ຄ່າຝາກລົດງານບຸນວັດພູ ຈຳປາສັກ ສູງກວ່າລາຍໄດ້ສະເລ່ຍຕໍ່ມື້ຂອງປະຊາຊົນລາວ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgPZlaoJqBv8nPyvyZSEbeJxmc9oYG5a_-ofjBpUAzr6h6RQ1RiwZo9jwk5vzKvKNobsywYR5vv6GSVASM0OFkqlDKSw6LrOJpM4tx6ltSoFNrCROoNTIbvQtjCLh6TF_Cv0lt04ibnbOWP/s1600/314.jpg)
ເກີດເປັນກະແສວິພາກວິຈານໃນສັງຄົມອອນລາຍຕໍ່ກັບຄ່າຝາກລົດ ໃນງານບຸນນະມັດສະການວັດພູຈຳປາສັກ ປະຈຳປີ 2018 ທີ່ຈັດຂຶ້ນໃນລະຫວ່າງວັນທີ 29-31 ມັງກອນ 2018 ນີ້, ໂດຍຄ່າຝາກລົດໃຫຍ່ແມ່ນ 60,000 ກີບຕໍ່ຄັນ, ລົດຈັກ 20,000 ກີບ ຕໍ່ຄັນ, ລົດເມ ແລະ ລົດໂດຍສານ 80,000 ກີບຕໍ່ຄັນ ວ່າສູງເກີນໄປຫຼືບໍ່? ໃຊ້ຫຼັກເກນໃດໃນການຄິດໄລ່? ແລະ ໄຕຕອງເຖິງຄວາມເໝາະສົມແລ້ວບໍ່ຕໍ່ລາຍໄດ້ຂອງປະຊາຊົນ?.
![](https://blogger.googleusercontent.com/img/b/R29vZ2xl/AVvXsEhDiNx1-rPCbrDpZJS_aTfh2SwT8AYQ-qry-8El9AyttqGroamF-LPGi7sugcwaDLOpgjhhCULll1vFcHUyaiYOLoKNYQKSU0MKaYCfHLEQCj5nw25MR2K63uYW9aGPcdo6tYRkS3HbgK-2/s1600/312.jpg)
ເຊິ່ງປີນີ້ບໍ່ແມ່ນປີທຳອິດທີ່ເກັບໃນອັດຕານີ້ ປີທີ່ຜ່ານມາ 2017 ລົດໃຫຍ່ກໍ່ເກັບຄ່າຝາກຄັນລະ 60,000 ເຊັ່ນກັນ ໂດຍປີນີ້ແມ່ນກຸ່ມບໍລິສັດ ຍິ່ງໂຊກໄຊ ເປັນຜູ້ສຳປະທານ, ໃນຂະນະທີ່ລາຍໄດ້ໂດຍສະເລ່ຍຂອງປະຊາຊົນລາວແມ່ນ 2,408 ໂດລາສະຫະລັດ (ປີ 2016) ຖືກມື້ລະ 6.6 ໂດລາສະຫະລັດ ຄິດເປັນເງິນກີບດ້ວຍອັດຕາແລກປ່ຽນ 8,300 ກີບຕໍ່ໂດລາ ເທົ່າກັບ 54,780 ກີບຕໍ່ມື້ເທົ່ານັ້ນ, ສຳລັບຄ່າຝາກລົດຈັກແມ່ນຕົກຢູ່ 36.5% ຂອງລາຍໄດ້ຕໍ່ມື້, ລົດໃຫຍ່ 109.5% ຂອງລາຍໄດ້ຕໍ່ມື້, ລົດເມ ແລະ ລົດໂດຍສານ 146% ຂອງລາຍໄດ້ຕໍ່ມື້ ນີ້ຄືຜົນການຄິດໄລ່ປຽບທຽບຕາມອັດຕາລາຍໄດ້ຕໍ່ມື້ຂອງປະຊາຊົນລາວ.
ຈຶ່ງເກີດຄຳຖາມຂຶ້ນອີກວ່າ, ໜ່ວຍງານທີ່ກ່ຽວຂ້ອງມີຄວາມພະຍາຍາມແນວໃດທີ່ຈະແກ້ໄຂບັນຫາດັ່ງກ່າວ ແລະ ເປັນຫຍັງຈຶ່ງປ່ອຍໃຫ້ເປັນປາກສຽງໃນສັງຄົມທຸກໆປີ, ໃນເມື່ອວັດພູ ຈຳປາສັກ ຄືມໍລະດົກຂອງຊາດ ມໍລະດົກຂອງຄົນລາວທຸກຄົນ ແຕ່ການຈະເຂົ້າເຖິງໃນວາລະສຳຄັນ ກໍ່ຄືງານບຸນນະມັດສະການ ຜັດຕ້ອງຕົກຢູ່ໃນເງື່ອນງຳທາງທຸລະກິດຈົນເກີນພໍດີ ແລ້ວແນວໃດຈະເຮັດໃຫ້ສັດທາຂອງປະຊາຊົນໜ້ຽວແໜ້ນຕໍ່ຮີດຄອງປະເພນີອັນດີງາມຂອງຊາດໄດ້ ໃນເມື່ອການເຂົ້າເຖິງມີຕົ້ນທຶນທີ່ສູງເກີນງາມ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ