ສານເກົາຫຼີໃຕ້ ສັ່ງຕັດອິດສະຫຼະພາບມະຫາເສດຖີ ຜູ້ກໍ່ຕັ້ງ Lotte Group ພ້ອມລູກຊາຍ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEjlbd5NCo8S80VBbRPFovRy35v_ULECepqxJkCMNekFhJy0kWrEaVZNoGSrgk-F_qYKqXvBCzTe_7zHm59ytJDVw-oUSqE1XbfaLSGX1VsZHwR2vuyZJBQgrDxYXoEtu67Ed1jUWx1YigHV/s1600/1121.jpg)
ສຳນັກຂ່າວຕ່າງປະເທດລາຍງານ 22 ທັນວາ 2017 ວ່າ: ສານແຂວງໂຊກາງ ມີຄຳພິພາກສາໃຫ້ຕັດອິດສະຫຼະພາບທ່ານ ຊິນ ກຸກ-ໂຮ ອາຍຸ 95 ປີ ມະຫາເສດຖີຜູ້ກໍ່ຕັ້ງບໍລິສັດ Lotte Group ທີ່ຢູ່ໃນພາວະເຈັບເປັນ ຕ້ອງໄດ້ນັ່ງລໍ້ ເປັນເວລາ 4 ປີ ແຕ່ສານບໍ່ອອກໝາຍຈັບ ເນື່ອງຈາກຂໍ້ຈຳກັດດ້ານອາຍຸ ແລະ ຄວາມເຈັບເປັນ ທີ່ລວມທັງເປັນໂລກຄວາມຈຳເສື່ອມ ເຊິ່ງທ່ານອາດບໍ່ຕ້ອງຕິດຄຸກ, ຂະນະທີ່ທ່ານ ຊິນ ດົງ-ບິນ ລູກຊາຍ ໃນຖານະປະທານບໍລິສັດ Lotte Group ຄົນປັດຈຸບັນ ສານສັ່ງໃຫ້ຕັດອິດສະຫຼະພາບ 20 ເດືອນ ແຕ່ຈະເປັນອິດສະຫຼະພາບ ຕາບໃດທີ່ບໍ່ເຮັດຜິດກົດໝາຍອີກໃນໄລຍະເວລາ 2 ປີທີ່ສານໃຫ້ພາກໂທດໄວ້.
![](https://blogger.googleusercontent.com/img/b/R29vZ2xl/AVvXsEgi9vJgVx97im7El_xLVVWB0x9GvC3tTPfS6aKkIbd2DWl_YlyB-CSZsq1fHuUOL35b-TPJgzn5ZGR6ln89mui7tkI6fGbFeKiFgUrDfndoDqBuaOYk0v-9VfuCiK2RV0ZgXDNZcIAAjRJ2/s1600/1122.jpg)
ຄະດີນີ້ສຳນັກງານໄອຍະການໄດ້ຍື່ນຟ້ອງທ່ານ ຊິນ ກຸກ ໂຮ ພ້ອມດ້ວຍເມຍນ້ອຍ, ລູກສາວກົກ ແລະ ລູກຊາຍທັງ 2 ຄົນ ໃນຫຼາຍຂໍ້ກ່າວຫາ ລວມທັງການຫຼີກລ້ຽງພາສີລວມເປັນເງິນ 76 ລ້ານໂດລາສະຫະລັດ ແລະ ສໍ້ໂກງເງິນກອງທຶນຂອງບໍລິສັດຈຳນວນ 46 ລ້ານໂດລາສະຫະລັດ, ໄອຍະການຍັງກ່າວອີກວ່າ ສະມາຊິກໃນຄອບຄົວຂອງທ່ານ ຊິນ ຍັງໄດ້ສ້າງຄວາມເສຍຫາຍແກ່ບໍລິສັດ Lotte Group ຈຳນວນ 123 ລ້ານໂດລາສະຫະລັດ ດ້ວຍການໃຊ້ອິດທິພົນຄວບຄຸມເງິນທຶນຂອງບໍລິສັດ ແລະ ມີການຕັດສິນໃຈເພື່ອເອື້ອຜົນປະໂຫຍດຕໍ່ຄອບຄົວຕົນເອງ ແທນທີ່ຈະເອື້ອຜົນປະໂຫຍດຕໍ່ກຸ່ມຜູ້ຖືຮຸ້ນຂອງບໍລິສັດ Lotte Group.
ເຄືອຂ່າຍສູນການຄ້າ Lotte ເປັນກຸ່ມທຸລະກິດຂະໜາດໃຫຍ່ທີ່ສຸດອັນດັບ 5 ຂອງເກົາຫຼີໃຕ້, ເປັນໜຶ່ງໃນກຸ່ມທຸລະກິດຄອບຄົວຂະໜາດໃຫຍ່ ທີ່ຂັບເຄື່ອນເສດຖະກິດເກົາຫຼີໃຕ້ຂຶ້ນສູ່ອັນດັບທີ 11 ຂອງໂລກ ແຕ່ບາງຄັ້ງບັນດາທຸລະກິດຄອບຄົວຂະໜາດໃຫຍ່ເຫຼົ່ານັ້ນ ມັກຖືກກ່າວຫາວ່າບໍ່ໂປ່ງໃສ ແລະ ມີຄວາມໃກ້ຊິດກັບນັກການເມືອງຫຼາຍເກີນໄປ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ