ປະຊາຊົນອາຟຣິກາກາງປະທ້ວງບໍ່ພໍໃຈ UN ທີ່ປະທະກັບກຸ່ມ PK5 ຕາຍ 19 ຄົນ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEiC4tEke1IRNIuN5WoHgOHYV0UFshPwCHuNkYZ_Y9289JcEt2nysMo2bx3jdRhASXdRzK1jStrJwK4jksvQTRJV8t-D_wjc0TolfMOO4WQl7gIHl53TOpluLJV3H7MnLHZ3_Vm4Pm2hnd4/s1600/812.jpg)
ສຳນັກຂ່າວຕ່າງປະເທດລາຍງານ 12 ເມສາ 2018 ຈາກນະຄອນຫຼວງບັງກີ ສາທາລະນະລັດ ອາຟຣິກາກາງວ່າ: ເນື່ອງມາຈາກເຫດຄວາມຮຸນແຮງຂອງການປະທະກັນລະຫວ່າງທະຫານຮັກສາສັນຕິພາບຂອງສະຫະປະຊາຊາດໃນນາມ MINUSCA ກັບກຸ່ມທະຫານຮັບຈ້າງ PK5 ໃນເຂດຊຸມຊົນແຫ່ງໜຶ່ງຂອງນະຄອນຫຼວງບັງກີ ເມື່ອຕົ້ນອາທິດນີ້ ເປັນເຫດເຮັດໃຫ້ມີຜູ້ເສຍຊີວິດຢ່າງໜ້ອຍ 19 ຄົນ ໜຶ່ງໃນນັ້ນຄືທະຫານຂອງສະຫະປະຊາຊາດ ແລະ ມີຜູ້ໄດ້ຮັບບາດເຈັບອີກຫຼາຍກວ່າ 40 ຄົນ ແຕ່ຫຼັງຈາກນັ້ນມີປະຊາຊົນຈຳນວນໜຶ່ງອອກມາສະແດງຄວາມບໍ່ພໍໃຈ ຕໍ່ປະຕິບັດການທາງທະຫານຂອງສະຫະປະຊາຊາດ ດ້ວຍການນຳເອົາຮ່າງຂອງຜູ້ເສຍຊີວິດມາວາງປະທ້ວງໜ້າສຳນັກງານຂອງສະຫະປະຊາຊາດ ໃນນະຄອນຫຼວງບັງກີ.
![](https://blogger.googleusercontent.com/img/b/R29vZ2xl/AVvXsEgNhtemUzjPtB0Qj17sp4kSU_dI5Nh_jqg9x-fvXsPrr0IRZDgLezm-Wb0eA811tTlrPWDqKY7E_hJ1cxcLVN_89Yq5UY1JVrlGRlVDDeVfRIH2Ntt3JCZ_lsHYvM8GEAsYfRfmR2skfrw/s1600/815.jpg)
ໃນດ້ານຂອງສະຫະປະຊາຊາດ ແມ່ນໄດ້ອອກຖະແຫຼງການວ່າ ນັ້ນແມ່ນຄວາມບໍ່ຫວັງດີຂອງບາງກຸ່ມຄົນ ໃນການໃຊ້ຮ່າງຂອງຜູ້ເສຍຊີວິດເປັນເຄື່ອງມືໂຄສະນາຊວນເຊື່ອ ປຸກລະດົມວ່າສະຫະປະຊາຊາດຂ້າປະຊາຊົນຜູ້ບໍລິສຸດ ທີ່ໂດຍຄວາມຈິງແລ້ວ, ປະຕິບັດການດັ່ງກ່າວເປັນໄປຕາມການໄດ້ຮັບລາຍງານຈາກປະຊາຊົນ ວ່າມີສະຖານທີ່ທີ່ເປັນແຫຼ່ງສຸມຂອງກຸ່ມ PK5 ໃນການວາງແຜນກໍ່ເຫດຮຸນແຮງ, ນອກນີ້ ໃນລະຫວ່າງການປະທະ ກຸ່ມຄົນຮ້າຍໄດ້ຍິງຕອບໂຕ້ທະຫານຂອງ MINUSCA ຢ່າງໜັກໜ່ວງ.
ເຫດການປະທະກັນດັ່ງກ່າວ, ຖືວ່າຮຸນແຮງທີ່ສຸດຄັ້ງໜຶ່ງ ນັບຕັ້ງແຕ່ MINUSCA ເຂົ້າມາປະຈຳການໃນນະຄອນຫຼວງບັງກີ ເມື່ອເດືອນເມສາ 2014 ເພື່ອປະຕິບັດພາລະກິດຮັກສາສະຖຽນລະພາບໃຫ້ກັບສາທາລະນະລັດ ອາຟຣິກາກາງ ປະເທດທີ່ເປັນອະດີດອານານິຄົມຂອງຝຣັ່ງ ແລະ ຂາດສະຖຽນລະພາບທາງການເມືອງຢ່າງຮ້າຍແຮງ ນັບຕັ້ງແຕ່ເກີດເຫດແນວຮ່ວມກອງກຳລັງຝ່າຍຕໍ່ຕ້ານລັດຖະບານ ເຊິ່ງເປັນຊາວມຸດສະລິມ ໂຄ່ນລົ້ມອຳນາດທ່ານ ປະທານປະເທດ ຟຼອງຊົວ ໂບຊິເຊ ທີ່ນັບຖືສາສະໜາຄຼິສ ເມື່ອປີ 2013 ແລະ ທ່ານ ຟຼອງຊົວ ໂບຊິເຊ ເອງກໍ່ຜູກຂາດອຳນາດການບໍລິການປະເທດມາຍາວນານເຖິງ 1 ທົດສະວັດ.
![](https://blogger.googleusercontent.com/img/b/R29vZ2xl/AVvXsEiVHBjoH8q5SerbCdyuyAQiR7hGSSIPMCEnnShBWWU1T4RyY86ZnvawNupBNTRcAtNKwu5zi2jERzPJYmccJuvPZjIUSWQ7YQNOKwXoZFuYsfxXET8_K7UFT10TtbLkGF7i1Q_DeLbr5N8/s1600/814.jpg)
![](https://blogger.googleusercontent.com/img/b/R29vZ2xl/AVvXsEhGL10tIFen9HSLkAXD_cpEK3ITZBIHZVt1-3qYojw25zAjhPW6r_Piam4fheLH2ncfLZO4Foa9GKefbwNc04GpjZLaXc_TyhdlS3yHusFrzTwsQMZJCI6Jb7eqAIuJbChI7C8Q0ZqBug0/s1600/813.jpg)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ