ຕວັກກີ ຈະຂະຫຍາຍຂອບເຂດປະຕິບັດການປາບປາມ YPG ໃນຊີຣີ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEjr-A9krS6ZQzAtftkxclNt3zox6rsTxEpeqJafJU1bvNEOMOwkS_qq205Z120EGqNyeySNqvQk5Y1pMg-JRGIzfF3ON6Y8d2swV04uWheZHkV2gP0101GorpPr5hRX_rVvjktX2HpBVS57/s1600/300.jpg)
ສຳນັກຂ່າວຕ່າງປະເທດລາຍງານ 28 ມັງກອນ 2018 ວ່າ: ທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ກ່າວເມື່ອວັນສຸກທີ່ຜ່ານມາວ່າ ປະຕິບັດການທາງທະຫານຂອງກອງທັບຕວັກກີທີ່ຊາຍແດນພາກເໜືອຂອງຊີຣີ ພາຍໃຕ້ລະຫັດ "Olive Branch" ທີ່ດຳເນີນການມາຕັ້ງແຕ່ວັນທີ 20 ມັງກອນ 2018 ຈະເດີນໜ້າຕໍ່ໄປຈົນກວ່າຈະບັນລຸເປົ້າໝາຍ ໂດຍນອກເໜືອຈາກພາລະກິດໃນເມືອງອາຟຣິນແລ້ວ ຈະມີການຂະຫຍາຍຂອບເຂດອອກໄປຍັງເມືອງມາບິນ ທີ່ຢູ່ທາງພາກຕາເວັນອອກອງແມ່ນ້ຳຢູເຟຼຕິສ ແລະ ອາດໄປໄກເຖິງອານາເຂດຕາມແນວຊາຍແດນທີ່ຕິດກັບອິຣັກ ທີ່ຢູ່ທາງພາກຕາເວັນອອກສຽງໃຕ້ ເພື່ອສ້າງຄວາມເຊື່ອໝັ້ນໃຫ້ແກ່ທຸກຝ່າຍວ່າ ຈະບໍ່ມີກຸ່ມກໍ່ການຮ້າຍ ຫຼົງເຫຼືອຢູ່ໃນບໍລິເວນນີ້ຕໍ່ໄປ.
![](https://blogger.googleusercontent.com/img/b/R29vZ2xl/AVvXsEg4_36ZgGrl7qtn2TLr3eoKA4-E0eWr9r4lcBKEi-lnVwaM7p8zGyPglsNwBocNXPcapdLToRwFDHk5wao27ttTslA1kuyLzgCyHCynLCC2faVpmPQZ-lW8x0mrd_uX50heKozra-giOHDk/s1600/301.jpg)
ຂະນະດຽວກັນ, ຜູ້ນຳຕວັກກີຍັງໄດ້ປະນາມສະຫະລັດ ອາເມຣິກາວ່າ ຜິດຄຳໝັ້ນສັນຍາ ທີ່ຍັງຄົງໃຫ້ການສະໜັບສະໜູນດ້ານອາວຸດໃຫ້ແກ່ກອງກຳລັງປະຊາທິປະໄຕຊີຣີ (SDF) ທີ່ສະມາຊິກສ່ວນໃຫຍ່ຄືກອງກຳລັງປ້ອງກັນຕົນເອງຊາວເຄິດ (YPG) ທີ່ລັດຖະບານຕວັກກີຖືວ່າ ເປັນກຸ່ມດຽວກັນກັບກອງກຳລັງຂອງພັກແຮງງານເຄີດິດສະຖານ (PKK) ທີ່ສູ້ຮົບແບບກອງໂຈນກັບກອງທັບຕວັກກີມາຍາວນານກວ່າ 30 ປີ ເພື່ອແບ່ງແຍກດິນແດນບາງສ່ວນຢູ່ພາກໃຕ້ຂອງຕວັກກີ ແລະ ທ່ານ ເຣເຊບ ເທຢິບ ເອີໂດກັນ ຍັງສະແດງຄວາມບໍ່ພໍໃຈຢ່າງຍິງ ຕໍ່ການທີ່ສະຫະລັດ ອາເມຣິກາມີແຜນຈັດຕັ້ງກອງກຳລັງຄວາມໝັ້ນຄົງ ຕາມແນວຊາຍແດນ ທີ່ສະມາຊິກສ່ວນໃຫຍ່ຈາກທັງໝົດ 30,000 ຄົນຈະມາຈາກ YPG.
![](https://blogger.googleusercontent.com/img/b/R29vZ2xl/AVvXsEj86-O0jnM2mO9UlakrgL_IZ6AWlKPeFrIYZIbv5v_kOr6-8aFG9ywPopyBAFwQ3Qw2hsHWx7v0KOrmpddc6jp3LiAiUjVsEs_VMb_DLq3Q45rZvLR2dSeS270wA1Bvomy2TtHVHfTBJ0Th/s1600/302.jpg)
ໃນດ້ານຂອງກອງທັບຕວັກກີມີລາຍງານວ່າ ສາມາດຂ້າສະມາຊິກກຸ່ມຕິດອາວຸດໄດ້ຢ່າງໜ້ອຍ 343 ຄົນ ໃນຮອບອາທິດທຳອິດຂອງປະຕິບັດການ ໃນຂະນະດຽວກັນ ທະຫານຕວັກກີກໍ່ເສຍຊີວິດແລ້ວ 3 ຄົນ ທີ່ບໍ່ລວມສະມາຊິກກອງທັບປົດປ່ອຍຊີຣີ (FSA) ທີ່ລັດຖະບານຕວັກກີໃຫ້ການສະໜັບສະໜູນອີກຢ່າງໜ້ອຍ 11 ຄົນ ແລະ ມີຜູ້ໄດ້ຮັບບາດເຈັບອີກ 130 ຄົນ ແຕ່ປະຕິເສດທີ່ຈະເປີດເຜີຍວ່າ ມີປະຊາຊົນລວມຢູ່ນຳຫຼືບໍ່ ສ່ວນລາຍງານຂອງ SDF ກ່າວອ້າງວ່າສາມາດຂ້າກອງກຳລັງຂອງຝ່າຍຕວັກກີໄດ້ຢ່າງໜ້ອຍ 308 ຄົນ ໂດຍບໍ່ໄດ້ຈຳແນກວ່າເປັນທະຫານຕວັກກີ ແລະ ນັບຮົບ FSA ຝ່າຍລະຈັກຄົນ.
ຂະນະທີ່ສະຫະລັດ ອາເມຣິກາ ໄດ້ອອກມາເຕືອນເປັນໄລຍະໆວ່າ ປະຕິບັດການທາງທະຫານຂອງຕວັກກີໃນຄັ້ງນີ້ ມີຄວາມສ່ຽງຈະເຮັດໃຫ້ເກີດການປະທະລະຫວ່າງກອງທັບຕວັກກີ ກັບເຈົ້າໜ້າທີ່ຂອງສະຫະລັດ ອາເມຣິກາ ທີ່ກຳລັງປະຕິບັດການຢູ່ໃນຊີຣີປະມານ 2,000 ຄົນ ສ່ວນໃຫຍ່ແມ່ນປັກຫຼັກຢູ່ໃນພາກເໜືອຂອງປະເທດຊີຣີ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ