ທ່ານປູຕິນກ່າວ: ລັດເຊຍຈຳເປັນຕ້ອງສ້າງຄວາມເຂັ້ມແຂງໃຫ້ກອງທັບ ເພາະແຮງຊຸກດັນຈາກ NATO
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgV22Fk93FTyiPZvkXKWHapCthd_z7TYdXn9dIol4P-UcWAU9708xt98MlKvy6wL0THrcUrMBpDIjJ9f4QxjEvGJ4tw3MOMtLskrwuP4_3phNQ3OJCX27egZs71hAEx2zjDzNx-sAJEF_g/s1600/000_18J1R4.jpg)
ສຳນັກຂ່າວຕ່າງປະເທດລາຍງານ 23 ສິງຫາ 2018 ວ່າ: ທ່ານວະລາດິເມຍ ປູຕິນ ປະທານປະເທດລັດເຊຍກ່າວໃນຕອນໜຶ່ງລະຫວ່າງການຖະແຫຼງຮ່ວມກັບທ່ານ ເຊົາລີ ນີນິສໂຕ ປະທານປະເທດແຟງລັງ ທີ່ເມືອງໂຊຊີ ເມື່ອວັນພຸດທີ່ຜ່ານມາວ່າ ລັດເຊຍຈຳເປັນຕ້ອງຍົກລະດັບຄວາມສາມາດຂອງກອງທັບໃຫ້ຫຼາຍ ແລະ ດີຍິ່ງໆຂຶ້ນກວ່ານີ້ ເພື່ອຕອບສະໜອງກັບນະໂຍບາຍຂອງອົງການສົນທິສັນຍາອາກລັງຕິກເໜືອ (NATO) ເຊິ່ງເຄື່ອນໄຫວເຂົ້າໃກ້ຊາຍແດນຂອງປະເທດຫຼາຍຂຶ້ນເລື້ອຍໆ, ທ່ານ ປູຕິນ ກ່າວອີກວ່າ NATO ຍັງຄົງຢືນຢັນປະຕິເສດທີ່ຈະປຶກສາຫາລືກັບລັດເຊຍ ເພື່ອສ້າງຄວາມເຂົ້າໃຈຮ່ວມກັນ ເລື່ອງລະບຽບປະຕິບັດດ້ານການບິນທາງການທະຫານ.
![](https://blogger.googleusercontent.com/img/b/R29vZ2xl/AVvXsEhyFQ-DWEW8e6jxwK0zPJzJgAejcIRaBxDayGf3eKYWmRH4oF5pbziQJgm4F5kK6BQec9RhC_U7a268vhf6CJna8mkR8m_ciGQRaoGBEU4VPV34Yphuwn_-d7-IfTWxGtsFpMZfTeVBLSM/s1600/000_18J1M0.jpg)
ຕໍ່ມາ NATO ຖະແຫຼງວ່າ ປະຕິບັດການທາງທະຫານໃນພູມມິພາກທາງຕາເວັນອອກຂອງເອີຣົບ ເປັນໄປເພື່ອການປ້ອງກັນຕົນເອງ ແລະ ຢູ່ໃນກອບຂອງກົດໝາຍລະຫວ່າງປະເທດທຸກປະການ ພ້ອມທັງວິຈານວ່າລັດເຊຍຍັງຄົງປະຈຳການທະຫານ ແລະ ອາວຸດຍຸດໂທປະກອນຈຳນວນຫຼາຍໃນໂມນດາວີ, ຊອກຊີ ແລະ ອູແກຣນ ໂດຍບໍ່ສົນໃຈຕໍ່ທ່າທີຂອງລັດຖະບານ ແລະ ປະຊາຊົນໃນປະເທດນັ້ນໆ ພ້ອມທັງລະບຸວ່າ ບັນຫາຄວາມປອດໄພຂອງການບິນທາງທະຫານ ໃນເຂດນ່ານຟ້າສາກົນເໜືອທະເລບໍຕິກ ເປັນໜຶ່ງໃນຫົວຂໍ້ທີ່ NATO ແລະ ລັດເຊຍ ໄດ້ປຶກສາຫາລືກັນມາໂດຍຕະຫຼອດແລ້ວ.
![](https://blogger.googleusercontent.com/img/b/R29vZ2xl/AVvXsEhferrRv-H_zkF_ZB6GZTCzF3DMvhNq2LlbjrXHTfvHWpfg8A0zi9mJ2OqVqDKodm8tTc-jFaB6LYWBs-si6GNh5lImHvuQ2BlPSNeFSwnUM0bue4e-VX5p_6OoCMgtLUr68DnQ9zLwCB0/s1600/000_18G5YW.jpg)
ນອກເໜືອຈາກບັນຫາເລື່ອງ NATO ທ່ານ ປູຕິນ ຍັງກ່າວເຖິງສຽງວິຈານທີ່ທ່ານໄດ້ຮັບເຊີນເຂົ້າຮ່ວມພິທີແຕ່ງງານຂອງທ່ານ ນາງ ຄາຣິນ ຄະໄນ ລັດຖະມົນຕີກະຊວງການຕ່າງປະເທດໂອຕຣິດ ເມື່ອທ້າຍອາທິດທີ່ຜ່ານມາວ່າ ເປັນເລື່ອງສ່ວນຕົວ ແລະ ຊົມເຊີຍທີ່ລັດຖະບານໂອຕຣິດສາມາດສະແດງບົດບາດຢ່າງສ້າງສັນ ໃນການຮັກສາສົມດຸນສາຍພົວພັນລະຫວ່າງໂອຕຣິດ ກັບ ລັດເຊຍ ແລະ ສະຫະລັດເອີຣົບ ເຊິ່ງຄຳກ່າວຂອງທ່ານ ປູຕິນ ເກີດຂຶ້ນຢ່າງພໍດິບພໍດີກັບທ່ານ ເຊບາສຕຽນ ຄົວ ນາຍົກລັດຖະມົນຕີໂອຕຣິດກ່າວທີ່ນະຄອນຫຼວງວຽນນາວ່າ ການທີ່ຜູ້ນຳລັດເຊຍໄດ້ຮັບເຊີນເຂົ້າຮ່ວມງານແຕ່ງງານຂອງທ່ານ ນາງ ຄາຣິນ ຄະໄນ ເປັນຄົນລະເລື່ອງກັບການບໍລິການຈັດການດ້ານນະໂຍບາຍຂອງສະຫະພາບເອີຣົບ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ