ທູດພິເສດເກົາຫຼີໃຕ້ ເຂົ້າພົບທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhGb_ErytPFh_McXougu9zBER17ZNzC-5tN0sPDWHluntDgiwhge9zeiwi6A9dYro2677r5lIQl1Wy7cvDbzb86fTtq7kpLRROSw4xo_fklkWEMU-Fll28X94ZIHeXTvNMIAnQ7G-virxMz/s1600/340.jpeg)
ສຳນັກຂ່າວ KCNA ຂອງທາງການເກົາຫຼີເໜືອລາຍງານ 6 ມີນາ 2018 ວ່າ: ທ່ານ ຄິມ ຈອງ-ອຶນ ຜູ້ນຳສູງສຸດຂອງປະເທດເກົາຫຼີເໜືອ ໄດ້ໃຫ້ການຕ້ອນຮັບຄະນະຜູ້ແທນລະດັບສູງຂອງເກົາຫຼີໃຕ້ ທີ່ທຳນຽບໃນນະຄອນຫຼວງປຽງຢາງ ເມື່ອວັນຈັນ (5 ມີນາ) ທີ່ຜ່ານມາ, ໂດຍລັດຖະບານເກົາຫຼີໃຕ້ໄດ້ສົ່ງຜູ້ແທນຢ້ຽມຢາມເກົາຫຼີເໜືອ 10 ທ່ານ, ນຳໂດຍທ່ານ ຊູ ຮຸນ ຜູ້ອຳນວຍການສຳນັກຂ່າວກອງແຫ່ງຊາດເກົາຫຼີໃຕ້ ແລະ ທ່ານ ຊອນ ອວີ-ຢອງ ທີ່ປຶກສາດ້ານຄວາມໝັ້ນຄົງປະຈຳທຳນຽບປະທານປະເທດເກົາຫຼີໃຕ້.
![](https://blogger.googleusercontent.com/img/b/R29vZ2xl/AVvXsEhwJUuJX0BmOJx_WE4wOCimkXcbndzJQy2B4L4FkHHoXOKSmq_5a4i4Dkc1CNw9Xm-4p8K53rkjpKubF-AID2FPkP6Tog9Z-Loc5gn7uSYvkbTDzIkaVSIgNwMDRHK_Ywp9DvILdO4Y7xmw/s1600/336.jpeg)
ລາຍງານຂອງ KCNA ລະບຸວ່າ: ຜູ້ນຳສູງສຸດຂອງເກົາຫຼີເໜືອມີຄວາມຍິນດີເປັນຢ່າງຍິ່ງ ເມື່ອໄດ້ຮັບຊາບຂໍ້ມູນຈາກຜູ້ແທນຂອງເກົາຫຼີໃຕ້ວ່າ ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ມີຄວາມມຸ່ງໝັ້ນໃນການເຈລະຈາສອງຝ່າຍລະຫວ່າງສອງເກົາຫຼີ ເພື່ອຜ່ອນຄາຍບັນຍາກາດຄວາມເຄັ່ງຕຶງຢູ່ແຫຼມເກົາຫຼີ, ຂະນະດຽວກັນທ່ານ ຄິມ ຈອງ-ອຶນ ແລະ ຄະນະຜູ້ແທນຂອງລັດຖະບນເກົາຫຼີໃຕ້ຍັງໄດ້ແລກປ່ຽນຄວາມຄິດຄວາມເຫັນໃນລວງເລິກໃນຫຼາຍບັນຫາ ທີ່ລວມເຖິງການຜ່ອນຄາຍຄວາມເຄັ່ງຕຶງທາງທະຫານ ແລະ ການສົ່ງເສີມການແລກປ່ຽນ ລວມໄປເຖິງການເພີ່ມພູນການຮ່ວມມືໃນຫຼາຍດ້ານ ເພື່ອນຳໄປສູ່ຄວາມສາມັກຄີປອງດອງໃນໄລຍະຍາວ, ໂດຍທ່ານ ຄິມ ຈອງ-ອຶນ ແລະ ທ່ານ ນາງ ຣີ ຊອນ-ຈູ ພັນລະຍາ ຍັງເປັນເຈົ້າພາບລ້ຽງອາຫານຄ່ຳແກ່ຄະນະຜູ້ແທນຈາກເກົາຫຼີໃຕ້ ດ້ວຍບັນຍາກາດອັນອົບອຸ່ນ ແລະ ແບບມິດຕະພາບທີ່ໃກ້ຊິດ.
![](https://blogger.googleusercontent.com/img/b/R29vZ2xl/AVvXsEiK49xVhqAPsTWsGzR2h0ckFQEW73bdifL8cipR18JnW-QXw0U2VDZGbAFXANpYTyWnbZrYAuNofetPTRBbw-l1qDg0-h2yghCqpq0WRacASFewgfkMu7RaGR1ZMD2BKp6tmr50kKB7TX8z/s1600/337.jpeg)
ຂໍ້ມູນຂອງສຳນັກຂ່າວ KCNA ສອດຄ່ອງກັບການເປີດເຜີຍຂອງທຳນຽບປະທານປະເທດເກົາຫຼີໃຕ້ທີ່ວ່າ ການພົບປະຫາລືທີ່ເກີດຂຶ້ນຖືເປັນການເພີ່ມພູນຄວາມໃກ້ຊິດລະຫວ່າງສອງປະເທດ ທີ່ເພີ່ມທະວີຮັດແໜ້ນຢ່າງຊັດເຈນ ນັບຕັ້ງແຕ່ການແຂ່ງຂັນໂອລິມປິກລະດູໜາວ ທີ່ເມືອງປຽງຊາງ ຂອງເກົາຫຼີໃຕ້ ເມື່ອເດືອນກຸມພາ ທີ່ຜ່ານມາ, ໂດຍທ່ານ ນາງ ຄິມ ໂຢ-ຈອງ ນ້ອງສາວຂອງທ່ານ ຄິມ ຈອງ-ອຶນ ໄດ້ສ້າງປະຫວັດສາດເປັນສະມາຊິກສາຍຕັ້ງຄົນທຳອິດຂອງຕະກູນຄິມ ທີ່ຢ້ຽມຢາມເກົາຫຼີໃຕ້ ແລະ ໄດ້ນຳເອົາສານຂອງຜູ້ເປັນອ້າຍ ໃນການເຊື້ອເຊີນທ່ານ ມູນ ແຈ-ອິນ ໃຫ້ເດີນທາງຢ້ຽມຢາມນະຄອນຫຼວງປຽງຢາງ ມອບໃຫ້ແກ້ຜູ້ນຳເກົາຫຼີໃຕ້ດ້ວຍຕົວເອງ.
![](https://blogger.googleusercontent.com/img/b/R29vZ2xl/AVvXsEgvLB2A-N08VMhe1KCZufSvpGhV0rpcJO71v428DW40iSEKK6sD19-utA1cTtT5umoyPvYUfP-md2Wp0PNxs2qq5HvE2vwxgHGZjHvtcGRITNEgV-H7bQG8ebGGHBw2DewohMKKYsNZvaQk/s1600/339.jpeg)
![](https://blogger.googleusercontent.com/img/b/R29vZ2xl/AVvXsEjyJ8WfIKmC-OBswB6XtWIXps9mbxmbpTZahau8sU20OhDuDuvdOMzwW6DhfogdGkTy0bFzG116I5embHvCAY4tsxKk8WMGpIfNe0e7QNPuxEQOJw-y3NovvHW7giVrMa55k55iUYMPnxNB/s1600/338.jpeg)
ນອກຈາກນີ້, ຍັງຖືເປັນຄັ້ງທຳອິດທີ່ທ່ານ ຄິມ ຈອງ-ອຶນ ພົບປະຫາລືກັບເຈົ້າໜ້າທີ່ລະດັບສູງຂອງເກົາຫຼີໃຕ້ ນັບຕັ້ງແຕ່ຂຶ້ນສູ່ອຳນາດເມື່ອທ້າຍປີ 2011 ແລະ ຖືເປັນຄັ້ງທຳອິດໃນຮອບ 1 ທົດສະວັດ ທີ່ລັດຖບານເກົາຫຼີໃຕ້ສົ່ງເຈົ້າໜ້າທີ່ລະດັບສູງຢ້ຽມຢາມນະຄອນຫຼວງປຽງຢາງ ນັບຕັ້ງແຕ່ສະໄໝການເປັນປະທານປະເທດເກົາຫຼີໃຕ້ຂອງທ່ານ ລີ ມະຢອງ-ບັກ ທີ່ໄດ້ສົ່ງຜູ້ອຳນວຍການສຳນັກຂ່າວກອງແຫ່ງຊາດເກົາຫຼີໃຕ້ ຢ້ຽມຢາມເກົາຫຼີເໜືອ ເມື່ອປີ 2007.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ