ທ່ານ ທອງລຸນ ສີສຸລິດ ນາຍົກລັດຖະມົນຕີ ສະເໜີຫຼາຍບັນຫາໃນກອງປະຊຸມອາຊຽນ-ອົດສະຕຣາລີ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEiWP6cs462pp_UEHdv-zK11-UUCN-RLa6pcniO41nBzaEg7c_PrFXN60_cU22arN06fUfTYQZmAPv-uyUzvHY-m9voy7MTb22Wb5H6Yc8PidXk6EuFrob8JT0BcmE1CV13aCktXb2pCHErN/s1600/508.jpg)
ກະຊວງການຕ່າງປະເທດລາຍງານ ເມື່ອວັນທີ 18 ມີນາ 2018 ທີ່ຜ່ານມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ນຳພາຄະນະຜູ້ແທນ ສປປ.ລາວ ເຂົ້າຮ່ວມກອງປະຊຸມສຸດຍອດອາຊຽນ-ອົດສະຕຣາລີ ສະໄໝພິເສດ ພາຍໃຕ້ຄຳຂວັນ: “ສົ່ງເສີມຄວາມໝັ້ນຄົງ ແລະ ຄວາມສົມບູນພູນສຸກຂອງພາກພື້ນ”.
ໃນກອງປະຊຸມສຸດຍອດຄັ້ງນີ້ ບັນດາຜູ້ນຳອາຊຽນ ແລະ ອົດສະຕຣາລີໄດ້ຕີລາຄາສູງຕໍ່ໝາກຜົນຂອງການຮ່ວມມືລະຫວ່າງອາຊຽນ ແລະ ອົດສະຕຣາລີ ຕະຫຼອດໄລຍະ 44 ປີຜ່ານມາ ກວມເອົາຂົງເຂດການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ ເຊິ່ງມີຄວາມຄືບໜ້າເທື່ອລະກ້າວ ແລະ ຈົນສາມາດບັນລຸການຍົກລະດັບການພົວພັນຂຶ້ນເປັນຄູ່ຮ່ວມຍຸດທະສາດໃນປີ 2014.
![](https://blogger.googleusercontent.com/img/b/R29vZ2xl/AVvXsEijBtpQ8b01j8VSRcY6_zy1f0fY1cfy6fHF4Utdb2tUTGonkq14j2FcyU1e_lWM4qIcQhB2WsAcOl-bm_UvqR_HyNDLk1urr_qtttpUpxrpU7vFmXJF9Gj19VJyedBC7OTsSFPIL1T_zBfQ/s1600/507.jpg)
ສຳລັບທິດທາງການຮ່ວມມືອາຊຽນ-ອົດສະຕຣາລີ ໃນຕໍ່ໜ້າ ກອງປະຊຸມໄດ້ເຫັນດີສືບຕໍ່ຮັດແໜ້ນ ການເປັນຄູ່ຮ່ວມຍຸດທະສາດອາຊຽນ-ອົດສະຕຣາລີ ໂດຍສຸມໃສ່ເພີ່ມທະວີບການຮ່ວມມືໃນຂະແໜງທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ ເປັນຕົ້ນແມ່ນ ດ້ານການສຶກສາ, ການພັດທະນາຊັບພະຍາກອນມະນຸດ, ການຄ້າ ແລະ ການລົງທຶນ, ການຮ່ວມມືລະຫວ່າງພາກທຸລະກິດ, ການຮັດແຄບຄວາມແຕກໂຕນດ້ານການພັດທະນາ, ການເຊື່ອມຈອພາກພື້ນ ໂດຍສະເພາະແມ່ນການພັດທະນາໂຄ່ງລ່າງພື້ນຖານທີ່ມີຄຸນນະພາບ ແລະ ຍືນຍົງ, ສົ່ງເສີມການໄປມາຫາສູ່ກັນລະຫວ່າງປະຊາຊົນອາຊຽນ ແລະ ອົດສະຕຣາລີ ແລະ ການຮ່ວມມືເພື່ອຮັບມືກັບບັນຫາອາດຊະຍາກຳຂ້າມຊາດ.
![](https://blogger.googleusercontent.com/img/b/R29vZ2xl/AVvXsEj_MaHAYjsNb4mSQ3agHvEwpqcKMQgLu3J3QWXbHLbsI-dsK6LRgIlETaK8dwurRyRtk0dtaSi0wY7hVUIb0A-UKYGod0JvPpr4kLBt8txfeX9a_PIp9IzzzNDjOeNucDwit6lOlI95yWR_/s1600/505.jpg)
ໃນໂອກາດນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນບາງຈຸດສຳຄັນ ເປັນຕົ້ນແມ່ນ ການສົ່ງເສີມການສຶກສາ ກໍ່ຄືການພັດທະນາຊັບພະຍາກອນມະນຸດ ເຊິ່ງໃນນັ້ນໄດ້ຕີລາຄາສູງຕໍ່ການຊ່ວຍເຫຼືອດ້ານການສຶກສາຂອງອົດສະຕຣາລີ ຕໍ່ບັນດາປະເທດສະມາຊິກອາຊຽນ ລວມທັງ ສປປ.ລາວ ໃນຮູບແບບທຶນການສຶກສາ ແລະ ເຝິກອົບຮົບໃນດ້ານຕ່າງໆ ລວມທັງແຜນການຮ່ວມມືດ້ານການສຶກສາເປັນຈຸດໜັກ.
ນອກນັ້ນ, ຍັງໄດ້ຊົມເຊີຍຕໍ່ຄວາມໝາຍໝັ້ນຂອງອົດສະຕຣາລີ ທີ່ຈະໃຫ້ການຮ່ວມມື ແລະ ຊ່ວຍເຫຼືອາຊຽນ ເພື່ອຫຼຸດຜ່ອຍຄວາມແຕກໂຕນດ້ານການພັດທະນາພາຍໃນອາຊຽນ ແລະ ສະເໜີໃຫ້ອົດສະຕຣາລີ ສືບຕໍ່ສຸມໃສ່ເພີ່ມທະວີການຮ່ວມມືກັນ ໃນຂະແໜງການທີ່ອົດສະຕຣາລີ ມີທ່າແຮງເຊັ່ນ: ດ້ານການເຊື່ອມຈອດ, ດ້ານກະສິກຳ ໂດຍສະເພາະການຖ່າຍທອດເຕັກໂນໂລຊີການຜະລິດໃນຂະແໜງກະສິກຳສະອາດ, ອຸດສາຫະກຳປຸງແຕ່ງກະສິກຳ ແລະ ສົ່ງເສີມການເຂົ້າເຖິງຕະຫຼາດພາກພື້ນ ແລະ ສາກົນ ຂອງຜະລິດຕະພັນກະສິກຳຈາກປະເທດສະມາຊິກອາຊຽນ ແລະ ອື່ນໆ.
ພ້ອມດຽວກັນນັ້ນ, ບັນດາຜູ້ນຳອາຊຽນ ແລະ ອົດສະຕຣາລີ ໄດ້ປຶກສາຫາລືກ່ຽວກັບການຮ່ວມມື ດ້ານເສດຖະກິດລະຫວ່າງອາຊຽນ ກັບ ອົດສະຕຣາລີ ແລະ ໄດ້ເຫັນດີເພີ່ມທະວີການຮ່ວມມືເພື່ອການເຊື່ອມໂຍງເສດຖະກິດພາກພື້ນ ໂດຍສະເພາະການສ້າງຂີດຄວາມສາມາດ ແລະ ການຈັດຕັ້ງປະຕິບັດມາດຕະການຫຼຸດຜ່ອນສິ່ງກີດຂວາງດ້ານການຄ້າ ພາຍໃຕ້ສັນຍາເຂດການຄ້າເສລີອາຊຽນ-ອົດສະຕຣາລີ-ນິວຊີແລນ ແລະ ການເລັ່ງລັດການເຈລະຈາສັນຍາການເປັນຄູ່ຮ່ວມມືເສດຖະກິດຮອບດ້ານພາກພື້ນ.
ໃນໂອກາດດັ່ງກ່າວ, ບັນດາຜູ້ນຳອາຊຽນ ແລະ ອົດສະຕຣາລີໄດ້ຮັບຊາບ ແລະ ຊົມເຊີຍຕໍ່ຜົນສຳເລັດຂອງກອງປະຊຸມສຸດຍອດພາກທຸລະກິດອາຊຽນ-ອົດສະຕຣາລີ ໂດຍການເຂົ້າຮ່ວມຂອງບັນດາຫົວໜ່ວຍທຸລະກິດຂອງອາຊຽນ ແລະ ອົດສະຕຣາລີ.
ບັນດາຜູ້ນຳອາຊຽນ ແລະ ອົດສະຕຣາລີ ຍັງໄດ້ປຶກສາຫາລືກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ກອງປະຊຸມໄດ້ຊົມເຊີຍຕໍ່ຜົນສຳເລັດຂອງກອງປະຊຸມວ່າດ້ວຍການຕ້ານການກໍ່ການຮ້າຍ ໂດຍມີທ່ານ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບເຂົ້າຮ່ວມ ແລະ ເຫັນວ່າບົດບັນທຶກຄວາມເຂົ້າໃຈ ວ່າດ້ວຍການຮ່ວມມືຕ້ານການກໍ່ການຮ້າຍລະຫວ່າງອາຊຽນ ແລະ ອົດສະຕຣາລີ ທີ່ໄດ້ລົງນາມຮັບຮອງເອົາໃນໂອກາດນີ້ ຈະເປັນພື້ນຖານອັນສຳຄັນໃຫ້ແກ່ການຮ່ວມມືໃນຂົງເຂດດັ່ງກ່າວໃນຕໍ່ໜ້າ.
ໃນກອງປະຊຸມຄັ້ງນີ້, ບັນດາຜູ້ນຳອາຊຽນ ແລະ ອົດສະຕຣາລີ ໄດ້ເຫັນດີຮັບຮອງເອົາຖະແຫຼງການຮ່ວມກອງປະຊຸມສຸດຍອດອາຊຽນ-ອົດສະຕຣາລີ ສະໄໝພິເສດ ຫຼື ຖະແຫຼງການຊິດນີ ເພື່ອເປັນທິດເຍືອງທາງໃນການເສີມຂະຫຍາຍການເປັນຄູ່ຮ່ວມຍຸດທະສາດອາຊຽນ-ອົດສະຕຣາລີ ໃນຊຸມປີຕໍ່ໜ້າ.
![](https://blogger.googleusercontent.com/img/b/R29vZ2xl/AVvXsEhGVuxVH40pkaCThmtcFu1zUB3BzdqgyDRpVKBVZZvzP0h26qo2Wsna1X8EjgcEODp7SV_86XgqqS7gRCMCrhCxYuQ_x6M6XsS6BmllFGbgg19XTGDTlunOPw6Y1IboVI7mBOfVi2jaFbH6/s1600/506.jpg)
![](https://blogger.googleusercontent.com/img/b/R29vZ2xl/AVvXsEh1gi-pYYpFZEocZeetCnk32nVBTlq91Fhh8RBFPko5F4rD2e6bswuYBunt5ijqxKI3ETkTeGUGZGxbO50r66RB937C2j7tB_bpkL2VTD9Eqg7HrGpZUc9zGVnMgVLBXdiXeFjk-KSZVx57/s1600/504.jpg)
![](https://blogger.googleusercontent.com/img/b/R29vZ2xl/AVvXsEgolkqljJygfNFT8RxSj1EJ_r8xCva11UgLAGtPRMre1RQg3aJ2SUd64MInMi0FwffZLbd-51U-va3qUCxqAQgo3DhymjiDQoIslX746PSKtVbMlXrcOiUSUlhvC60YLgqdTBssPh3eh6-R/s1600/503.jpg)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ