ກຸ່ມກະບົດຍອມແພ້ ໃນບັ້ນຮົບໂຈມຕີທວງຄືນແຂວງດາຣາ ຈາກກອງທັບຊີຣີ ທີ່ລັດເຊຍສະໜັບສະໜູນ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEiOa4sEgemlQ7d95d5gim5GmKCs0RIZ6ug529tHfkfTlXrb5MgSzXX-o0IZDXgI-aO67t9nMDH8bFra9H2vUkAnOJpndWV2IjqxFU9_Zxez2AHZ6h5us2DczQTwNX2ZeuvrC08WIiRa_fs/s1600/1557.jpg)
ສຳນັກຂ່າວຕ່າງປະເທດລາຍງານ 7 ກໍລະກົດ 2018 ວ່າ: ສຳນັກຂ່າວຊານາ ກະບອກສຽງຂອງລັດຖະບານຊີຣີ ລາຍງານເມື່ອວັນສຸກທີ່ຜ່ານມາວ່າ ຜູ້ແທນເຈລະຈາຂອງລັດຖະບານຊີຣີສາມາດບັນລຸຂໍ້ຕົກລົງ ກັບ ກຸ່ມກໍ່ການຮ້າຍໃນແຂວງດາຣາ ເຊິ່ງຕັ້ງຢູ່ທາງພາກຕາເວັນຕົກສຽງໃຕ້ຂອງຊີຣີ, ຂໍ້ຕົກລົງດັ່ງກ່າວນັ້ນແມ່ນລວມໄປເຖິງການທີ່ກຸ່ມກໍ່ການຮ້າຍທີ່ຫຼົບລີ້ຢູ່ໃນທຸກເມືອງຂອງແຂວງດາຣາ ຈະຕ້ອງສົ່ງມອບອາວຸດໜັກ ແລະ ອາວຸດຂະໜາດກາງໃຫ້ກັບເຈົ້າໜ້າທີ່ຂອງລັດຖະບານຊີຣີ ຫຼັງຈາກນັ້ນສະມາຊິກກຸ່ມກະບົດຄົນໃດທີ່ມີຄວາມຕ້ອງການຢາກອາໄສຢູ່ໃນແຂວງດາຣາຕໍ່ໄປກໍ່ສາມາດເຮັດໄດ້ ແຕ່ຈະມີການອຳນວຍຄວາມສະດວກໃຫ້ກັບຜູ້ທີ່ບໍ່ຕ້ອງການເຊັ່ນກັນ ດ້ວຍການອົບພະຍົບໄປຍັງແຂວງອິດລິບທີ່ຢູ່ທາງພາກຕາເວັນຕົກສຽງເໜືອຂອງປະເທດ ທີ່ຍັງເປັນເຂດອິດທິພົນຂອງຝ່າຍກະບົດ.
![](https://blogger.googleusercontent.com/img/b/R29vZ2xl/AVvXsEi-jhSmZlPDEl9JfsCgHEMR8TNlzPItvXnOeZQbXEHJVe0x-ol0zhLaHLV3yU5XGzOjsUdvDN4hpUyNnsHFHPMhzxXJHiwdvtlocVXMx6xfFwq58s2WpDeYVo3ycfmCBfstajmgJLtWtnw/s1600/1556.jpg)
ຂະນະດຽວກັນມີລາຍງານບັນຍາກາດຢູ່ບໍລິເວນຈຸດຜ່ານແດນນາຊີບ ເຊິ່ງຢູ່ທາງພາກໃຕ້ສຸດຂອງເມືອງດາຣາ ແລະ ເຊື່ອມຈອດກັບພາກເໜືອຂອງຊອກດານີ (ຈໍແດນ) ວ່າມີການສະເຫຼີມສະຫຼອງຂອງທະຫານ ແລະ ປະຊາຊົນໃນພື້ນທີ່ດັ່ງກ່າວ ທີ່ຮວມຕົວກັນເຊີນທຸງຊາດຊີຣີຂຶ້ນສູ່ຍອດເສົາບໍລິເວນດ່ານກວດນາຊີບໄດ້ເປັນຄັ້ງທຳອິດໃນຮອບ 3 ປີ ຫຼື ນັບຕັ້ງແຕ່ກຸ່ມກະບົດເຂົ້າມາຢຶດຄອງພື້ນທີ່ສ່ວນໃຫຍ່ຂອງແຂວງດາຣາ ເມື່ອປີ 2015.
![](https://blogger.googleusercontent.com/img/b/R29vZ2xl/AVvXsEgYWo63d2zVNyUDNR-R_OQ-XLcPzY5_KL8Z5U5Pte3P6ACcA749yuMnd-oGrQPyNO5RwYSaqN9jZmca0BRQF3ywMGEuH4xKsd4jveUPbqkbGi-fhxXVZw-pd1qWQub-jGypYBEPtxYMBQ0/s1600/1558.jpg)
ການເຄື່ອນໄຫວຄັ້ງສຳຄັນດັ່ງກ່າວເກີດຂຶ້ນພາຍຫຼັງທີ່ກອງທັບຊີຣີ ທີ່ໄດ້ຮັບການສະໜັບສະໜູນຈາກປະຕິບັດການໂຈມຕີທາງອາກາດຂອງກອງທັບລັດເຊຍ ເພື່ອເປີດທາງໃຫ້ກັບປະຕິບັດການໂຈມຕີພາກພື້ນດິນໃນແຂວງດາຣາ ເມື່ອວັນທີ 19 ມິຖຸນາ ທີ່ຜ່ານມາ ມີຜູ້ເສຍຊີວິດຈາກການສູ້ຮົບຫຼາຍກວ່າ 100 ຄົນ ແລະ ປະຊາຊົນຫຼາຍກວ່າ 320,000 ຄົນ ຕ້ອງອົບພະຍົບໜີໄພສົງຄາມ ແຕ່ລາຍງານຂອງສຳນັກຂ່າວຊານາຍັງລະບຸອີກວ່າ ປະຊາຊົນໃນແຂວງດາຣາທີ່ປ່ອຍປະບ້ານເຮືອນໄປ ຈະສາມາດເດີນທາງກັບໄດ້ໃນອີກບໍ່ດົນນີ້.
ໃນດ້ານຂອງສະຫະລັດ ອາເມຣິກາ ທີ່ໃຫ້ການສະໜັບສະໜູນກອງກຳລັງຕໍ່ຕ້ານລັດຖະບານຊີຣີ ທີ່ລວມໄປເຖິງກອງທັບປົດປ່ອຍຊີຣີ ຍັງບໍ່ສະແດງທ່າທີຕໍ່ສະຖານະການທີ່ເກີດຂຶ້ນ, ເຊິ່ງການທີ່ກອງທັບຊີຣີສາມາດຢຶດແຂວງດາຣາກັບຄືນໄດ້ສຳເລັດ ຈະຖືເປັນໄຊຊະນະທາງສັນຍາລັກຂອງທ່ານ ບາຊາ ອັນ-ອັສຊາດ ປະທານປະເທດຊີຣີ ໃນສົງຄາມກາງເມືອງຄັ້ງນີ້ ເນື່ອງຈາກເມືອງດາຣາຖືເປັນຈຸດເລີ່ມຕົ້ນຂອງການປະທ້ວງຕໍ່ຕ້ານລັດຖະບານ ທີ່ບານປາຍໄປທົ່ວປະເທດຈົນກາຍເປັນການສູ້ຮົບຢ່າງນອງເລືອດມາຕັ້ງແຕ່ເດືອນມີນາ 2011 ແລະ ແຂວງດາຣາຍັງມີຊາຍແດນເຊື່ອມຈອດກັບຊອກດານີ ໂດຍມີຈຸດຜ່ານແດນນາຊີບເປັນເສັ້ນທາງລຳລຽງສິນຄ້າສາຍສຳຄັນໃນພາກຕາເວັນຕົກ ແລະ ພາກໃຕ້ ແລະ ຍັງຢູ່ໃກ້ກັບພູພຽງໂກລັນ ທີ່ເປັນພື້ນທີ່ຄວາມຂັດແຍ່ງລະຫວ່າຊີຣີ ແລະ ອິດສະຣາແອນອີກດ້ວຍ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ