ປະຊາຊົນມຽນມາ ອົບພະຍົບໜີການສູ້ຮົບ ທີ່ທະວີຄວາມຮຸນແຮງຂຶ້ນອີກຄັ້ງໃນລັດກະສິນ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEjlGV4-G14qZGlipBjtJXQhAh2Noj1wmVQCIKRdP-6PBkiT9Cve1db-c_rassUpgwG5_LXs2u3WDKy6COl5Bv90wU1LE_ezvZAzjfdSNq4SNi-8zkaRqBFAMGIQR4ds7qcQftUbjDAK4fw/s1600/1099.jpg)
ສຳນັກຂ່າວຕ່າງປະເທດລາຍງານ 29 ເມສາ 2018 ວ່າ: ສຳນັກງານເພື່ອການປະສານງານດ້ານມະນຸດສະທຳແຫ່ງສະຫະປະຊາຊາດ (OCHA) ລາຍງານວ່າ ຕະຫຼອດໄລຍະ 3 ອາທິດທີ່ຜ່ານມາ ມີປະຊາຊົນຫຼາຍກວ່າ 4,000 ຄົນ ອົບພະຍົບອອກຈາກທີ່ຢູ່ອາໄສ ໃນລັດກະສິນ ທີ່ຢູ່ທາງພາກເໜືອສຸດຂອງມຽນມາ ແລະ ມີຊາຍແດນຕິດກັບຈີນ ເພື່ອຫຼົບໄພການສູ້ຮົບລະຫວ່າງກອງທັບມຽນມາ ກັບ ກອງທັບເອກະລາດກະສິນ (KAI) ທີ່ທະວີຄວາມຮຸນແຮງຂຶ້ນຢ່າງຕໍ່ເນື່ອງ ໂດຍສະຖິຕິຜູ້ອົບພະຍົບດັ່ງກ່າວເປັນຄົນລະສ່ວນກັບປະຊາຊົນຫຼາຍກວ່າ 15,000 ຄົນທີ່ອົບພະຍົບອອກຈາກພື້ນທີ່ແລ້ວກ່ອນໜ້ານັ້ນ.
![](https://blogger.googleusercontent.com/img/b/R29vZ2xl/AVvXsEjJNvk9P1CfuG7Lc26zUS0brS5vxa-aIsKiAUhyphenhyphenbAFQpuSy0WooCcTGVpA-lrkY8ODJjx_z5iHAvhhgGrqE_bHVQ9IH-CVMnTrdpYcHrb8b_Y0Ei91C-XV0EfMcUe97OSlnRYtHtlzwNCs/s1600/1101.jpg)
![](https://blogger.googleusercontent.com/img/b/R29vZ2xl/AVvXsEgaqYqDjx5UydbmZ4zMiFFJv_xkQ-6-wkJfNqC5gTU_VcxIgwxLEOWyagvQB602pyBV6irnSfxSO-PF6TO-voGmzpv1ahKLTF6TRvri827ZV195gB8e0a0Og6VZE1pu9zS7ZdZHUaZnV9A/s1600/1100.jpg)
ເຊິ່ງກອງທັບມຽນມາ ກັບ ກອງທັບເອກະລາດກະສິນ ໄດ້ກັບມາສູ້ຮົບກັນຢ່າງດຸເດືອດຕັ້ງແຕ່ປີ 2011 ພາຍຫຼັງສະຫງົບເສິກກັນໄດ້ດົນ 17 ປີ ໂດຍກອງທັບມຽນມາ ແລະ ກອງທັບເອກະລາດກະສິນເຄີຍລົງນາມໃນຂໍ້ຕົກລົງຢຸດຍິງຮ່ວມກັນພຽງສະບັບດຽວ ເມື່ອປີ 1974, ເຖິງຢ່າງໃດກໍ່ຕາມ ລັດຖະບານມຽນມາບໍ່ເຄີຍເປີດເຜີຍຕົວເລກຂອງການສູນເສຍຢ່າງເປັນທາງການ ໃນຂະນະທີ່ອົງກອນດ້ານສິດທິມະນຸດຫຼາຍແຫ່ງປະເມີນໄປໃນທິດທາງດຽວກັນວ່າ ຄວາມຮຸນແຮງທີ່ເກີດຂຶ້ນເປັນເຫດໃຫ້ມີຜູ້ເສຍຊີວິດຫຼາຍພັນຄົນ ແລະ ປະຊາຊົນຫຼາຍກວ່າ 100,000 ຄົນຕ້ອງກາຍເປັນຜູ້ບໍ່ມີທີ່ຢູ່ອາໄສ.
ເຖິງແມ່ນວ່າສອງຝ່າຍຈະພະຍາຍາມເຈລະຈາກັນເອງຫຼາຍຄັ້ງ ທັງຢ່າງເປັນທາງການ ແລະ ບໍ່ເປັນທາງການ ເພື່ອຫາແນວທາງໃນການຢຸດຍິງຮ່ວມກັນຄັ້ງໃໝ່ ແຕ່ຄວາມພະຍາຍາມເຫຼົ່ານັ້ນບໍ່ເຄີຍປະສົບຄວາມສຳເລັດ ເນື່ອງຈາກຕ່າງຝ່າຍຕ່າງກ່າວຫາເຊິ່ງກັນ ແລະ ກັນວ່າລະເມີດເງື່ອນໄຂ, ໂດຍເມື່ອຫວນຄືນກັບໄປເມື່ອເດືອນມັງກອນ 2013 ລັດຖະບານມຽນມາທີ່ນຳໂດຍ ທ່ານ ເຕັງ ເສັງ ເຄີຍປະກາດຢຸດຍິງຝ່າຍດຽວກັບກອງທັບເອກະລາດກະສິນ ແຕ່ມີຜົນໄດ້ພຽງ 48 ຊົ່ວໂມງເທົ່ານັ້ນ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ