ແຈ້ງເຕືອນ...! ພາຍຸລະດູຮ້ອນ ໃນວັນທີ 5-7 ເມສາ 2018 ນີ້
ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນ ພາຍຸລະດູຮ້ອນ ສະບັບເລກທີ 0366/ກອຕທ ລົງວັນທີ 4 ເມສາ 2018 ວ່າ: ເນື່ອງຈາກມວນອາກາດເຢັນທີ່ມີກຳລັງແຮງປານກາງຈາກປະເທດຈີນ ຈະແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວໃນອີກເທື່ອໃໝ່ ໃນໄລຍະໜຶ່ງອາທິດຕໍ່ໜ້ານີ້ ເຊິ່ງໄລຍະວັນທີ 5-6 ເມສາ 2018 ຈະມີແລວປະທະຂອງມວນອາກາດຮ້ອນ ແລະ ມວນອາກາດເຢັນ ທີ່ຈະເຮັດໃຫ້ເກີດມີພາຍຸລະດູຮ້ອນຢູ່ບາງທ້ອງຖິ່ນແຂວງພາກເໜືອ ແລະ ພາກກາງ ໃນວັນທີ 5-7 ເມສາ 2018 ໂດຍຈະມີຝົນຕົກຟ້າຮ້ອງຟ້າເຫຼື້ອມ, ຟ້າຜ່າ, ໝາກເຫັບຕົກ ແລະ ມີລົມພັດແຮງ.
ດັ່ງນັ້ນ, ຈຶ່ງແຈ້ງເຖິງອຳນາດການປົກຄອງທຸກພາກສ່ວນ ແລະ ພໍ່ແມ່ປະຊາຊົນ ທີ່ອາໄສຢູ່ບັນດາແຂວງຜົ້ງສາລີ, ຫົວພັນ, ຊຽງຂວາງ, ໄຊສົມບູນ, ບໍ່ແກ້ວ, ຫຼວງນ້ຳທາ, ອຸດົມໄຊ, ຫຼວງພະບາງ, ໄຊຍະບູລີ, ນະຄອນຫຼວງວຽງຈັນ, ວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ຈົ່ງມີສະຕິກຽມພ້ອມຮັບມືກັບສະພາບອາກາດຮ້າຍແຮງດັ່ງກ່າວ ທີ່ຈະກໍ່ໃຫ້ເກີດມີຕົ້ນໄມ້ ແລະ ປ້າຍໂຄສະນາຫັກລົ້ມ, ຫຼັງຄາເຮືອນເປ່ເພ ແລະ ຟ້າຜ່າ, ໝາກເຫັບຕົກ ເຊິ່ງຈະເປັນອັນຕະລາຍຕໍ່ຊີວິດ ແລະ ຊັບສິນອັນມີຄ່າຂອງປະຊາຊົນບັນດາເຜົ່າ,ພ້ອມນີ້ກໍ່ໃຫ້ຫຼີກເວັ້ນການຢູ່ກ້ອງຕົ້ນໄມ້ໃຫຍ່ ຫຼື ສິ່ງປຸກສ້າງທີ່ບໍ່ໄດ້ມາດຕະຖານ ແລະ ຫຼີກເວັ້ນການຢູ່ກາງເດີນກວ້າງ ເພາະຈະມີຄວາມສ່ຽງຕໍ່ການເກີດຟ້າຜ່າ. ຂໍໃຫ້ຕິດຕາມການລາຍງານສະພາບອາກາດ ແລະ ລະດັບນ້ຳ ຈາກກົມອຸຕຸນິຍົມ ແລະ ອຸທົກກະສາດຢ່າງເປັນປະຈຳ.
ສະແດງຄວາມຄິດເຫັນ