ລັດຖະມົນຕີຕ່າງປະເທດ ສ.ອາເມຣິກາ ຢ້ຽມຢາມເກົາຫຼີເໜືອ ເພື່ອກະກຽມຈັດກອງປະຊຸມຜູ້ນຳສອງປະເທດ
ສຳນັກຂ່າວຕ່າງປະເທດລາຍງານເມື່ອວັນທີ 8 ພຶດສະພາ 2018 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວເມື່ອວັນອັງຄານ ທີ່ຜ່ານມາວ່າ: ໄດ້ສົ່ງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ຢ້ຽມຢາມນະຄອນຫຼວງປຽງຢາງ ເຊິ່ງຖືເປັນຄັ້ງທີ່ 2 ຂອງການຢ້ຽມຢາມເກົາຫຼີເໜືອຂອງທ່ານ ໄມ ພອມແພວ ໄລຍະພຽງ 1 ເດືອນກວ່າ, ການການຢ້ຽມຢາມຄັ້ງທຳອິດເກີດຂຶ້ນໃນທ້າຍເດືອນມີນາ 2018 ເຖິງຕົ້ນເດືອນເມສາ ທີ່ຜ່ານມາ ແລະ ໃນຕອນນັ້ນທ່ານ ໄມ ພອມແພວ ຍັງຢູ່ໃນຕຳແໜ່ງຜູ້ອຳນວຍການສຳນັກຂ່າວກອງກາງ (CIA) ຢູ່.
Headed back to #DPRK at the invitation of the North Korean leadership. I look forward to planning a successful summit between President Trump and Kim Jong-un.— Secretary Pompeo (@SecPompeo) May 8, 2018
ຂະນະດຽວກັນທ່ານ ໂດໂນ ທຣຳ ກ່າວວ່າຈະເປັນສິ່ງທີ່ດີຢ່າງຍິ່ງ ຫາກເກົາຫຼີເໜືອມອບອິດສະຫຼະພາບໃຫ້ແກ່ປະຊາຊົນອາເມຣິກາ ເຊື້ອສາຍເກົາຫຼີ 3 ຄົນ ທີ່ຖືກຈັບກຸມ ແລະ ຕັດສິນໂທດໃຫ້ໃຊ້ແຮງງານໜັກເມື່ອ 2 ປີຜ່ານມາ, ແຕ່ທ່ານ ໄມ ພອມແພວ ກ່າວກ່ອນອອກເດີນທາງວ່າ ທ່ານຍັງບໍ່ໄດ້ຮັບແຈ້ງຈາກລັດຖະບານເກົາຫຼີເໜືອ ກ່ຽວກັບສະຖານະຂອງປະຊາຊົນອາເມຣິກາທັງ 3 ຄົນ, ເຖິງຢ່າງໃດກໍ່ຕາມ ທ່ານ ຫວັງເປັນຢ່າງຍິ່ງວ່າເກົາຫຼີເໜືອ ຈະເຮັດໃນສິ່ງທີ່ຖືກຕ້ອງ ເຊິ່ງຈະເປັນການປົວແປງສາຍພົວພັນລະຫວ່າງສອງປະເທດ.
ເຖິງຢ່າງໜຶ່ງ, ການຢ້ຽມຢາມນະຄອນຫຼວງປຽງຢາງຂອງທ່ານ ໄມ ພອມແພວ ເກີດຂຶ້ນໃນເວລາດຽວກັນກັບທີ່ທາງການຈີນໄດ້ເຜີຍແຜ່ຂ່າວວ່າ ທ່ານ ຄິມ ຈອງ-ອຶນ ເດີນທາງດ້ວຍຖ້ຽວບິນພິເສດຂອງເກົາຫຼີເໜືອ ໄປຍັງເມືອງຕ້າຫຼຽນ ມົນທົນຫຼຽວໜິງ ທາງພາກຕາເວັນອອກສຽງເໜືອຂອງຈີນ ເພື່ອພົບປະຫາລືກັບທ່ານ ສີ ຈິ້ນຜິງ ປະທານປະເທດຈີນ ໃນລະຫວ່າງວັນຈັນ ແລະ ວັນອັງຄານ ທີ່ຜ່ານມາ ເຊິ່ງຖືເປັນການເດີນທາງອອກນອກປະເທດໂດຍມີການເປີດເຜີຍທາງເປັນທາງການຄັ້ງທີ 2 ຂອງທ່ານ ຄິມ ຈອງ-ອຶນ ນັບຕັ້ງແຕ່ຂຶ້ນສູ່ຕຳແໜ່ງຜູ້ນຳສູງສຸດຂອງເກົາຫຼີເໜືອຕໍ່ຈາກຜູ້ເປັນພໍ່ ເມື່ອທ້າຍປີ 2011 ແລະ ເປັນການຢ້ຽມຢາມຈີນເປັນຄັ້ງທີ 2 ຕໍ່ຈາກການຢ້ຽມຢາມຄັ້ງທຳອິດ ເມື່ອທ້າຍເດືອນມີນາ ທີ່ຜ່ານມາ.
ສະແດງຄວາມຄິດເຫັນ