ຜູ້ນຳສອງເກົາຫຼີພົບປະຫາລືກັນອີກຄັ້ງ, ຂະນະທີ່ ສ.ອາເມຣິກາ ກ່າວການເຈລະຈາກັບເກົາຫຼີເໜືອອາດເກີດຂຶ້ນຕາມກຳນົດການເດີມ

ສຳນັກຂ່າວຕ່າງປະເທດລາຍງານ 26 ພຶດສະພາ 2018 ວ່າ: ທຳນຽບປະທານປະເທດເກົາຫຼີໃຕ້ອອກຖະແຫຼງການວ່າ: ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ໄດ້ພົບປະຫາລືກັບທ່ານ ຄິມ ຈອງ-ອຶນ ຜູ້ນຳເກົາຫຼີເໜືອທີ່ບ້ານປັນມຸນຈອມ ເຂດປອດທະຫານທີ່ເປັນຊາຍແດນລະຫວ່າງສອງປະເທດ ເມື່ອວັນເສົາ ທີ 26 ພຶດສະພານີ້ ຫຼື ພາຍຫຼັງທີ່ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ປະກາດວ່າ ການປະຊຸມສຸດຍອດກັບຜູ້ນຳເກົາຫຼີເໜືອຈະຍັງຄົງເດີນໜ້າຕໍ່ໄປໄດ້ຕາມແຜນການທີ່ກຳນົດເດີມຄື ວັນທີ 12 ມິຖຸນາ 2018 ນີ້ ທີ່ປະເທດສິງກະໂປ.

We are having very productive talks with North Korea about reinstating the Summit which, if it does happen, will likely remain in Singapore on the same date, June 12th., and, if necessary, will be extended beyond that date.

— Donald J. Trump (@realDonaldTrump) May 26, 2018

ທຳນຽບປະທານປະເທດເກົາຫຼີໃຕ້ຖະແຫຼງຕໍ່ວ່າ ຜູ້ນຳເກົາຫຼີເໜືອ ແລະ ເກົາຫຼີໃຕ້ຮ່ວມປຶກສາຫາລືກັນເປັນເວລາກວ່າ 2 ຊົ່ວໂມງ ເຊິ່ງທັງສອງຝ່າຍເຄີຍພົບປະຫາລືກັນມາແລ້ວເມື່ອເດືອນເມສາ ທີ່ຜ່ານມາ, ພ້ອມປະກາດວ່າຈະຫາທາງປັບປຸງສາຍພົວພັນລະຫວ່າງສອງເກົາຫຼີໃຫ້ດີຂຶ້ນ.

ຖະແຫຼງການລະບຸອີກວ່າ ຜູ້ນຳເກົາຫຼີໃຕ້ ແລະ ເກົາຫຼີເໜືອໄດ້ແລກປ່ຽນຄວາມຄິດເຫັນ ແລະ ຫາແນວທາງທີ່ຈະສົ່ງເສີມໃຫ້ມີຄຳປະກາດປັນມຸນຈອມ ແລະ ຮັບປະກັນຄວາມສຳເລັດຂອງການປະຊຸມສຸດຍອດລະຫວ່າງສະຫະລັດ ອາເມຣິກາ ແລະ ເກົາຫຼີເໜືອ ສ່ວນລາຍລະອຽດການປຶກສາຫາລືນັ້ນ ຈະຖະແຫຼງໃຫ້ຊາບອີກຄັ້ງໃນຕອນເຊົ້າຂອງວັນທີ 27 ພຶດສະພາ 2018 ນີ້.