ຜູ້ນຳເກົາຫຼີເໜືອ ກ່າວເຖິງການພົບປະຫາລືກັບທ່ານ ໂດໂນ ທຣຳ ຜູ້ນຳ ສ.ອາເມຣິກາ ເປັນຄັ້ງທຳອິດ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgS9P52C0Y5birriTp4OuiZMZL1PI85Fog-uaLHT84WfBD6FGjC9wQaTLdK-Ha-0ncyohVFMxLcFxy4MajNZhcSmitTciw6oXd28lxqU4UVz4WXk4Db8049gsz1FvvF-KgpF-X2OXWFOPw/s1600/780.jpg)
ສຳນັກຂ່າວຕ່າງປະເທດລາຍງານ 10 ເມສາ 2018 ໂດຍອ້າງອີງຈາກການລາຍງານຂອງສຳນັກຂ່າວກາງເກົາຫຼີ (KCNA) ວ່າ: ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ແລະ ເລຂາທິການໃຫຍ່ພັກແຮງງານເກົາຫຼີ ເປັນປະທານໃນກອງປະຊຸມຄະນະກຳມະການບໍລິຫານງານສູນກາງພັກ ເມື່ອວັນຈັນທີ່ຜ່ານມາ, ໂດຍທ່ານ ຄິມ ຈອງ-ອຶນ ກ່າວໃນຕອນໜຶ່ງຂອງການສົນທະນາ ສະແດງຄວາມຊົມເຊີຍຕໍ່ສະຖານະການປັດຈຸບັນຢູ່ແຫຼມເກົາຫຼີ ທີ່ກຳລັງພັດທະນາໄປໃນທິດທາງທີ່ດີຂຶ້ນຢ່າງຕໍ່ເນື່ອງ ເຊິ່ງຕົວທ່ານເອງ ກັບ ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ແມ່ນມີກຳນົດໃນການພົບປະຫາລືກັນຢູ່ພື້ນທີ່ຄວາມໝັ້ນຄົງຮ່ວມ ທີ່ເປັນຊາຍແດນລະຫວ່າງສອງປະເທດ ໃນເຂດບ້ານປັນມຸນຈອມ ໃນວັນທີ 27 ເມສາ 2018 ນີ້.
![](https://blogger.googleusercontent.com/img/b/R29vZ2xl/AVvXsEiKwoueUMlrfGJettvzwi6cKoS0ouYUx0xfTQLo91X0Z9JEIrzihWIJoxp6lftcjPLcoTHhMEzHxpbiin6_kt-JkQf_uxSL8uGiqitZOOkZbWDGImnWAjCQCgnrTNG68evR6g_m3-fD3Dw/s1600/782.jpg)
![](https://blogger.googleusercontent.com/img/b/R29vZ2xl/AVvXsEjg8Kf9YQGsrqGyQlp9UF7eJ7KEn0hWnC0JFxBmlTYi6MziHnfZ35erlKqC6xbtBpMncKtL4c7hHDEfqJOv-ppYPP92UTVk61h1eSDN6f5BTd3xbEj4GgJQMi1DZ31V9PguC9jF14Zk7k0/s1600/781.jpg)
ນອກນີ້, ຜູ້ນຳສູງສຸດຂອງລັດຖະບານເກົາຫຼີເໜືອ ຍັງໄດ້ກ່າວເຖິງຄວາມມຸ່ງຫວັງ ຂອງການພົບປະຫາລືກັບທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ເຖິງຈະບໍ່ໄດ້ລົງເລິກໃນລາຍລະອຽດຫຼາຍ ແຕ່ຖືເປັນຄັ້ງທຳອິດຢ່າງເປັນທາງການ ທີ່ທ່ານ ຄິມ ຈອງ-ອຶນກ່າວເຖິງການພົບປະຫາລືຮ່ວມກັບທ່ານ ໂດໂນ ທຣຳ ເຊິ່ງນອກຈາກນັ້ນຍັງຈະຖືເປັນຄັ້ງທຳອິດໃນປະຫວັດສາດອີກດ້ວຍ ທີ່ຜູ້ນຳສະຫະລັດ ອາເມຣິກາ ແລະ ຜູ້ນຳສູງສຸດຂອງເກົາຫຼີເໜືອຈະພົບປະຫາລືກັນຢ່າງເປັນທາງການ.
ໃນດ້ານຂອງທ່ານ ໂດໂນ ທຣຳ ກ່າວໃນລະຫວ່າງການປະຊຸມຄະນະລັດຖະມົນຕີປະຈຳອາທິດ ທີ່ທຳນຽບຂາວ ເມື່ອວັນຈັນທີ່ຜ່ານມາວ່າ: ທ່ານ ວາງແຜນທີ່ຈະຈັດຕັ້ງການພົບປະຫາລືກັບຜູ້ນຳຂອງເກົາຫຼີເໜືອ ພາຍໃນເດືອນພຶດສະນານີ້ ຫຼື ຊ້າສຸດຄືບໍ່ເກີນຕົ້ນເດືອນມິຖຸນາ. ເຖິງຢ່າງໃດກໍ່ຕາມ ຍັງບໍ່ມີຝ່າຍໃດອອກມາສະແດງທ່າທີກ່ຽວກັບໜຶ່ງໃນປັດໄຈສຳຄັນຂອງການພົບປະຫາລືຄັ້ງນີ້ ນັ້ນກໍ່ຄືປະເທດທີ່ຈະຮັບໜ້າທີ່ເປັນຕົວກາງຈັດຕັ້ງກອງປະຊຸມ ຂະນະທີ່ລາຍງານຫຼາຍກະແສຄາດວ່າ ຄວາມເປັນໄປໄດ້ຫຼາຍທີ່ສຸດໜ້າຈະເປັນທີ່ປະເທດຊູແອດ ຫຼື ມົງໂກນ.
![](https://blogger.googleusercontent.com/img/b/R29vZ2xl/AVvXsEghriVSpQ6gspNWak5kVFRJ_Di-xV0BphLC_d-d858235MPmM7APT9aRJNwqb-hgHaiQoRS-juHX95JD5Yx9U68PwMcYWy5viVkbK663NSvyanZtvWPAuN0BamTnrz2opV-ZEfoHcOBq-E/s1600/783.jpg)
ໃນອີກດ້ານໜຶ່ງທ່ານ ຣີ ຢອງ-ໂຮ ລັດຖະມົນຕີກະຊວງການຕ່າງປະເທດເກົາຫຼີເໜືອ ແມ່ນຢູ່ໃນລະຫວ່າງການເດີນທາງຢ້ຽມຢາມນະຄອນຫຼວງມົດສະກູ ຂອງລັດເຊຍ ເພື່ອພົບປະຫາລືກັບທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ໂດຍເມື່ອທ້າຍອາທິດທີ່ຜ່ານມາ ທ່ານ ຣີ ຢອງ-ໂຮ ແມ່ນໄດ້ເດີນທາງຢ້ຽມຢາມນະຄອນຫຼວງປັກກິ່ງ ຂອງຈີນ ແລະ ເຂົ້າພົບກັບທ່ານ ຫວັງ ອີ້ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດຂອງຈີນ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ