ເຖິງຈະມີມະຕິຂອງ UN ໃຫ້ຢຸດຍິງ ແຕ່ສະໜາມຮົບກູຕາ ຕາເວັນອອກຂອງຊີຣີ ຍັງດຳເນີນຕໍ່ໄປ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhYmnak0qJ3vj9ryVMLUQgvVa77OKhjXWWzuYbnE38QyInPX77raWuMqClxtTeuG-hy9HRyLUbYIjoBkxuIwMtSyQZQ6jwfHqse3e-ToZC7TikdOMpnL1esYYv5x-B-4AzsKbjx9x0dqWGL/s1600/179.jpg)
ສຳນັກຂ່າວຕ່າງປະເທດລາຍງານ 26 ກຸມພາ 2018 ວ່າ: ອົງກອນສັງເກດການດ້ານສິດທິມະນຸດຊີຣີ ລາຍງານຈຳນວນຜູ້ເສຍຊີວິດຈາກການສູ້ຮົບໃນເຂດກູຕາ ຕາເວັນອອກ ທີ່ຢູ່ຮອບນອກຂອງນະຄອນຫຼວງດາມັດສະກັດ ເພີ່ມເປັນຢ່າງໜ້ອຍ 530 ຄົນ ແລະ ໄດ້ຮັບບາດເຈັບຫຼາຍກວ່າ 2,000 ຄົນ ນັບຕັ້ງແຕ່ອາທິດທີ່ຜ່ານມາ, ໂດຍໃນຈຳນວນນີ້ຢ່າງໜ້ອຍ 14 ຄົນເສຍຊີວິດຈາກການໂຈມຕີເມື່ອວັນອາທິດ (25 ກຸມພາ) ທີ່ຜ່ານມາ, ເຊິ່ງຜູ້ເສຍຊີວິດສ່ວນໃຫຍ່ມີອາການຫາຍໃຈຕິດຂັດຢ່າງຮຸນແຮງ ຈຶ່ງມີການຕັ້ງສົມມຸດຕິຖານວ່າອາດເປັນຜົນມາຈາກການໄດ້ຮັບສານເຄມີອອກລິດຮ້າຍແຮງຫຼືບໍ່?
![](https://blogger.googleusercontent.com/img/b/R29vZ2xl/AVvXsEidh72ebhQK13fCVVF3kb8_a2oG87iCXp8LBoCOA99JEHwNornmeeEeqU9wmFRgswJsDVPAtNP_fqXkfpx_yf0_RpR5LlhMt2vliwBAM7KdAMjzGHgVHx29rEPKuoRJDI8bjRpF8dVDLMpX/s1600/182.jpg)
ສະຖານະການດັ່ງກ່າວເກີດຂຶ້ນທັງໆ ທີ່ຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ມີມະຕິເປັນເອກະພາບໃນວັນເສົາ (24 ກຸມພາ) ທີ່ຜ່ານມາ ໃຫ້ຢຸດຍິງທົ່ວປະເທດໃນທັນທີ ເປັນເວລາ 30 ວັນ ແລະ ໃນລະຫວ່າງນີ້ໜ່ວຍງານຫຼຸດຜ່ອນຄວາມທຸກຍາກສາກົນຈະເຂົ້າໄປໃນພື້ນທີ່ການສູ້ຮົບ ເພື່ອດຳເນີນການຊ່ວຍເຫຼືອປະຊາຊົນ, ຂະນະທີ່ລັດຖະບານອີຣານ ທີ່ໄດ້ໃຫ້ການສະໜັບສະໜູນລັດຖະບານຊີຣີຢືນຢັນວ່າ ໄດ້ປະຕິບັດຕາມມະຕິຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດຢ່າງເຂັ້ມງວດ, ແຕ່ເຖິງຢ່າງໃດກໍ່ຕາມ ການທີ່ຄຳສັ່ງບໍ່ໄດ້ຄວບຄຸມກຸ່ມກໍ່ການຮ້າຍ ທີ່ລວມເຖິງກຸ່ມອັນ-ກໍອິດະ ແລະ ກຸ່ມຮາຢັດ ຕາຣີ ອັນ-ຊາມ ຫຼື ອະດີດກຸ່ມອັນ-ນຸສະຣາ ໝາຍຄວາມວ່າປະຕິບັດການທາງການທະຫານໃນສ່ວນນີ້ຍັງຄົງດຳເນີນຕໍ່ໄປ.
ເຊັ່ນດຽວກັນກັບທ່າທີຂອງລັດຖະບານຕວັກກີ ໂດຍທ່ານ ເບເຄຍ ບອສແດັກ ຮອງນາຍົກລັດຖະມົນຕີຕວັກກີ ກ່າວວ່າມະຕິຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ບໍ່ມີຜົນກັບປະຕິບັດການທາງທະຫານຕໍ່ກອງທັບຕວັກກີໃນເມືອງອາຟຣິນ ພາກເໜືອຂອງຊີຣີ ແລະ ເຂດໃກ້ຄຽງ ເຊິ່ງຕວັກກີໄດ້ເປີດສາກບຸກເຂົ້າໂຈມຕີເມື່ອວັນທີ 20 ມັງກອນ 2018 ທີ່ຜ່ານມາ ເພື່ອປາບປາມກຸ່ມກໍ່ການຮ້າຍ ທີ່ໝາຍເຖິງກອງກຳລັງປ້ອງກັນຕົນເອງຊາວເຄິດ ທີ່ໄດ້ຮັບການສະໜັບສະໜູນຈາກສະຫະລັດ ອາເມຣິກາ.
![](https://blogger.googleusercontent.com/img/b/R29vZ2xl/AVvXsEgOQCctfS-0owB15BQH3EPIdCRZxCFP-GNQKVymEYAsh7oWriM5OU3kyWJFVXM0e3SaIbBBYci8GpkBn225JqPqW380S5nuCg2olPy0jPOG2huOBla-3YiZ_0TqIFOjBv1zreDq78xIWmzu/s1600/181.jpg)
![](https://blogger.googleusercontent.com/img/b/R29vZ2xl/AVvXsEgr4Mn6h33fOmERNZT5TxGp4aRvHfPS6ngW0JNhBDqcU0k2rHZ_mxzJv8t375msxPD14VffeJXmETI-KmM-51gxVxkYZ26aZlMSezsA0csdDPWDxsGTgXcttfTMyx70f2LTWmfoPLj-C7yo/s1600/180.jpg)
![](https://blogger.googleusercontent.com/img/b/R29vZ2xl/AVvXsEgEHDQQLLpQmXnmxKiHcoC4SnjChIteFtcCiHlIGkhkvHQqRrsvX2LaJtU3fWt1LlYfYqueiAJ0RxFVPI3hKaVBBDF6cebAVCEOlFcseCi06Fd7WY55tWVtGXZDJkbqBx6axIuFEfYVN1DV/s1600/178.jpg)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ