ປະທານປະເທດ ເດີນທາງເຖິງປັກກິ່ງ ຮ່ວມເວທີປຶກສາຫາລືຂັ້ນສູງສາກົນວ່າດ້ວຍ ໜຶ່ງແລວທາງ ໜຶ່ງເສັ້ນທາງ
ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ.ລາວ ພ້ອມດ້ວຍຄະນະຜູ້ແທນຂັ້ນສູງຂອງລາວ ເດີນທາງເຖິງນະຄອນຫຼວງປັກກິ່ງ ສປ.ຈີນ ແລ້ວໃນມື້ນີ້ (13 ພຶດສະພາ 2017) ເພື່ອເຂົ້າຮ່ວມປະຊຸມເວທີປຶກສາຫາລືຂັ້ນສູງວ່າດ້ວຍການຮ່ວມມືສາກົນ "ໜຶ່ງແລວທາງ ໜຶ່ງເສັ້ນທາງ" ທີ່ຈະຈັດຂຶ້ນໃນລະຫວ່າງວັນທີ 14-15 ພຶດສະພາ 2017 ນີ້ທີ່ນະຄອນຫຼວງປັກກິ່ງ ສປ.ຈີນ.
ເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ໜຶ່ງແລວທາງ ໜຶ່ງເສັ້ນທາງ” ຈະຖືກ ຈັດຂຶ້ນ ເປັນຄັ້ງທຳອິດ ພາຍຫລັງທ່ານ ສີ ຈິນຜິງ ປະທານປະເທດ ແຫ່ງ ສປ.ຈີນ ໄດ້ປະກາດຂໍ້ລິ ເລີ່ມ “ໜຶ່ງແລວທາງ ໜຶ່ງເສັ້ນທາງ” ຂຶ້ນໃນປີ 2013 ຊຶ່ງເປັນໜຶ່ງໃນການຈັດຕັ້ງປະຕິບັດ ນະໂຍບາຍ ການຕ່າງປະເທດ ແລະ ການທູດເສດຖະກິດ ໃຫ້ເຂັ້ມແຂງ ແລະ ໜັກແໜ້ນ ໜຶ່ງແລວທາງ ໜຶ່ງເສັ້ນທາງ ແມ່ນຍຸດທະສາດ ທີ່ຜັນຂະຫຍາຍມາຈາກ ຂໍ້ລິເລີ່ມເສັ້ນທາງສາຍໄໜ, ເຊິ່ງໄດ້ປະຕິບັດແນວຄວາມຄິດ ການຮ່ວມມືແບບສັນຕິພາບ, ເປີດກ້ວາງກາລະໂອກາດ ແລກປ່ຽນຄວາມຮູ້ ແລະ ຕ່າງຝ່າຍຕ່າງໄດ້ຮັບ ຜົນປະໂຫຍດ. ຈຸດປະສົງ ຂອງກອງປະຊຸມຄັ້ງນີ້, ແມ່ນເພື່ອປຶກສາຫາລື ກ່ຽວກັບການຊອກຊ່ອງທາງແກ້ໄຂ ສະພາບເສດຖະກິດຂອງໂລກ ໃນປັດຈຸບັນ ແລະ ວາງແນວທາງເສດຖະກິດ ໃນອະນາຄົດ, ນະໂຍບາຍການເງິນ ແລະ ການພັດທະນາເສດຖະກິດ ແລະ ການເຊື່ອມຈອດກັນ ແລະ ສົ່ງເສີມການເປັນຄູ່ຮ່ວມ ເພື່ອການພັດທະນາ ສ້າງຂະບວນໂລກາພິວັດ ໃຫ້ເປີດກ້ວາງ ແລະ ກວມລວມ ແລະ ແລກປ່ຽນບັນດາ ຂະບວນການວິວັດ ທີ່ເປັນຜົນປະໂຫຍດ ແກ່ທຸກຝ່າຍ.
ໃນໄລຍະການເຂົ້າຮ່ວມ ກອງປະຊຸມ ທ່ານ ບຸນຍັງ ວໍລະຈິດ ຈະເຂົ້າຮ່ວມພິທີເປີດ ເວທີປຶກສາຫາລືຂັ້ນສູງ, ກອງປະຊຸມໂຕະມົນ ຂອງບັນດາທ່ານຜູ້ນໍາ ວ່າດ້ວຍການປະສານສົມທົບ ດ້ານນະໂຍບາຍ ເພື່ອການເປັນຄູ່ຮ່ວມ ທີ່ໃກ້ຊິດກັນຂຶ້ນ ແລະ ວ່າດ້ວຍການຮ່ວມມື ດ້ານການເຊື່ອມຈອດເພື່ອການພັດທະນາ ທີ່ຕິດພັນກັນ ແລະ ເຂົ້າຮ່ວມງານລ້ຽງອາຫານທ່ຽງ ເຮັດວຽກໃນຫົວຂໍ້ “ຄວາມຜູກພັນ ລະຫວ່າງ ປະຊາຊົນ ກັບ ປະຊາຊົນ ທີ່ໃກ້ຊິດສະໜິດແໜ້ນ”
ສະແດງຄວາມຄິດເຫັນ