສົມ ຕາມທິດທີ່ໄດ້ກຳນົດ; ຖັນແຖວພະນັກງານ ກໍ່ມີການເຕີບໃຫຍ່ຂະຫຍາຍຕົວ ທາງດ້ານຈຳນວນ ແລະ ຄຸນນະພາບ ເຮັດໃຫ້ວຽກງານຂອງ ຫສນຍ ມີຜົນສຳເລັດເປັນກ້າວໆ. ນອກຈາກນັ້ນ, ບັນດາຄະນະກຳມະການ ທີ່ຂຶ້ນກັບ ຫສນຍ ໃນເມື່ອກ່ອນ ກໍ່ໄດ້ຕັ້ງໜ້າປະຕິບັດສຳເລັດ ແລະ ຫຼ້ອນໜ້າທີ່ຂອງຕົນ ເປັນຢ່າງດີ.
![](https://blogger.googleusercontent.com/img/b/R29vZ2xl/AVvXsEjwGekuBCKv9B97ZEEi-zfuDyA9qGqqS0HI9PyE0_-hkzHLUGX3PkObfwcojDj46KMW6k9CX3HRFI424h522AjeWhhiMbV31B7IcBabe-VthNd-jYoEYE1FLRhI1Jd6JwNiQ0RWxtJoNzjz/s1600/975.jpg)
ໃນໂອກາດດັ່ງກ່າວ, ຜູ້ແທນສົມບູນ ໄດ້ໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະພັກ ຫສນຍ ຊຸດໃໝ່ ໂດຍມີຜູ້ສະໝັກເລືອກຕັ້ງ ຈຳນວນ 13 ສະຫາຍ, ຍິງ 02 ສະຫາຍ ແລະ ເລືອກເອົາ 9 ສະ ຫາຍ, ຍິງ 01 ສະຫາຍ; ກອງປະຊຸມຄັ້ງປະຖົມມະລຶກ ໄດ້ປ່ອນບັດຄັດເລືອກເອົາ ສະຫາຍ ເພັດ ພົມພິພັກ ເປັນເລຂາຄະນະພັກ, ສະຫາຍ ສົມສະໜິດ ສຸວັນນະລາດ ເປັນຮອງເລຂາຄະນະພັກ ທັງເປັນປະທານກວດກາພັກ, ແລະ ສະຫາຍ ຄໍາລາວັນ ຈັນທະລາວັນ ເປັນຄະນະປະຈໍາພັກ.
![](https://blogger.googleusercontent.com/img/b/R29vZ2xl/AVvXsEiIDZFQwHBBxoJZUdhMMuNkbct0tgXTd4UaOJfwf1Pz1qqZORffQSQv0gC342FMMv6yL4OnDdvI1-r2icqvJZcxXLdoNVGCANFzlzTswpchELej5wEnsOXmRHBkzIhmetvTwbqu2D8NfEv9/s1600/977.jpg)
ກອງປະຊຸມໃຫຍ່ຄັ້ງນີ້ ແມ່ນໄດ້ຮັບກຽດຢ່າງສູງ ຈາກສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ໃຫ້ການໂອ້ລົມ ແລະ ຊີ້ນຳ ຊຶ່ງສະຫາຍໄດ້ກ່າວຊົມເຊີຍ ຕໍ່ຜົນສຳເລັດ, ທັງຕີລາຄາສູງຕໍ່ຜົນງານ ທີ່ຫ້ອງວ່າການ ສນຍ ສາມາດຍາດມາໄດ້ ໄລຍະ 5 ປີທີ່ຜ່ານມາ. ພ້ອມນີ້ ສະຫາຍ ຍັງໄດ້ເນັ້ນໜັກຊີ້ນຳໃຫ້ ອົງຄະນະພັກ ຫສນຍ
1. ສືບຕໍ່ເອົາໃຈໃສ່ປັບປຸງ ກົງຈັກໃຫ້ມີຄວາມກະທັດລັດ, ມີປະສິດທິຜົນ ແລະ ມີປະສິດທິພາບ;
2. ເອົາໃຈໃສ່ໃນການວິໄຈ, ສັງລວມ, ຮ່າງບົດປາໃສ ໃຫ້ນາຍົກ-ຮອງນາຍົກລັດຖະມົນຕີ ທັງພາຍໃນ ແລະ ຕ່າງປະເທດ ໃຫ້ມີເນື້ອໃນແທດເໝາະ ກັບຄວາມເປັນຈິງ ແລະ ສາມາດປະຕິບັດໄດ້;
3. ການບໍລິຫານ-ການຈັດການ ຕ້ອງມີຄວາມວ່ອງໄວ, ຊັດເຈນ, ພະນັກງານທຸກຄົນ ຕ້ອງມີນໍ້າໃຈຮັກຊາດ ແລະ ປະຊາຊົນ, ສຸຂຸມ, ຮອບຄອບ, ບໍ່ອຸ້ມວຽກ, ບໍ່ປະໃຫ້ແກ່ຍາວເວລາ, ຊັກຊ້າ ແລະ ບໍ່ຮຽກຮ້ອງຜົນປະໂຫຍດໃດໆ ໃນການປະຕິບັດໜ້າທີ່ຂອງຕົນ;
4. ຕ້ອງຊື່ສັດ, ບໍລິສຸດ, ຕ້ອງກ້າຫານ ແລະ ກົງໄປກົງມາ ຕໍ່ຄໍາເຫັນທີ່ສະເໜີຕໍ່ຂັ້ນເທິງ ການສະເໜີຕ້ອງພາວະວິໃສ, ໜ້າເຊື່ອຖື, ບໍ່ຫຼິ້ນພັກ ຫຼິ້ນພວກ;
5. ການປະຕິບັດວຽກງານຕ້ອງດໍາເນີນໄປຕາມຂັ້ນຕອນ ແລະ ເປີດເຜີຍ;
6. ຕ້ອງຮູ້ຈັກຮັກສາຄວາມລັບ ອັນໃດອະນຸຍາດໃຫ້ເປີດເຜີຍ;
7. ໃຫ້ປັບປຸງອັນໃດເປັນແຈ້ງການ, ອັນໃດເປັນໜັງສືທາງລັດຖະການ, ອັນໃດເຮັດເປັນຄໍາສັ່ງ, ອັນໃດຄວນເຮັດເປັນ ດໍາລັດຂອງນາຍົກລັດຖະມົນຕີ;
8. ຫຼັກການເຮັດວຽກ ຕ້ອງຖືກກັບຫຼັກ ການລວມສູນປະຊາທິປະໄຕ ຕົກລົງເປັນໝູ່ຄະນະ, ບຸກຄົນຮັບຜິດຊອບ ແລະ ແທດເຖິງຕົວຈິງ ແລະ
9. ສໍາຄັນ ຕ້ອງມີຄວາມສາມັກຄີ, ເປັນຈິດໜຶ່ງໃຈດຽວກັນໃນການເຮັດວຽກ, ອ້າຍຮູ້ສອງນ້ອງຮູ້ໜຶ່ງ, ຢາກມີຄວາມສາ ມັກຄີໄດ້ ຕ້ອງມີການຕໍ່ສູ້ (ບໍ່ເຮັດແບບຮູບການ), ຕ້ອງຮັກແພງກັນຢ່າງແທ້ຈິງ, ຕ້ອງຖ້າຕໍານິຕິຊົມເຊິ່ງກັນ ແລະ ກັນ ຈຶ່ງຈະສາມາດກໍ່ສ້າງກັນໄດ້.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ