ຈີນຄວບຄຸມອາຟຣິກາ ຈົນກາຍເປັນເມືອງຂຶ້ນທາງເສດຖະກິດ, ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວ
ສຳນັກຂ່າວຕ່າງປະເທດລາຍງານ 9 ມີນາ 2018 ວ່າ: ທ່ານ ເຣັກ ທິວເລີສັນ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວເຖິງການຮ່ວມມືລະຫວ່າງຈີນກັບຫຼາຍປະເທດໃນອາຟຣິກາວ່າ ຄືການໃຊ້ອິດທິພົນທາງເສດຖະກິດຄວບຄຸມຝ່າຍກົງຂ້າມ ໃຫ້ຢູ່ໃນສະຖານະທີ່ບໍ່ແຕກຕ່າງໄປຈາກເມືອງຂຶ້ນ.
ໂດຍທ່ານ ເຣັກ ທິວເລີສັນ ໄດ້ກ່າວເມື່ອວັນທີ 6 ມີນາ 2018 ທີ່ຜ່ານມາ ຂະນະທີ່ເດີນທາງຢ້ຽມຢາມບັນດາປະເທດໃນທະວີບອາຟຣິກາເປັນເວລາ 1 ອາທິດໄດ້ແກ່: ປະເທດຊາດ, ຈິບູຕີ, ເອທິໂອປີ, ເຄັນຍາ ແລະ ນີເຊຣີ ວ່າ: ລັດຖະບານສະຫະລັດມີຄວາມກະຕືລືລົ້ນທີ່ຈະຍົກສູງສາຍພົວພັນກັບອາຟຣິກາໃນຫຼາຍດ້ານ ໂດຍສະເພາະການຫຼຸດກຳແພງພາສີການຄ້າ ແລະ ການເພີ່ມການລົງທຶນ ເພື່ອເປັນຂົວຕໍ່ລະຫວ່າງສອງພູມມິພາກ.
ຂະນະດຽວກັນ, ທ່ານ ເຣັກ ທິວເລີສັນໄດ້ກ່າວເຖິງແຜນການຈັດສັນງົບປະມານຊ່ວຍເຫຼືອດ້ານມະນຸດ ແລະ ການພັດທະນາຫ່ວງໃໝ່ໃຫ້ແກ່ທະວີບອາຟຣິກາ ມູນຄ່າ 533 ລ້ານໂດລາສະຫະລັດ ພ້ອມທັງກ່າວເຖິງແນວທາງສົ່ງເສີມການຮ່ວມມືລະຫວ່າງສະຫະລັດ ອາເມຣິກາ ກັບ ອາຟຣິກາທັງໃນດ້ານການຕໍ່ຕ້ານການກໍ່ການຮ້າຍ, ການສົ່ງເສີມປະຊາທິປະໄຕ, ການຄ້າ ແລະ ການລົງທຶນ ເຊິ່ງເປັນກົນໄກສຳຄັນໃນການຂັບເຄື່ອນເພື່ອພັດທະນາອາຟຣິກາ.
Secretary Tillerson at @GeorgeMasonU: The United States pursues sustainable growth that bolsters institutions, strengthens rule of law, and builds the capacity of African countries. This stands in stark contrast to #China’s approach, which encourages dependency. #SecStateinAfrica pic.twitter.com/AUfzC0QBwr— Department of State (@StateDept) March 6, 2018
ຕໍ່ມາທ່ານ ເກິ່ງ ສ່ວງ ໂຄສົກກະຊວງການຕ່າງປະເທດຂອງຈີນກ່າວວ່າ ພາລະໜີ້ສິນຂອງແຕ່ລະປະເທດໃນອາຟຣິກາ ເປັນຜົນຈາກຄວາມຜິດພາດດ້ານນະໂຍບາຍການພັດທະນາຂອງປະເທດນັ້ນໆ ທີ່ສົ່ງຜົນໃຫ້ປະລິມານໜີ້ສິນເພີ່ມພູນຂຶ້ນ ເຊິ່ງລັດຖະບານຈີນໄດ້ດຳເນີນການຊ່ວຍເຫຼືອຜ່ານໂຄງການລົງທຶນ ແລະ ການພັດທະນາ ເພື່ອສົ່ງເສີມຄວາມສາມາດດ້ານການພັດທະນາຂອງອາຟຣິກາໃນໄລຍະຍາວແບບຍືນຍົງ.
ສະແດງຄວາມຄິດເຫັນ