ລັດຈະສືບສວນເຫດເຂື່ອນແຕກ ຮ່ວມກັບຊ່ຽວຊານຕ່າງປະເທດ ພ້ອມເຊີນຕ່າງປະເທດຮ່ວມສັງເກດການ, ລວມທັງສືບສວນຜູ້ອະນຸມັດການກໍ່ສ້າງ
ຈາກບັນຫາເຂື່ອນເຊປຽນ-ເຊນ້ຳນ້ອຍແຕກ ເມື່ອວັນທີ 23 ກໍລະກົດ 2018 ທີ່ຜ່ານມາ, ອັນໄດ້ສ້າງຄວາມເສຍຫາຍທີ່ໃຫຍ່ຫຼວງ ແລະ ຮ້າຍແຮງທີ່ສຸດໃນຮອບຫຼາຍສິບປີຢູ່ ສປປ.ລາວ ເຮັດໃຫ້ປະຊາຊົນຫຼາຍກວ່າ 7 ພັນຄົນ ໃນ 6 ບ້ານຂອງເມືອງສະໜາມໄຊ ແຂວງອັດຕະປື ໄດ້ຮັບຜົນກະທົບ ແລະ ເຮັດໃຫ້ມີຜູ້ເສຍຊີວິດແລ້ວ 34 ຄົນ ຍັງສູນຫາຍ 100 ຄົນ.
ໂດຍກອງປະຊຸມລັດຖະບານ ສະໄໝວິສາມັນ ປະຈຳເດືອນສິງຫາ 2018 ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ທີ່ມີບັນດາຮອງລັດຖະມົນຕີ ແລະ ສະມາຊິກລັດຖະບານເຂົ້າຮ່ວມ ໃນວັນທີ 6-7 ສິງຫາ 2018 ນີ້, ໄດ້ຕົກລົງແຕ່ງຕັ້ງຄະນະສືບສວນ-ສອບສວນຂຶ້ນ ໂດຍມອບໃຫ້ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ ເປັນຫົວໜ້າຄະນະ.
ຄະນະຮັບຜິດຊອບສືບສວນ-ສອບສວນນີ້ ສາມາດຮັບເອົາການຊ່ວຍເຫຼືອທາງດ້ານການເງິນ, ເຕັກນິກ ແລະ ຊ່ຽວຊານ ຈາກຕ່າງປະເທດທີ່ມີມາດຕະຖານສາກົນມາຊ່ວຍພິສູດ, ກວດກາທາງດ້ານເຕັກນິກ, ຊອກໃຫ້ເຫັນສາເຫດ ທີ່ພາໃຫ້ມີການແຕກຫັກຂອງເຂື່ອນ ແລະ ສາມາດເຊີນຕົວແທນຂອງລັດຖະບານຂອງປະເທດທີ່ມີບໍລິສັດຜູ້ປະກອບການ ແລະ ຂາຮຸ້ນ ທີ່ຈົດທະບຽນຢູ່ມາໃຫ້ຄຳປຶກສາ ຫຼື ສັງເກດການ.
ທັງນີ້ກໍ່ແນ່ໃສ່ໃຫ້ການສືບສວນ-ສອບສວນມີຄຸນນະພາບສູງ, ມີຄວາມໂປ່ງໃສ ແລະ ເປັນທີ່ຍອມຮັບຕໍ່ທັງພາຍໃນ ແລະ ຕ່າງປະເທດ, ພາຍຫຼັງມີຜົນການສືບສວນ-ສອບສວນອອກມາແລ້ວ ຈຶ່ງດຳເນີນການໃນບາດກ້າວຕໍ່ໆໄປ.
ພ້ອມດຽວກັນນັ້ນ, ກອງປະຊຸມ ກໍ່ໄດ້ຕົກລົງແຕ່ງຕັ້ງ ຄະນະກຳມະການລະດັບສູງຂອງລັດຖະບານ ເພື່ອກວດກາເຖິງຄວາມຮັບຜິດຊອບຂອງເຈົ້າໜ້າທີ່ລັດ ທີ່ກ່ຽວຂ້ອງກັບການອະນຸມັດການກໍ່ສ້າງ ຕະຫຼອດເຖິງການເຕືອນໄພລ່ວງໜ້າຕ່າງໆ ທີ່ພົວພັນກັບເລື່ອງທີ່ເກີດຂຶ້ນນີ້ ພາຍໃຕ້ການຊີ້ນຳຂອງທ່ານຮອງນາຍົກລັດຖະມົນຕີ ບຸນທອງ ຈິດມະນີ, ປະທານອົງການກວດກາລັດຖະບານ.
ສະແດງຄວາມຄິດເຫັນ