ຖານທັບລັດເຊຍໃນຊີຣີ ຖືກໂຈມຕີດ້ວຍໂດຣນ ແຕ່ສາມາດສະກັດໄດ້

ສຳນັກຂ່າວຕ່າງປະເທດລາຍງານ 9 ມັງກອນ 2018 ວ່າ: ກະຊວງປ້ອງກັນປະເທດລັດເຊຍອອກຖະແຫຼງການເມື່ອວັນຈັນທີ່ຜ່ານມາວ່າ ຖານທັບໃນເມືອງຮະໄມມິມ ແລະ ເມືອງຕາຕຸສ ເຊິ່ງຕັ້ງຢູ່ແຄມຝັ່ງທະເລເມດີເຕີເຣນຽນ ພາກຕາເວັນຕົກຂອງຊີຣີ ທີ່ກອງທັບລັດເຊຍໄດ້ເຂົ້າໄປໃຊ້ພື້ນທີ່ດັ່ງກ່າວເປັນຖານທັບມາດົນກວ່າ 2 ປີແລ້ວ ຕົກເປັນເປົ້າໝາຍຂອງການພະຍາຍາມໂຈມຕີ ໂດຍເຄື່ອງບິນບໍ່ມີຄົນຂັບ ຫຼື ໂດຣນ ຢ່າງໜ້ອຍ 13 ຄັ້ງ ນັບຕັ້ງແຕ່ວັນເສົາທີ່ຜ່ານມາ.

ເຊິ່ງເຈົ້າໜ້າທີ່ປະຈຳຖານທັບສາມາດທຳລາຍໂດຣນສູ້ຮົບໄດ້ 7 ລຳ ສ່ວນອີກ 6 ລຳຖືກສະກັດໄວ້ໄດ້ກ່ອນເຂົ້າສູ່ພື້ນທີ່ຊັ້ນໃນຂອງຖານທັບ ຂະນະດຽວກັນ ເນື້ອໃນຂອງຖະແຫຼງການຍັງປະຕິເສດລາຍງານຫຼາຍກະແສລະບຸວ່າ ທະຫານລັດເຊຍ 2 ຄົນໃນຖານທັບຮະໄມມິມ ເສຍຊີວິດຈາກການໂຈມຕີດ້ວຍປືນໃຫຍ່ຂອງກຸ່ມຕິດອາວຸດ ໃນຄືນສົ່ງທ້າຍປີເກົ່າຕ້ອນຮັບປີໃໝ່ ແລະ ຍົນຮົບອີກ 7 ລຳຂອງກອງທັບລັດເຊຍທີ່ຈອດຢູ່ໃນຖານທັບໄດ້ຮັບຄວາມເສຍຫາຍ.

ຂະນະທີ່ອົງກອນສັງເກດການດ້ານສິດທິມະນຸດຊີຣີ (SOHR) ລາຍງານເພີ່ມເຕີມວ່າ ກອງທັບລັດເຊຍ ແລະ ຊີຣີ ໄດ້ເພີ່ມການຕິດຕາມລະວັງໄພ ທີ່ອາດຕົກເປັນເປົ້າມາຍຂອງການໂຈມຕີດ້ວຍໂດຣນ ຕັ້ງແຕ່ອາທິດທີ່ຜ່ານມາ ໂດຍສະເພາະຢູ່ຖານທັບຮະໄມມິມ ເຊິ່ງເປັນອານາເຂດທາງທະຫານທີ່ກອງທັບລັດເຊຍປະຈຳການກຳລັງພົນ ແລະ ອາວຸດໄວ້ຫຼາຍທີ່ສຸດໃນຊີຣີ ແລະ SOHR ສັນນິຖານວ່າ ກຸ່ມຕິດອາວຸດເຄືອຂ່າຍຂອງ IS ໃນແຂວງລາຕາເຄຍ ເຊິ່ງເປັນສະຖານທີ່ຕັ້ງຂອງຖານທັບທັງສອງແຫ່ງ ໜ້າຈະມີສ່ວນກ່ຽວຂ້ອງກັບການພະຍາຍາມໂຈມຕີດັ່ງກ່າວ.

ນອກຈາກນີ້ລາຍງານຂອງ SOHR ຍັງເປີດເຜີຍເຖິງສະຖານະການສູ້ຮົບ ເພື່ອຍາດຊິງເຂດຖານທັບມູຣາຄາບັດ ໃນເຂດກູຕາຕາເວັນອອກ ຊານນະຄອນຫຼວງດາມາສກັສ ທີ່ທະວີຄວາມຮຸນແຮງຕັ້ງແຕ່ວັນທີ 29 ທັນວາ 2017 ທີ່ຜ່ານມາ ເປັນເຫດເຮັດໃຫ້ທະຫານຝ່າຍລັດຖະບານ ແລະ ກອງກຳລັງຝ່າຍກະບົດເສຍຊີວິດລວມກັນຢ່າງໜ້ອຍ 159 ຄົນ.

#SYRIA: Security system of the Russian #Khmeimim air base and #Russian Naval CSS point in the city of #Tartus successfully warded off a terrorist attack with massive application of #UAVs through the night of 5th – 6th January, 2018 https://t.co/nHiUrEWonL pic.twitter.com/3EgrFhYeHh

— Минобороны России (@mod_russia) January 8, 2018