ເກົາຫຼີເໜືອຍັງພ້ອມເຈລະຈາສະເໝີ ເຖິງແມ່ນວ່າ ສ.ອາເມຣິກາ ຈະປະກາດຍົກເລີກການເຈລະຈາຮ່ວມ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhLOGXv6clkXdxruw3edjWqSmRjWFbqvnxDySPmmGij-sdXl8u1dFpeZMP4Ng3uvlUX666GvmHpek_upY5R1PiJEsdE_FkTUfvExBPYG1qnMtcYUlXGW9EeK04JobSyXkllJkq8g1FhQ18/s1600/1228.jpg)
ສຳນັກຂ່າວຕ່າງປະເທດລາຍງານ 25 ພຶດສະພາ 2018 ວ່າ: ສຳນັກຂ່າວກາງເກົາຫຼີ (KCNA) ເຜີຍແຜ່ຖະແຫຼງການຂອງທ່ານ ຄິມ ຄະເຢ-ກວານ ຮອງລັດຖະມົນຕີກະຊວງການຕ່າງປະເທດເກົາຫຼີເໜືອວ່າ ການຕັດສິນໃຈຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໃນການເປັນຝ່າຍຍົກເລີກການພົບປະຫາລືກັບທ່ານ ຄິມ ຈອງ-ອຶຶນ ຜູ້ນຳສູງສຸດຂອງເກົາຫຼີເໜືອ ເຊິ່ງຈະຈັດຂຶ້ນທີ່ປະເທດສິງກະໂປ ໃນວັນທີ 12 ມິຖຸນາ 2018 ນີ້ ຖືເປັນສິ່ງທີ່ເໜືອຄວາມຄາດໝາຍ ແລະ ໜ້າເສຍໃຈເປັນຢ່າງຍິ່ງ ແຕ່ລັດຖະບານເກົາຫຼີເໜືອ ຍັງຄົງມີຄວາມພ້ອມຕະຫຼອດເວລາ ໃນການເຈລະຈາກັບສະຫະລັດອາເມຣິກາ ຕາມຂະບວນການທາງການທູດ.
ຂະນະທີ່ທຳນຽບປະທານປະເທດເກົາຫຼີໃຕ້ອອກຖະແຫຼງການວ່າ ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ເສຍໃຈເປັນຢ່າງຍິ່ງ ເມື່ອໄດ້ຊາບການປະຊຸມສຸດຍອດລະຫວ່າງຜູ້ນຳສະຫະລັດ ອາເມຣິກາ ແລະ ເກົາຫຼີເໜືອບໍ່ອາດເກີດຂຶ້ນໄດ້ ແລະ ໄດ້ຮຽກປະຊຸມສຸກເສີນໜ່ວຍງານດ້ານຄວາມໝັ້ນຄົງອີກດ້ວຍ.
![](https://blogger.googleusercontent.com/img/b/R29vZ2xl/AVvXsEi3IMAgFRTCiVP23YMFJ_4juUM8dUWtxQ0RVXajhNjiUDEyVIrPCNuMjOMGmCnY86CDeHwdw5-2qjMPgoth55Qzn7zePswQtC6EMWv2zTxorz36PoEgx-4R9iRJnNIHuifW_euKy8ZuLG0/s1600/1229.jpg)
ພຽງບໍ່ພໍເທົ່າໃດຊົ່ວໂມງກ່ອນທີ່ທ່ານ ໂດໂນ ທຣຳ ຈະສົ່ງຈົດໝາຍເຖິງຜູ້ນຳເກົາຫຼີເໜືອ ລັດຖະບານເກົາຫຼີເໜືອໄດ້ມີການລະເບີດທຳລາຍອຸໂມງ ແລະ ສິ່ງກໍ່ສ້າງພາຍໃນນິຄົມນິວເຄຼຍປຸງກະເຢ-ຣີ ໃນພາກຕາເວັນອອກສຽງເໜືອຂອງປະເທດ ທ່າມກາງການຮ່ວມສັງເກດການຢ່າງໃກ້ຊິດຂອງກຸ່ມສື່ມວນຊົນຈາກຕ່າງປະເທດທີ່ປະກອບດ້ວຍ: ສະຫະລັດ ອາເມຣິກາ, ລັດເຊຍ, ຈີນ, ອັງກິດ ແລະ ເກົາຫຼີໃຕ້ ລວມປະມານ 20 ຄົນ ເພື່ອສະແດງເຖິງເຈດຕະນາດີ ຕາມທີ່ເຄີຍປະກາດໄວ້ກ່ອນການປະຊຸມຮ່ວມກັບທ່ານ ໂດໂນ ທຣຳ.
ເຖິງຢ່າງໃດກໍ່ຕາມ, ເສັ້ນທາງສູ່ການພົບປະຫາລືລະຫວ່າງຜູ້ນຳທັງສອງປະເທດດັ່ງກ່າວ ເຕັມໄປດ້ວຍຄວາມບໍ່ແນ່ນອນມາໂດຍຕະຫຼອດ ໂດຍສະເພາະຢ່າງຍິ່ງເມື່ອຮອງປະທານປະເທດສະຫະລັດ ອາເມຣິກາ ທ່ານ ໄມ ເພນ ກ່າວເມື່ອຕົ້ນອາທິດນີ້ ໃນລັກສະນະປຽບທຽບໂຄງການນິວເຄຼຍຂອງເກົາຫຼີເໜືອ ແລະ ຊະຕາກຳຂອງທ່ານ ຄິມ ຈອງ-ອຶນ ກັບ ທ່ານ ມູອຳມາ ກັດດາຟີ ຜູ້ນຳສູງສຸດຂອງລີບີ ເຊິ່ງໄດ້ສ້າງຄວາມບໍ່ພໍໃຈຢ່າງຍິ່ງໃຫ້ແກ່ເກົາຫຼີເໜືອ ເຖິງຂັ້ນອອກຖະແຫຼງການປະນາມຮອງຜູ້ນຳສະຫະລັດ ອາເມຣິກາວ່າ “ໄຮ້ການສຶກສາ ແລະ ໂງ່ຈ້າ”.
![](https://blogger.googleusercontent.com/img/b/R29vZ2xl/AVvXsEgQTrM9rb0Bktq_m30tHbP5nB7AKBk-wqSryjJoBoZ2LhCk1euaRFD0cJe6GbO2YCiPYK9furkKTLZdbN_XZVFFuZuLAHZqK8-Bw-0pwbhmHa13cHW5THJOI59faizwTBDJCxoaoK7JnJQ/s1600/1227.jpg)
ເຊິ່ງເນື້ອໃນສຳຄັນຂອງຈົດໝາຍຜູ້ນຳສະຫະລັດ ອາເມຣິກາລະບຸວ່າ ພຶດຕິກຳອັນແຂງກະດ້າງ ແລະ ຄຸກຄາມຂອງເກົາຫຼີເໜືອໃນໄລຍະນີ້ ຄືປັດໄຈສຳຄັນທີ່ເຮັດໃຫ້ທ່ານຮູ້ສຶກວ່າ ສະຖານະການໃນຕອນນີ້ ຍັງບໍ່ແມ່ນໄລຍະເວລາທີ່ສົມຄວນທີ່ຈະພົບປະຫາລືກັນ, ທ່ານຈຶ່ງຈຳເປັນຕ້ອງຍົກເລີກພົບປະຫາລືທີ່ສິງກະໂປ ແຕ່ຍັງເຊື່ອໝັ້ນວ່າການປະຊຸມຈະເກີດຂຶ້ນໃນອະນາຄົດ, ດ້ານກະຊວງປ້ອງກັນປະເທດສະຫະລັດ ອາເມຣິກາ ອອກຖະແຫຼງການວ່າ ຄວາມພ້ອມທາງທະຫານຕໍ່ເກົາຫຼີເໜືອຍັງຢູ່ໃນຂັ້ນສູງສຸດ, ສ່ວນທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາກ່າວຢືນຢັນວ່າ ສາຍພົວພັນລະຫວ່າງສະຫະລັດ ອາເມຣິກາ ກັບ ເກົາຫຼີເໜືອ ຈະກັບມາເປັນເໜືອນເດີມ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ