ປະຊາຊົນຊິມບຳເວ ອອກມາສະເຫຼີມສະຫຼອງກອງທັບຢຶດອຳນາດ ມູກາເບ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgdV2c2mvM7i7ha9GuQCPMrVDOYTmiiT3odcbNAIVvqp_6UTv9YRTRQHsJr1doIRXDaoge3RU1dENlIuZUjxVZWITpp1ZvTshHx1LQpHCkfV2ftzfdJcRGFAQFfShl3mtSUk37ttLkjXnwO/s1600/853.jpg)
ສຳນັກຂ່າວຕ່າງປະເທດລາຍງານ 19 ພະຈິກ 2017 ວ່າ: ບັນດານາຍພົນທະຫານຂອງຊິມບຳເວ ຍັງຄົງເດີນໜ້າກົດດັນທ່ານ ໂຣເບິດ ມູກາເບ ປະທານປະເທດແຫ່ງຊິມບຳເວ ໃຫ້ລາອອກຈາກຕຳແໜ່ງ ເຊິ່ງໃນວັນອາທິດນີ້ ມີປະຊາຊົນຫຼາຍໝື່ນຄົນພາກັນອອກມາລວມຕົວກັນຕາມເສັ້ນທາງ ເພື່ອສະແດງຄວາມຍິນດີຕໍ່ການທີ່ທະຫານເຂົ້າຢຶດອຳນາດຂອງທ່ານ ມູກາເບ ທີ່ປົກຄອງປະເທດຊິມບຳເວມາຍາວນານເຖິງ 37 ປີ.
![](https://blogger.googleusercontent.com/img/b/R29vZ2xl/AVvXsEjonWDZU_pAZ_IlPFS7vLuWVpwAm7lqlD_E2gM5ghp_jw-3UVVc2KyKQtmquoA0ozRkt8x67dOnXAHtt9GcYcFtfdyRiX5uhUOWspmDqTqCH55n2B_ERv02yPMHWvUU1PuyyCScBTnLXOnu/s1600/852.jpg)
ໂດຍການອອກມາລວມຕົວກັນຕາມເສັ້ນທາງໃນນະຄອນຫຼວງຮາຣາເຮຂອງປະຊາຊົນຊິມບຳເວ ຖືເປັນການລວມຕົວກັນຄັ້ງໃຫຍ່ທີ່ສຸດຄັ້ງໜຶ່ງໃນປະຫວັດສາດຂອງຊິມບຳເວ ນັບຕັ້ງແຕ່ໄດ້ຮັບອິດສະຫຼະພາບເມື່ອປີ 1980 ໂດຍປະຊາຊົນຕ່າງກໍ່ພາກັນໂຫຮ້ອງດ້ວຍຄວາມເບີກບານ ແລະ ຍິນດີທີ່ທ່ານ ມູກາເບ ຖືກທະຫານຢຶດອຳນາດ ແຕ່ເປັນການລວມຕົວກັນແບບສັນຕິ ບໍ່ມີເຫດຮຸນແຮງໃດໆເກີດຂຶ້ນ ໂດຍມີທະຫານຄວບຄຸມ ແລະ ຕິດຕາມຢ່າງໃກ້ຊິດ.
![](https://blogger.googleusercontent.com/img/b/R29vZ2xl/AVvXsEg1AusYXXG01nBgCZ4SdloPI-30jw-QUStQHq9RIwOszXk8-NQ4Qi4OfgW2M4lHzc0q-DkC2N-e1cMvIku3JHfFzT_j2ITfbkXe5ndJiX-JWTWIPbaF3LgPXENAdKArwzpVcqOBMQaKSPJ8/s1600/125.jpg)
ເຊິ່ງທ່ານ ມູກາເບ ຖືກທະຫານຢຶດອຳນາດມາຕັ້ງແຕ່ວັນທີ 15 ພະຈິກ 2017 ທີ່ຜ່ານມາ ແລະ ຖືກກັກບໍລິເວນຢູ່ແຕ່ໃນເຮືອ ພາຍຫຼັງທີ່ທ່ານ ມູກາເບ ສັ່ງປົກທ່ານ ເອັມເມີສັນ ນັນກາກວາ ຮອງປະທານປະເທດອອກຈາກຕຳແໜ່ງ ເພື່ອປູທາງໃຫ້ທ່ານ ນາງ ເກຼສ ພັນລະຍາ ອາຍຸ 52 ປີ ຂຶ້ນມາເປັນຜູ້ນຳຕໍ່ໄປຂອງຊິມບຳເວ ຕໍ່ຈາກຕົນທີ່ເລີ່ມມີບັນຫາສຸຂະພາບບໍ່ດີດ້ວຍໄວອາຍຸ 93 ປີແລ້ວ.
ຂະນະທີ່ມີລາຍງານວ່າ ພັກຊານູ-ພີເອັບ ທີ່ເຄີຍຈົງຮັກພັກດີຕໍ່ທ່ານ ມູກາເບ ມາໂດຍຕະຫຼອດ ຕອນນີ້ສະມາຊິກພັກສ່ວນໃຫຍ່ກໍ່ໄດ້ອອກມາຮຽກຮ້ອງໃຫ້ທ່ານ ມູກາເບ ລົງຈາກຕຳແໜ່ງ ແລະ ໄດ້ມີການກຽມປະຊຸມໃຫຍ່ທີ່ຈະຈັດຂຶ້ນໃນວັນທີ 19 ພະຈິກ ນີ້, ເພື່ອລົງຄວາມເຫັນປົດຕຳແໜ່ງທ່ານ ມູກາເບ, ໂດຍໃນມື້ດຽວກັນທ່ານ ມູກາເບ ກໍ່ໄດ້ພົບປະກັບຜູ້ນຳຂອງກອງທັບ ເພື່ອເຈລະຈາເລື່ອງການລົງຈາກຕຳແໜ່ງຂອງທ່ານ ມູກາເບ.
ເຖິງຢ່າງໃດກໍ່ຕາມມີແຫຼ່ງຂ່າວລາຍງານວ່າ ທ່ານ ມູກາເບ ກຳລັງພະຍາຍາມຕໍ່ລອງເພື່ອເລື່ອນເວລາທີ່ຈະຖືກຂັບໄລ່ອອກນອກປະເທດໃຫ້ຊ້າທີ່ສຸດ ແລະ ຕ້ອງການໃຫ້ແນ່ໃຈວ່າໃນອະນາຄົດ ຕົນ ແລະ ຄອບຄົວຈະໄດ້ຮັບການຄຸ້ມຄອງຄວາມປອດໄພ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ