ອິນໂດເນເຊຍອົບພະຍົບປະຊາຊົນ 100,000 ຄົນໜີພູໄຟລະເບີດ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEiQQjt0Y15z40ILnwZmrw6Tp2VxehUx4PHCa-AYoV00QzlSYqssOiCglGEHLeJj78NVYTtlKP4IjujyNqYmoNNby7ZIYCeTyYuj4AX8WSpqpFJ0mqu72MOxCXLzWQcNP9acGuY-4DRyFzV8/s1600/158.jpg)
ສຳນັກຂ່າວຕ່າງປະເທດລາຍງານ 27 ພະຈິກ 2017 ວ່າ: ທ່ານ ຊູໂຕໂປ ເປີໂວ ນູໂກຼໂຮ ໂຄສົກສຳນັກງານໄພພິບັດແຫ່ງຊາດຂອງອິນໂດເນເຊຍ ຖະແຫຼງວ່າຄຳສັ່ງຂະຫຍາຍລັດສະໝີອັນຕະລາຍບໍລິເວນຮອບພູໄພ "ອາກຸງ" (Agung) ຈາກ 7.5 ກິໂລແມັດ ເປັນ 10 ກິໂລແມັດ ຕາມການຍົກລະດັບເຕືອນໄພຈາກ 3 ເປັນ 4 ຫຼື "ສີແດງ" ເຊິ່ງເປັນຂັ້ນສູງສຸດນັ້ນ ຄອບຄຸມໝູ່ບ້ານ 22 ແຫ່ງຈາກຈຸດສູນກາງຂອງພູໄຟ ແລະ ໝາຍຄວາມວ່າຕ້ອງມີການອົບພະຍົບປະຊາຊົນ 90,000 ຄົນ ເຖິງ 100,000 ຄົນ ອອກຈາກເຂດດັ່ງກ່າວ ໂດຍເຈົ້າໜ້າທີ່ໄດ້ອົບພະຍົບປະຊາຊົນອອກມາແລ້ວ 40,000 ຄົນ ແຕ່ທີ່ເຫຼືອສະໝັກໃຈຍັງບໍ່ຂໍອົບພະຍົບ ເພື່ອລໍຖ້າປະເມີນສະຖານະການອີກໄລຍະໜຶ່ງກ່ອນ ແລະ ມີອີກຈຳນວນບໍ່ໜ້ອຍທີ່ບໍ່ຕ້ອງການປ່ອຍປະບ້ານເຮືອນ ແລະ ໄຮ່ນາ ເຊິ່ງລວມທັງສັດລ້ຽງ ເພາະຄວາມເປັນຫ່ວງ.
![](https://blogger.googleusercontent.com/img/b/R29vZ2xl/AVvXsEgo0tlM-0bHEAVlDI0W2LrpqWox6g00XCgmhKXEw5kMzvxOFyAgtu5L2bzhrrjm2BbQKhXHOOKb-pV7wd6yltOiXRTRFAj4sm4NCwIQPz9H4Ysz7w8_Lb9RdqYw-ZXUmvx4EvP2FgS11hsm/s1600/159.jpg)
ເຖິງຢ່າງໃດກໍ່ຕາມໂຄສົກຂອງສຳນັກງານໄພພິບັດແຫ່ງຊາດກ່າວວ່າ ເຈົ້າໜ້າທີ່ອາດຕ້ອງໃຊ້ມາດຕະການຂັ້ນເດັດຂາດ ໃນການອົບພະຍົບປະຊາຊົນທັງໝົດ ຫາກສະຖານະການຮຸນແຮງເຖິງຂີດສຸດ ດ້ານກະຊວງຄົມມະນາຄົມຂອງອິນໂດເນເຊຍໄດ້ຈັດຫາລົດເມປະມານ 100 ຄົນ ໄປຍັງສະໜາມບິນນານາຊາດງູຣະໄຣ ເພື່ອອົບພະຍົບປະຊາຊົນອອກຈາກສະໜາມບິນ ເຊິ່ງສ່ວນໃຫຍ່ເປັນນັກທ່ອງທ່ຽວຕ່າງປະເທດ ໂດຍລັດຖະບານໄດ້ສັ່ງໃຫ້ປິດສະໜາມບິນຫຼັກຂອງເກາະບາຫຼີ ຢ່າງໜ້ອຍ 24 ຊົ່ວໂມງ ຫຼັງພົບວ່າເຖົ່າຖ່ານຈາກພູໄຟເລີ່ມປົກຄຸມລານແລ່ນ.
ເຊິ່ງການປິດສະໜາມເງິນງູຣະໄຣເປັນເວລາຢ່າງໜ້ອຍ 1 ວັນໄດ້ສົ່ງຜົນກະທົບຕໍ່ຖ້ຽວບິນແລ້ວ 445 ຖ້ຽວທັງເສັ້ນທາງພາຍໃນ ແລະ ຕ່າງປະເທດ ແລະ ຜູ້ໂດຍສານປະມານ 59,000 ຄົນໄດ້ຮັບຜົນກະທົບຈາກໄພພິບັດທາງທຳມະຊາດໃນຄັ້ງນີ້ ໃນເວລາດຽວກັນກະຊວງຄົມມະນາຄົມອິນໂດເນເຊຍໄດ້ປະສານງານກັບສະໜາມບິນ 5 ແຫ່ງ ເຊິ່ງລວມເຖິງສະໜາມບິນຊາງຮີຂອງສິງຄະໂປ ໃນການອຳນວຍຄວາມສະດວກໃຫ້ກັບຖ້ຽວບິນທີ່ຕ້ອງປ່ຽນເສັ້ນທາງແລ້ວ.
ພູໄຟອາກຸງ ເຊິ່ງເປັນໜຶ່ງໃນພູໄຟຫຼາຍກວ່າ 130 ໜ່ວຍໃນອິນໂດເນເຊຍ ກັບມາມີພະລັງ ແລະ ສົ່ງສັນຍານຂອງການລະເບີດເປັນຄັ້ງທຳອິດໃນຮອບ 54 ປີ ເມື່ອທ້າຍເດືອນສິງຫາ ທີ່ຜ່ານມາ ເຊິ່ງເປັນຜົນມາຈາກແຜ່ນດິນໄຫວຂະໜາດຄ່ອຍ ແລະ ປານກາງຫຼາຍຄັ້ງໃນເຂດດັ່ງກ່າວ ຈົນຕ້ອງມີການອົບພະຍົມປະຊາຊົນຫຼາຍກວ່າ 140,000 ຄົນ ແລະ ຈົນເຖິງຕອນນີ້ປະມານ 25,000 ຄົນຍັງບໍ່ສາມາດກັບທີ່ຢູ່ອາໄສໄດ້ ສ່ວນໃຫຍ່ເປັນປະຊາຊົນທີ່ອາໄສຢູ່ບໍລິເວນຕີນພູໄຟ ໂດຍພູໄຟອາກຸງເຄີຍປະເບີດຢ່າງຮຸນແຮງໃນປີ 1963 ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 1,000 ຄົນ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ