ພູໄຟຢູ່ເກາະສຸມາດຕາ ປະເທດອິນໂດເນເຊຍ ລະເບີດຢ່າງຮຸນແຮງອີກຄັ້ງ (ວິດີໂອ)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhxVWunSLxBRreG3iJ817Sk1kRhk9vxmwKgABOokm6SuBfr2-ZDhQjSgfDUy6WpDKuBbsu2mEjOEpXNz4rtm1YBpr76SqB4meYhDrlo5hb0ZGd2GMdNkh96S-vinG_sGzrbeEiiA19epGSI/s1600/36.jpg)
ສຳນັກຂ່າວຕ່າງປະເທດລາຍງານ 19 ກຸມພາ 2018 ວ່າ: ສຳນັກງານບໍລິຫານຈັດການໄພພິບັດແຫ່ງຊາດຂອງອິນໂດເນເຊຍ ອອກຖະແຫຼງການວ່າ ພູໄຟຊິນາບຸງ ທີ່ມີຄວາມສູງ 2,468 ແມັດ ແລະ ຕັ້ງຢູ່ທາງຕອນເໜືອຂອງເກາະສຸມາດຕາ ລະເບີດຢ່າງຮຸນແຮງອີກຄັ້ງ ເມື່ອຕອນເຊົ້າຂອງວັນຈັນນີ້ ຕາມເວລາທ້ອງຖິ່ນ ໂດຍມີເຖົ່າຖ່ານ ແລະ ກຸ່ມຄວັນຕຶບໜາລອຍຂຶ້ນຈາກປາກພູໄຟເປັນໄລຍະທາງໄກກວ່າ 5 ກິໂລແມັດ, ເຊິ່ງລາຍງານຂອງສຳນັກງານບໍລິຫານຈັດການໄພພິບັດແຫ່ງຊາດຂອງອິນໂດເນເຊຍຍັງບໍ່ໄດ້ລະບຸວ່າມີຜູ້ໄດ້ຮັບຜົນກະທົບຈາກເຫດຄັ້ງນີ້ແລ້ວຫຼືບໍ່.
![](https://blogger.googleusercontent.com/img/b/R29vZ2xl/AVvXsEgSIAKx8oHYs6bAe1XKBsz9ilCKqDkGZzHKd3WOmPZgjliBSltV59I92H-uIetZJo5wl_ItiuVhYqHMOW08K4wv1Y6D4xETgvfdldkIKvaoiXWJjmJJB0VtHkrR9RFFyUzfAnM4oTy0s_A5/s1600/37.jpg)
ເຖິງຢ່າງໃດກໍ່ຕາມ, ສູນຕິດຕາມລະວັງເຖົ່າຖ່ານຈາກພູໄຟ ທີ່ເມືອງດາວິນ ໃນນໍເທິນເທຣິທໍຣີ ທາງພາກເໜືອຂອງອົດສະຕຣາລີ ໄດ້ອອກປະກາດເຕືອນໄພ “ສີແດງ” ສຳລັບສາຍການບິນທຸກແຫ່ງທີ່ຈະບິນຜ່ານເກາະສຸມາດຕາ ເຊິ່ງເປັນເກາະຂະໜາດໃຫຍ່ທີ່ສຸດຂອງອິນໂດເນເຊຍ.
![](https://blogger.googleusercontent.com/img/b/R29vZ2xl/AVvXsEhFiwSLvcQJm7InU2pPgZ4NMwQmc7AbfI01hyphenhyphenHScR6YgARSNYzaw0LGOq0Trod_E4dZpWoQ-bbQ2YYuQOFeBo6JWq3tTUZ5WM7jadL-RmEkpoPwnQzMuvSkNpewAgpQ4ZUZB-tGyVMOOGa3/s1600/37.jpg)
ພູໄຟຊິນາບຸງ ໄດ້ກັບມາເລີ່ມລະເບີດເປັນຄັ້ງທຳອິດເມື່ອປີ 2010 ສົ່ງຜົນໃຫ້ມີຜູ້ເສຍຊີວິດ 4 ຄົນ ຫຼັງຈາກທີ່ດັບມອດໄປໄດ້ 4 ທົດສະວັດ, ຕໍ່ມາໄດ້ລະເບີດຂຶ້ນອີກໃນປີ 2014 ເຮັດໃຫ້ປະຊາຊົນ 16 ຄົນເສຍຊີວິດ ແລະ ໃນປີ 2016 ປະຊາຊົນເສຍຊີວິດ 7 ຄົນ ເຮັດໃຫ້ໜ່ວຍງານທີ່ກ່ຽວຂ້ອງທຸກແຫ່ງຂອງອິນໂດເນເຊຍ ໄດ້ເພີ່ມຄວາມຕື່ນຕົວໃນການຕິດຕາມສະຖານະການການປ່ຽນແປງຂອງພູໄຟໜ່ວຍດັ່ງກ່າວຢ່າງຕໍ່ເນື່ອງ ແລະ ຈົນເຖິງປັດຈຸບັນມີການອົບພະຍົບປະຊາຊົນໃນເຂດທີ່ມີຄວາມສ່ຽງແລ້ວຫຼາຍກວ່າ 30,000 ຄົນ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ