ພັກການເມືອງກຳປູເຈຍ ເລີ່ມອອກຫາສຽງເລືອກຕັ້ງທົ່ວໄປ ທີ່ຈະຈັດຂຶ້ນໃນທ້າຍເດືອນນີ້
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEh8cE0128Pv2_gEhh0XYBmDyxGbudCi6p09SFc2XPjFMpjpmzw5xRsTxxF6EUvG3TzqM7MozARgLKHcfSX0N2b1q20HUf4St1i1OQGxxG8XeaMwKs26BZpY6uci8k7kw5FMZi_ZO1kxJPw/s1600/1565.jpg)
ສຳນັກຂ່າວຕ່າງປະເທດລາຍງານເມື່ອວັນທີ 7 ກໍລະກົດ 2018 ວ່າ: ບັນດາພັກການເມືອງໃນກຳປູເຈຍ ເລີ່ມອອກຫາສຽງຢ່າງເປັນທາງການແລ້ວ ສຳລັບການເລືອກຕັ້ງທົ່ວໄປທີ່ຈະຈັດຂຶ້ນໃນວັນອາທິດ 29 ກໍລະກົດນີ້ ເຖິງແມ່ນວ່າການເລືອກຕັ້ງແຫ່ງຊາດໃນຄັ້ງນີ້ຈະມີພັກການເມືອງລົງສະໝັກເລືອກຕັ້ງຫຼາຍກວ່າ 20 ພັກ ໃນການຊິງໄຊ 125 ສຽງໃນສະພາ ແຕ່ພັກການເມືອງຂະໜາດໃຫຍ່ແມ່ນມີພຽງພັກດຽວ ນັ້ນກໍ່ຄືພັກປະຊາຊົນກຳປູເຈຍ ທີ່ນຳໂດຍສົມເດັດ ຮຸນ ເຊນ ນາຍົກລັດຖະມົນຕີຄົນປັດຈຸບັນ ເຊິ່ງຄອງອຳນາດມາຢ່າງຍາວນານກວ່າ 30 ປີ.
![](https://blogger.googleusercontent.com/img/b/R29vZ2xl/AVvXsEiTUSXFYGQ4TLab4XQQAuzKKSFfMwMEP1tUB3xaGpGZU2hMS2-jWMfqjUGKpBY6ZrDY494AX51tIOpVXSG5oYluJMQvpr5DKnEEUVzzxn-Qgb_cbfOPxblZ9nnuJZOV5vZt20vahGa21h4/s1600/1567.jpg)
![](https://blogger.googleusercontent.com/img/b/R29vZ2xl/AVvXsEjwHrI4Q7wpGlBs5d_7Myc7C3LccpZC0KwKpIg-zKW467Ap0d9KgECgSf0dNLDhZwO2-aEJuPYRdXFAxKBvQtBKJJBtx94ngaDJ9HgKa5egb_PL7W0lN6S1gJmnyPRofwgOGX82QKZ38RA/s1600/1566.jpg)
ໃນດ້ານຂອງສົມເດັດ ຮຸນ ເຊນ ອາຍຸ 65 ປີ ກ່າວປາໄສທ່າມກາງກຸ່ມຜູ້ສະໜັບສະໜູນພັກປະຊາຊົນກຳປູເຈຍ ໃນນະຄອນຫຼວງພະນົມເປັນວ່າ ທ່ານສາມາດນຳພາປະເທດຊາດບ້ານເມືອງຜ່ານຜ່າອຸປະສັກ ແລະ ສະຖານະການທີ່ບໍ່ດີຫຼາຍຄັ້ງມາແລ້ວ ເຖິງແມ່ນວ່າຈະມີກຸ່ມຄົນທີ່ບໍ່ຫວັງດີຈາກທັງພາຍໃນ ແລະ ຕ່າງປະເທດທີ່ພະຍາຍາມຂັດຂວາງເສັ້ນທາງແຫ່ງການພັດທະນາຂອງກຳປູເຈຍຫຼາຍປານໃດກໍ່ຕາມ, ເຊິ່ງຜູ້ນຳກຳປູເຈຍຍັງຄົງຫາສຽງດ້ວຍນະໂຍບາຍປະຊານິຍົມເຊັ່ນເດີມ ໂດຍໃນຄັ້ງນີ້ຄືການສ້າງຖະໜົນຫົນທາງ, ສ້າງໂຮງຮຽນ ແລະ ຫຼຸດຄ່າໄຟຟ້າ ແລະ ປິດທ້າຍດ້ວຍຄຳວ່າ “ໄຊຊະນະຂອງພັກປະຊາຊົນກຳປູເຈຍ ຄືໄຊຊະນະຂອງປະຊາຊົນກຳປູເຈຍ”.
ເຖິງຢ່າງໃດກໍ່ຕາມ, ການທີ່ພັກແກນນຳຝ່າຍຄ້ານ ຄືພັກກູ້ຊາດກຳປູເຈຍ ຖືກສານສັ່ງໃຫ້ຍຸບພັກມາຕັ້ງແຕ່ເດືອນພະຈິກ ປີທີ່ຜ່ານມານັ້ນ ໄດ້ກາຍເປັນຄວາມຂັດແຍ່ງລະຫວ່າງລັດຖະບານກຳປູເຈຍ ກັບ ກຸ່ມປະເທດຕາເວັນຕົກ ໂດຍສະເພາະສະຫະລັດ ອາເມຣິກາ ທີ່ເຕືອນວ່າລັດຖະບານສະຫະລັດ ອາເມຣິກາ ອາດບໍ່ຍອມຮັບຜົນການເລືອກຕັ້ງຄັ້ງນີ້ ແລະ ໃນລະຫວ່າງນີ້ກໍ່ໄດ້ຢຸດຕິການຮ່ວມມືຫຼາຍດ້ານກັບໜ່ວຍງານຫຼາຍແຫ່ງຂອງລັດຖະບານກຳປູເຈຍອີກດ້ວຍ.
ຂະນະທີ່, ຄະນະກຳມະການການເລືອກຕັ້ງແຫ່ງຊາດຂອງກຳປູເຈຍ ກໍ່ໄດ້ເຊີນຄະນະຜູ້ສັງເກດການຈາກປະເທດຕ່າງໆ 50,000 ຄົນ ເຂົ້າຮ່ວມສັງເກດການການເລືອກຕັ້ງຄັ້ງນີ້ ທີ່ລວມໄປເຖິງ ຈີນ, ສິງກະໂປ, ມຽນມາ ແລະ ໄທ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ