ໄຕ້ຫວັນກຽມຮັບມືກັບພາຍຸໄຕ້ຝຸ່ນມາເຣຍ, ຂະນະທີ່ນ້ຳຖ້ວມຍີ່ປຸ່ນຍອດຜູ້ເສຍຊີວິດສູງເຖິງ 156 ຄົນແລ້ວ ຍັງສູນຫາຍຈຳນວນຫຼາຍ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgPG8PUFyMTCqWTyTHS7uLwvahDAPhsB61swUcpisSbQI9qafyPaiXY8a10Kl9HUYhfF0TVEsckAFUbxx_QkT7DqUyOIDFyO2E9JA8T6HlC2uhu1qXYU6tt1YloccuDO9wxikxWdWZm5sU/s1600/1584.jpg)
ສຳນັກຂ່າວຕ່າງປະເທດລາຍງານ 10 ກໍລະກົດ 2018 ວ່າ: ເຈົ້າໜ້າທີ່ໄຕ້ຫວັນ ໄດ້ອົບພະຍົບປະຊາຊົນ ທີ່ອາໄສຢູ່ຕາມເຂດພື້ນທີ່ສ່ຽງໃກ້ກັບພູ, ໄດ້ສັ່ງປິດໂຮງຮຽນ ແລະ ສຳນັກງານ, ສ່ວນສາຍການບິນຕ່າງໆ ໄດ້ປະກາດຍົກເລີກຖ້ຽວບິນໃນວັນອັງຄານນີ້, ຂະນະທີ່ພາຍຸໄຕ້ຝຸ່ນ “ມາເຣຍ” ທີ່ມີທິດທາງເຂົ້າຫາເກາະໄຕ້ຫວັນ ໄດ້ເຮັດໃຫ້ເກີດຝົນຕົກໜັກ ແລະ ກະແສລົມພັດແຮງ.
![](https://blogger.googleusercontent.com/img/b/R29vZ2xl/AVvXsEifvgRenRkdTD2QQRcvAupuUh7MaicDJZuPDogbkqWkmdn0XVz7MpPb_9VSRiLePT17GAqxPeuxehYf1_qUctIDxhSF3athzwzPDXtOiMO6_m9WO7QOjxFw50uG6qaklW0WyOkHSzsc-EQ/s1600/1585.jpg)
ສຳນັກງານອຸຕຸນິຍົມວິທະຍາໄຕ້ຫວັນລາຍງານວ່າ: ເມື່ອເວລາ 17:00 ໂມງ ຂອງວັນອັງຄານນີ້ ຕາມເວລາທ້ອງຖິ່ນ ພາຍຸໄຕ້ຝຸ່ນມາເຣຍໄດ້ເຄື່ອນຕົວຢູ່ໃນມະຫາສະໝຸດປາຊີຟິກ ປະມານ 310 ກິໂລແມັດນອກຝັ່ງເບື້ອງທິດຕາເວັນອອກຂອງເມືອງອີ້ຫຼານ ດ້ວຍຄວາມໄວລົມເຖິງ 173 ກິໂລແມັດຕໍ່ຊົ່ວໂມງ ຄາດວ່າຜົນກະທົບຈະຮຸນແຮງສຸດໃນຕອນກາງເດິກຂອງຄືນວັນອັງຄານນີ້ ບາງພື້ນທີ່ອາດມີປະຕິມານນ້ຳຝົນເຖິງ 500 ມິລິແມັດ.
![](https://blogger.googleusercontent.com/img/b/R29vZ2xl/AVvXsEiwCAmZIylFb_NtgS05UBqxWXYuyu1r9WYozyk_D9Sok6o26xtRG-xWueRgPuokaYpfqb55zYLKaGRXJ8_O7vv0jXStvM5gBM6a2Nlb2Eg93Q47yiDQDSjkaCpB3WAx5PvvV50i5fDSebE/s1600/1582.jpg)
ທາງການໄຕ້ຫວັນໄດ້ສົ່ງທະຫານກະຈາຍກຳລັງອອກໄປເສີມກັບເຈົ້າໜ້າທີ່ທ້ອງຖິ່ນ ເພື່ອໃຫ້ການຊ່ວຍເຫຼືອປະຊາຊົນໃນຫຼາຍພື້ນທີ່ສ່ຽງ ແລະ ປະຊາຊົນເກືອບ 700 ຄົນ ຖືກອົບພະຍົບອອກຈາກບ້ານເຮືອນ ທີ່ຢູ່ຕີນພູໃນເມືອງອີ້ຫຼານ ເມື່ອຫົວຄ່ຳຂອງວັນອັງຄານນີ້ ເນື່ອງຈາກເປັນຫ່ວງວ່າຈະເກີດດິນເຈື່ອນ.
ທາງດ້ານຂອງຍີ່ປຸ່ນ, ສຳນັກຂ່າວຕ່າງປະເທດລາຍງານວ່າ: ຄວາມຄືບໜ້າຂອງສະຖານະການນ້ຳຖ້ວມ ຈາກຝົນຕົກໜັກທີ່ສຸດໃນຮອບ 36 ປີ ທາງພາກຕາເວັນຕົກ ແລະ ພາກກາງຂອງຍີ່ປຸ່ນ ເມື່ອວັນອັງຄານໜ່ວຍກູ້ໄພຍັງຄົງຄົ້ນຫາຜູ້ສູນຫາຍ ໃນພື້ນທີ່ປະສົບໄພ, ຂະນະທີ່ປະຊາຊົນຈຳນວນຫຼາຍທີ່ອົບພະຍົບອອກຈາກບ້ານເຮືອນໄດ້ພັກເຊົາຢູ່ສູນພັກເຊົາຊົ່ວຄາວ ທີ່ທາງການຈັດໃຫ້ໃນຫຼາຍເມືອງ ໂດຍລັດຖະບານຍີ່ປຸ່ນໄດ້ຕັ້ງໜ່ວຍງານສະເພາະກິດ ເພື່ອໃຫ້ການຊ່ວຍເຫຼືອປະຊາຊົນເປັນການດ່ວນທີ່ສຸດ.
![](https://blogger.googleusercontent.com/img/b/R29vZ2xl/AVvXsEhRILSlriNSkzk27XBmRmTez0vO7i9Ryvkbsgdh7LZoByBO5-wMXFMPde_YDcqjl7Hi0UD3jFFztdR3NgQ_QugVs6J07V-nrDvabNgJcMOE5UVWwHrneNZ6iiU4qtiSO9x-oyRayd10NlU/s1600/1583.jpg)
ເຊິ່ງໂຄສົກສຳນັງານບໍລິຫານໄພພິບັດ ແລະ ດັບເພີງຍີ່ປຸ່ນກ່າວວ່າ ສະຖານະການຫຼ້າສຸດເລີ່ມຜ່ອນຄາຍລົງແລ້ວ ປະຊາຊົນບາງສ່ວນເລີ່ມກັບບ້ານເຮືອນ, ພື້ນທີ່ໆໄດ້ຮັບຜົນກະທົບຫຼາຍທີ່ສຸດແມ່ນຢູ່ທາງພາກຕາເວັນອອກ ລວມເຖິງແຂວງຮິໂຣຊິມະ, ໂອກາຢາມະ, ກຽວໂຕ ແລະ ເອຮິເມະ ສ່ວນຈຳນວຜູ້ເສຍຊີວິດ ເຖິງເວລາ 19:00 ຂອງວັນອັງຄານ ທີ່ໄດ້ຮັບການຢືນຢັນ ເພີ່ມຂຶ້ນເປັນຢ່າງໜ້ອຍ 156 ຄົນແລ້ວ ແລະ ຍັງສູນຫາຍອີກວ່າ 50 ຄົນ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ