ອິນເດຍ - ສ.ອາເມຣິກາ ແລະ ຍີ່ປຸ່ນ ຮ່ວມຊ້ອມຮົບທາງທະເລໃນມະຫາສະໝຸດອິນເດຍ ເພື່ອຄານອິດທິພົນຈີນ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhTzbabXNdttJ91-IVY2U0Mw2iJMZ9Zsh4N5Clp1p-s0Roj2BPkugTA2Up_md5cxNnQISKjI8BG8UoKcqOtTm7OHUFxfteevebrANmQsCoy1649VEiav1H5tmDGQnFP_KBA_0ilrQWlWRo/s1600/97.jpg)
ສຳນັກຂ່າວຕ່າງປະເທດລາຍງານ 11 ກໍລະກົດ 2017 ວ່າ: ອິນເດຍເລີ່ມການຊ້ອມຮົບທາງທະເລ "ມາລາບາ 2017" (Malabar 2017) ຮ່ວມກັບສະຫະລັດອາເມຣິກາ ແລະ ຍີ່ປຸ່ນ ໃນທະເລນອກຝັ່ງທາງພາກໃຕ້ຂອງອິນເດຍ ເມື່ອວັນຈັນທີ່ຜ່ານມາ ໂດຍມີເປົ້າໝາຍຍົກລະດັບຄວາມສຳພັນທາງທະຫານ ເພື່ອຕໍ່ຕ້ານອິດທິພົນຂອງຈີນທີ່ກຳລັງແຜ່ຂະຫຍາຍໃນພູມມິພາກ ເຊິ່ງການຊ້ອມຮົບດັ່ງກ່າວເກີດຂຶ້ນໃນຂະນະທີ່ກອງທັບອິນເດຍ ແລະ ກອງທັບຈີນກຳລັງປະເຊີນໜ້າໃນເຂດຄວາມຂັດແຍ່ງທາງຍຸດທະສາດຢູ່ສາຍພູຫິມາໄລ ເຂດແດນຮອຍຕໍ່ລະຫວ່າງອິນເດຍ, ຈີນ ແລະ ພູຖານ.
ອິນເດຍເກີດກໍລະນີຄວາມຂັດແຍ່ງທາງດິນແດນມາຍາວນານກັບຈີນ ທີ່ເປັນປະເທດເພື່ອນບ້ານຂະໜາດໃຫຍ່ ທີ່ຂະຫຍາຍປະຕິບັດການທາງທະເລມາຍັງພູມມິພາກອາຊີໃຕ້ເລື້ອຍໆ.
![](https://blogger.googleusercontent.com/img/b/R29vZ2xl/AVvXsEi1A2mA1TCCun993IBLfXZB5KocEw0cvil4OjhUOQoL6qEBWMB7oPnA1ce1qVsCvN25takmZB0NZUjHTb3Hwcoxp6MJHXT5070J6OHoLun7XbQ0AFhcM4Sa670ehFJaIR8s1Z2RyW-E0eU/s1600/98.jpg)
ຖືເປັນປີທີ 4 ຕິດຕໍ່ກັນທີ່ກອງກຳລັງປ້ອງກັນຕົນເອງທາງທະເລ (MSDF) ຂອງຍີ່ປຸ່ນ ເຂົ້າຮ່ວມການຊ້ອມຮົບດັ່ງກ່າວ, ການຊ້ອມຮົບມາລາບາ ໄດ້ຈັດຂຶ້ນເປັນປະຈຳທຸກປີ ໂດຍກອງທັບເຮືອ ສ.ອາເມຣິກາ ແລະ ກອງທັບເຮືອອິນເດຍ ໃນນ່ານນ້ຳອ່າວເບງກອນ ຕັ້ງແຕ່ປີ 1992 ເປັນຕົ້ນມາ.
ຖະແຫຼງການຂອງກອງທັບເຮືອ ສ.ອາເມຣິກາ ກ່າວວ່າ ມາລາບາເຕີບໃຫຍ່ຂຶ້ນທັງໃນດ້ານຂອບເຂດ ແລະ ຄວາມຊັບຊ້ອນ ໃນໄລຍະຫຼາຍປີທີ່ຜ່ານມາ ເພື່ອໃຫ້ສາມາດຮັບມືກັບໄພຮຸກຮານຮ່ວມກັນດ້ານຄວາມໝັ້ນຄົງທາງທະເລໃນພູມມິພາກອິນເດຍ-ອາຊີ-ປາຊີຟິກ.
![](https://blogger.googleusercontent.com/img/b/R29vZ2xl/AVvXsEjnxALhCp4rAuG_GCeAjG6udDz2Ph-erqpWSC8D1HlA7rW93IpTsipW-tiNYkY2az98XHPPFtQnX59ikFXHK1zlf62GmI9oiX_f14AMC7TaVZi0KWsxHx26bAgROHdb0O6amMaLnEb4DhM/s1600/99.jpg)
ການຊ້ອມຮົບມາລາບາ 2017 ຈະຊ້ອມຈົນເຖິງວັນທີ 17 ກໍລະກົດ 2017 ນີ້, ກອງທັບເຮືອ ສ.ອາເມຣິກາສົ່ງກອງເຮືອ USS Nimitz ເຊິ່ງເປັນເຮືອບັນທຸກຍົນຂະໜາດໃຫຍ່ທີ່ສຸດໃນໂລກໃນປັດຈຸບັນເຂົ້າຮ່ວມ.
ໃນດ້ານຂອງຈີນກໍ່ໄດ້ເດີນໜ້າເພີ່ມລະດັບກິດຈະກຳໃນມະຫາສະໝຸດອິນເດຍ ໃນໄລຍະຫຼາຍປີຫຼ້າສຸດ ລວມເຖິງການສ້າງທ່າເຮືອໃນສີລັງກາ, ບັງກະລາເທດ ແລະ ປາກິດສະຖານ ເຊິ່ງພູມມິພາກນີ້ເປັນສ່ວນສຳຄັນໃນແຜນໂຄງການ "ໜຶ່ງແລວທາງໜຶ່ງເສັ້ນທາງ" ຂອງຈີນ ທີ່ຕ້ອງການຟື້ນຟູເສັ້ນທາງສາຍໄໝການຄ້າສະໄໝບູຮານຂອງຈີນ ເຊິ່ງໄດ້ສ້າງຄວາມບໍ່ສະບາຍໃຈໃຫ້ກັບອິນເດຍ.
![](https://blogger.googleusercontent.com/img/b/R29vZ2xl/AVvXsEiTr-Nssh715mApUelNW4bLRmbE_-p4XVq9hSCKBCD4PzP8kVVM5maZKeY-1aAO1KoDP9weXewALq9S-t9ltoyeIBJwLmAvt-cwg2RkmvyvA_QivRZ80_4N9UoA1KussDseccqq6_JgK4g/s1600/100.jpg)
ການຊ້ອມຮົບມາລາບາ 2017 ເກີດຂຶ້ນທ່າມກາງຄຳປະກາດຂອງທ່ານ ໂດໂນ ທຣຳ ປະທານປະເທດ ສ.ອາເມຣິກາ ທີ່ກ່າວວ່າ ສາຍພົວພັນລະຫວ່າງ ສ.ອາເມຣິກາ ແລະ ອິນເດຍ "ບໍ່ເຄີຍຮັດແໜ້ນເຂັ້ມແຂງເທົ່ານີ້ມາກ່ອນ" ໃນຂະນະທີ່ທ່ານພົບປະກັບທ່ານ ນະເຣນທະຣາ ໂມດີ ນາຍົກລັດຖະມົນຕີຂອງອິນເດຍເປັນຄັ້ງທຳອິດ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ