ເປີດສາກຂຶ້ນຢ່າງເປັນທາງການແລ້ວ ງານມະຫະກຳບຸນຊ້າງ ແຂວງໄຊຍະບູລີ ປີ 2018
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgQvzUHEjGL6kdtvnIw5z8UBoHeXX5L9_LsVuZ9S16KuXNP_ZMsqutFPrwQ9e1AQmPX3hTLL8GaaW8QA243kw-LaypbPzJKINvETzrwYQ7uQDRHkIdtq3sVKi1Q887Gr2xm2hh1tzmtS-tQ/s1600/8.jpg)
ພິທີເປີດງານມະຫະກຳບຸນຊ້າງ ປີທ່ອງທ່ຽວລາວ 2018 ຂອງແຂວງໄຊຍະບູລີ ໄດ້ດ້ຈັດຂຶ້ນໃນຕອນເຊົ້າຂອງວັນທີ 17 ກຸມພາ 2018 ນີ້, ທີ່ເດີ່ນສະໜາມຫຼວງຂອງແຂວງ, ເປັນກຽດເຂົ້າຮ່ວມ ແລະ ລັ່ນຄ້ອງເປີດງານ ຂອງທ່ານ ບຸນຍັງ ວໍລະຈິດ ເລຂາທິການໃຫຍ່, ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ.ລາວ, ມີ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ມີບັນດາຄະນະພັກ-ຄະນະນໍາຂອງແຂວງ, ພະເຖລະ-ນຸເຖລະ, ມີບັນດາຜູ້ຕາງໜ້າຈາກແຂວງຕ່າງໆ, ກະຊວງ, ກົມກອງທີ່ກ່ຽວຂ້ອງ, ແຂກພາຍໃນ ແລະ ຕ່າງປະເທດ ພ້ອມດ້ວຍພໍ່ແມ່ປະຊາຊົນຊາວ ແຂວງ ໄຊຍະບູລີ ເຂົ້າຮ່ວມຢ່າງເປັນຂະບວນຟົດຟື້ນ.
![](https://blogger.googleusercontent.com/img/b/R29vZ2xl/AVvXsEhHC8MQ3Oa7ePS6Kknsjr91sImXiUQEty7X0UK7kWI2-oaxxI7xpGCO4kwFa1-it9yNKuDiu4spMJNqaJ-APQ5F3LwJMHsdNAcnnhht0dQz08ODY2NNI8SMfm9-IjgvT61nkP9-ila2IjtF/s1600/3.jpg)
ທ່ານ ຍັນຍົງ ສີປະເສີດ ຮອງເຈົ້າແຂວງ ໄຊຍະບູລີ, ປະທານຈັດງານມະຫະກໍາບຸນຊ້າງ ປະຈຳປີ 2018 ໄດ້ໃຫ້ຮູ້ວ່າ: ເພື່ອເສີມຂະຫຍາຍວັດທະນະທໍາ, ຮີດຄອງປະເພນີ ທີ່ເປັນເອກະລັກໃນແບບວິຖີການດຳລົງຊີວິດຂອງປະຊາຊົນລາວບັນດາເຜົ່າທີ່ຕິດພັນກັບຊ້າງ, ຖືເອົາຊ້າງເປັນມູນມໍລະດົກທີ່ລໍ້າຄ່າຂອງຊາດມາແຕ່ບູຮານນະການ ແລະ ເພື່ອສ້າງຈິດສຳນຶກໃຫ້ຄົນຮຸ່ນໃໝ່ໄດ້ມີຄວາມຮັບຮູ້ກ່ຽວກັບຊ້າງຫຼາຍຂຶ້ນ, ເພາະຊ້າງເປັນສັດໃຫຍ່, ເປັນສັດຄຳຮູ້, ສາມາດເຂົ້າໃຈ ແລະ ຮັບຟັງຄຳສັ່ງຂອງຜູ້ເປັນເຈົ້າຂອງເປັນຢ່າງດີ. ສະນັ້ນ, ຈຶ່ງມີຄວາມຈຳເປັນຢ່າງຍິ່ງ ທີ່ສັງຄົມລາວຂອງພວກເຮົາຄວນຮັບຮູ້ກ່ຽວກັບການອະນຸລັກຮັກສາ ແລະ ຫວງແຫນຊ້າງໃຫ້ຢືນຍົງຄົງຢູ່ຄູ່ກັບປະຊາຊົນລາວ ຕະຫຼອດໄປ, ໃຫ້ສົມກັບທີ່ປະເທດເຮົາຖືກຂະໜານນາມວ່າເປັນດິນແດນລ້ານຊ້າງ.
![](https://blogger.googleusercontent.com/img/b/R29vZ2xl/AVvXsEjk8FyyXGXBWLhJTZpHx5SpCq3_LMEsiSzdQh_IRewcmhwOycv1rzFmYHPW5j-U6aXRgSVs_tLk2f2qaon0JaeTgt6nG8zmXOBEnDHgV1WudgrHqIkrmzEqgXE_4V0UaUMFIeY0Lsny9Oi2/s1600/2.jpg)
ນອກຈາກເປັນການອານຸລັກຊ້າງແລ້ວ, ຍັງເປັນການຊຸກຍູ້ສົ່ງເສີມວຽກງານການທ່ອງທ່ຽວຂອງແຂວງໄຊຍະບູລີກໍ່ຄື ສປປ.ລາວ ໃຫ້ເປັນທີ່ຮັບຮູ້ຢ່າງກວ້າງຂວາງຈາກນັກທ່ອງທ່ຽວທັງພາຍໃນ ແລະ ຕ່າງປະເທດ; ສະເພາະງານມະຫະກໍາບຸນຊ້າງ ແລະ ປີທ່ອງທ່ຽວລາວ ປີ 2018 ນີ້ ໂດຍມີກິດຈະກຳທີ່ຫຼາກຫຼາຍສີສັນ ໂດຍສະເພາະແມ່ນ: ມີຕະຫຼາດນັດວາງສະແດງ ແລະ ຈຳໜ່າຍສິນຄ້າຂອງ 11 ເມືອງ, ບັນດາບໍລິສັດຜູ້ອຸປະຖຳ, ການວາງສະແດງສິນຄ້າໂອດ໋ອບພາຍໃນແຂວງ, ຕ່າງແຂວງ ແລະ ຕ່າງປະເທດ, ຜູ້ປະກອບການທຸລະກິດພາຍໃນປະເທດ ແລະ ຕ່າງປະເທດ ລວມທັງໝົດ 219 ຮ້ານ; (ໃນນີ້: ຜູ້ປະກອບການທຸລະກິດພາຍໃນປະເທດ ຈຳນວນ 176 ຫ້ອງ, ຕ່າງປະເທດ 15 ຫ້ອງ, ຕ່າງແຂວງ 2 ຫ້ອງ, ບັນດາເມືອງ 11 ຫ້ອງ, ສິນຄ້າໜຶ່ງເມືອງໜຶ່ງຜະລິດຕະພັນ 10 ຫ້ອງ ແລະ ຜູ້ອຸປະຖໍາຈໍານວນ 5 ຫ້ອງ); ເຊິ່ງເລີ່ມແຕ່ວັນທີ 16 ຈົນຮອດວັນທີ 22 ກຸມພາ 2018.
![](https://blogger.googleusercontent.com/img/b/R29vZ2xl/AVvXsEjcYRWGhxWJtV0EByQ6SEZmmjHTp9BUz3D-Ud1qX-ipe20OktDzZ2WH-IpS-dQsvL8MDyq1QQ5J_bhJt5d85qwjJGJWjfeOIza-OfSrrNNiQq8aOyW2jIulOJaoDj643Ge5lYqb7EVq1Oxs/s1600/1.jpg)
ນອກນີ້ ຍັງມີກິດຈະກຳການຄົບງັນຕະຫຼອດໄລຍະຂອງການຈັດງານບຸນ, ມີການຂີ່ຊ້າງອ້ອມເມືອງໄຊຍະບູລີ, ມີພິທີຕັກບາດຕາມຮິດຄອງປະເພນີ, ພິທີບາສີສູ່ຂວັນຊ້າງ, ມີຂະບວນແຫ່ຂອງຊ້າງ ຈຳນວນ 69 ໂຕປະສານສຽງເປົ່າສະໄນ, ຂະບວນລົດແຫ່ສະແດງເຖິງວັດທະນະທຳຂອງ 11 ເມືອງ, ຂະບວນສະແດງຂອງ 8 ເຜົ່າ , ຊົມການສະແດງຂອງຊ້າງຄຳຮູ້ 36 ລາຍການ ແລະ ການປະກວດພາອາຫານບຸບເຟຊ້າງ, ຈາກນັ້ນ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ໃຫ້ກຽດຂຶ້ນກ່າວເປີດງານຢ່າງເປັນທາງການ, ທ່ານໄດ້ກ່າວວ່າ: ງານມະຫະກຳບຸນຊ້າງ ຕິດພັນກັບການເປີດປີທ່ອງທ່ຽວລາວ ປີ 2018 ໄດ້ນຳເອົາຄວາມສາມັກຄີຮັກແພງອັນອົບອຸ່ນ, ໄມຕີຈິດມິດຕະພາບມາສູ່ງານມະຫະກຳບຸນຊ້າງໃນຄັ້ງນີ້, ເຊິ່ງເປັນການສົ່ງເສີມມູນເຊື້ອວັດທະນະທຳອັນດີງາມ ທັງເປັນການສືບຕໍ່ເຜີຍແຜ່ ແລະ ປູກຈິດສຳນຶກໃຫ້ແກ່ອະນຸຊົນຄົນຮຸ່ນຫຼັງ ໃນການອະນຸລັກຊ້າງໃຫ້ມີຄວາມຍືນຍົງຄຽງຄູ່ກັບຊີວິດຂອງປະຊາຊົນບັນດາເຜົ່າ ຊາວແຂວງໄຊຍະບູລີ ກໍ່ຄືຂອງຊາດລາວ, ໂອກາດດັ່ງກ່າວ ທ່ານ ບຸນຍັງວໍລະຈິດ ພ້ອມດ້ວຍບັນດາແຂກທີ່ເຂົ້າຮ່ວມໃນງານກໍ່ໄດ້ລັ່ນຄ້ອງ 9 ບາດ, ຕັດແຖບຜ້າ-ປ່ອຍປຸມເປົ້າ, ເປີດປ້າຍງານມະຫະກຳບຸນຊ້າງ ແລະ ປີທ່ອງທ່ຽວລາວຢ່າງເປັນທາງການ ແລະ ເຂົ້າຊົມຮ້ານຄ້າຜະລິດຕະພັນໂອດອບຕື່ມອີກ.
![](https://blogger.googleusercontent.com/img/b/R29vZ2xl/AVvXsEhTsqbR5-5jcDOGVV2BAIrok0ks6HwTRXmtDC4Va8SfCIlyUCnetfJsDiMPLVVxToYzC6s8W4DlfVv066NjTZ2EH2TpdW9i6RfWNctIREbnPJdyDZe_pLA3Y2Wy8zq2_VsJnOmzYxxLyEsX/s1600/4.jpg)
![](https://blogger.googleusercontent.com/img/b/R29vZ2xl/AVvXsEhCUxtxxnqCutNUVU99wklTGWkSnypCyXMeKqvh6WemtyxMxYeO1JqfrD5vypstLHAoUxxeZvuLrOLVQafW-bbjwjzeVCtIuBM9SGzKEx6DYZb4S0q9VLkBovNTdGH25pDZpZaNQpMB96GG/s1600/6.jpg)
![](https://blogger.googleusercontent.com/img/b/R29vZ2xl/AVvXsEgq-cS3C-PhjjYn5gFJ-TXoM6XIwiK9B2Jjo8wETzdWnAyaIlO3aAqlzdR3VyRbbUfs5npWf8eos4119Dcqp6L_eM8d1TEyAa-TR_YOWS6WmC1WzLWLlc49QafZIAz3iMh32JY82SHquZzj/s1600/9.jpg)
![](https://blogger.googleusercontent.com/img/b/R29vZ2xl/AVvXsEhzlLOZPwDuSBepynIeU8bivpUFzKX5LNBOLElQ6cGU9wvpmbYEb7bsrk6VSB4XHyjCYGVyVBUhPcCHeHw2viJibV0o-EXu5-j71Ah4udSWXNOxPTwzQy4G-pr91H86m42019zteFCp7Gd8/s1600/7.jpg)
![](https://blogger.googleusercontent.com/img/b/R29vZ2xl/AVvXsEgfrzFn6S25wXqdJSUS4Q9a76ZywjuffSlLNqkSW36CboLHS5XFVj9WezQG3ymqm1ER3Arfkx19XF1UE4_AOrbTaHoc3UIRD3QYgomMk6SiM2UJivAUXQP-46XMwgZRQOPq4b96Xf1lOyF6/s1600/5.jpg)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ