ປ.ທຣຳ ກ່າວມາດຕະການຂວໍ້າບາດເກົາຫຼີເໜືອຮອບໃໝ່ນີ້ ຖືເປັນຄັ້ງຍິ່ງໃຫຍ່ ແລະ ຮຸນແຮງທີ່ສຸດ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEh0bYylXDI5w6WYgcmWufSpunxQcFI4S4jKY4ZyUbZIkbrUL7QxBnMxTq4ZVI9FUpAvwIjwiI8hDCKrRRzyfbeIvYj_PygnB7ICd2D4t3SJUFvd3yEDeWsN13QRpMQC4l_Df1FJMpYdRrm2/s1600/134.jpg)
ສຳນັກຂ່າວຕ່າງປະເທດລາຍງານ 24 ກຸມພາ 2018 ວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວຕໍ່ກອງປະຊຸມສະຫະພາບອະນຸລັກນິຍົມອາເມຣິກາ (CPAC) ໃນລັດແມຣີແລນ ເມື່ອວັນສຸກ (23 ກຸມພາ) ທີ່ຜ່ານມາວ່າ: ສະຫະລັດ ອາເມຣິກາໄດ້ອອກມາດຕະການຂວໍ້າບາດເກົາຫຼີເໜືອຮອບໃໝ່ ເພື່ອເພີ່ມແຮງກົດດັນໃຫ້ລັດຖະບານເກົາຫຼີເໜືອຍອມຢຸດຕິໂຄງການນິວເຄຼຍ ໂດຍຍັງກ່າວອີກວ່າ ມາດຕະການຄັ້ງນີ້ ຍິ່ງໃຫຍ່ ແລະ ຮຸນແຮງທີ່ສຸດ ພ້ອມທັງກ່າວວ່າ ຫາກມາດຕະການຂວໍ້າບາດຍັງບໍ່ໄດ້ຜົນ ລັດຖະບານສະຫະລັດ ອາເມຣິກາ ຈະດຳເນີນການຂັ້ນຕໍ່ໄປແຕ່ບໍ່ໄດ້ລົງເລິກລາຍລະອຽດວ່າແມ່ນຫຍັງ.
ຄຳຖະແຫຼງດັ່ງກ່າວຂອງທ່ານ ໂດໂນ ທຣຳ ເກີດຂຶ້ນໃນເວລາດຽວກັນກັບກະຊວງການເງິນຂອງສະຫະລັດ ອາເມຣິກາ ປະກາດຂຶ້ນບັນຊີດຳທ່ານ ຈາງ ຫຍົງ ຫຍວນ ສັນຊາດໄຕ້ຫວັນ ແລະ ບໍລິສັດສອງແຫ່ງຂອງທ່ານ ຈາງ ເຊິ່ງເຮັດໜ້າທີ່ປະສານງານເລື່ອງການສົ່ງອອກຖ່ານຫິນຂອງເກົາຫຼີເໜືອ ກັບນາຍໜ້າຊາວເກົາຫຼີເໜືອລາຍໜຶ່ງທີ່ພັກອາໄສຢູ່ລັດເຊຍ ທີ່ມີໄດ້ພະຍາຍາມສ້າງຂໍ້ຕົກລົງຊື້ຂາຍນ້ຳມັນມູນຄ່າ 1 ລ້ານໂດລາສະຫະລັດ ລະຫວ່າງບໍລິສັດລັດເຊຍທີ່ຢູ່ໃນບັນຊີດຳຂອງລັດຖະບານສະຫະລັດ ອາເມຣິກາ ກັບຜູ້ປະກອບການໃນເກົາຫຼີເໜືອ.
![](https://blogger.googleusercontent.com/img/b/R29vZ2xl/AVvXsEgS32thTuDvr3xF4XZpUgbmCcZ_mZTQxsnUNd2jUAuNSaK-lrhaTDiRJ3MdnzyUD8NbJT7omjDaiGBappKHMkQskI1J6iVIVWiTJVme-GN2e9TOhZ0xngQ_2bMVtt9E4R8SVtg50AQd3Ha2/s1600/135.jpg)
ຂະນະດຽວກັນ, ຖະແຫຼງການຂອງກະຊວງການເງິນ ໃນນະຄອນຫຼວງວໍຊິງຕັນ ຍັງໄດ້ຫ້າມພົນລະເມືອງຂອງສະຫະລັດ ອາເມຣິກາ ເຮັດທຸລະກິດຮ່ວມກັບບໍລິສັດຂົນສົ່ງ 19 ແຫ່ງຈາກຈີນ, ຮົງກົງ, ສິງກະໂປ ແລະ ປານາມາ, ບໍລິສັດຂົນສົ່ງສັນຊາດເກົາຫຼີເໜືອອີກ 16 ແຫ່ງ ແລະ ການຫ້າມເຮືອບັນທຸກສິນຄ້າ 28 ລຳເຂົ້າທຽບທ່າ ໃນຈຳນວນນີ້ 19 ລຳເປັນເຮືອຕິດທຸງຊາດເກົາຫຼີເໜືອ ເຊິ່ງທ່ານ ສະຕີບ ມະນູຊິນ ລັດຖະມົນຕີກະຊວງການເງິນສະຫະລັດ ອາເມຣິກາ ກ່າວວ່າມາດຕະການຄັ້ງຫຼ້າສຸດຈະຄວບຄຸມເຮືອບັນທຸກສິນຄ້າທັງໝົດທີ່ເກົາຫຼີເໜືອໃຊ້ຢູ່ນຕອນນີ້.
ນອກຈາກນີ້, ສຳນັກງານຄະນະຜູ້ແທນຖາວອນຂອງສະຫະປະຊາຊາດ ໄດ້ຍື່ນໜັງສືຕໍ່ຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ໃຫ້ມີການຂຶ້ນບັນຊີດຳໜ່ວຍງານທັງພາກລັດ ແລະ ເອກະຊົນຂອງເກົາຫຼີເໜືອ ທີ່ພົວພັນກັບກິດຈະກຳການເດີນເຮືອທີ່ຜິດກົດໝາຍ ໂດຍຍັງບໍ່ມີການເປີດເຜີຍລາຍລະອຽດ, ເຖິງຢ່າງໃດກໍ່ຕາມ ມະຕິຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດວ່າດ້ວຍການຂວໍ້າບາດລັດຖະບານເກົາຫຼີເໜືອ ຈຳເປັນຕ້ອງໄດ້ຮັບຄວາມເຫັນດີຈາກສະມາຊິກທັງ 15 ປະເທດ ທີ່ລວມທັງຈີນ ແລະ ລັດເຊຍ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ