ເຫດແຜ່ນດິນໄຫວທີ່ອິນໂດເນເຊຍ ເຮັດໃຫ້ປະຊາຊົນກວ່າ 1 ແສນຄົນບໍ່ມີທີ່ພັກອາໄສ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEht_BA8JJk4zoa_SYKT7mdY3FEqLbzLwgIAE9088edlXyVXmGwcOYuBPVDCBJvbCd69iWNzF9qHndg0wHZRrKAL7mo7-Vw7Q861l6bUm6DFbsi64bLFej1Yt5w7WDBCs3_c9csoBLAmPGI/s1600/000_1866TL.jpg)
ສຳນັກຂ່າວຕ່າງປະເທດລາຍງານ 8 ສິງຫາ 2018 ວ່າ: ທ່ານ ໝູຮຳໝັດ ໄຊນູນ ມັດດີ ເຈົ້າແຂວງນູຊາເຕິງກາຣາ ທີ່ມີເຂດການປົກຄອງກວມເອົາເກາະລອມບອກ ເຊິ່ງເປັນພື້ນທີ່ແຜ່ນດິນໄຫວ 6.9 ຣິກເຕີ ເມື່ອວັນອາທິດ ທີ 5 ສິງຫາ 2018 ທີ່ຜ່ານມາ ກ່າວວ່າ: ລັດຖະບານທ້ອງຖິ່ນມີຊັບພະຍາກອນຢ່າງຈຳກັດ ຜູ້ປະສົບໄພຍັງຕ້ອງການຄວາມຊ່ວຍເຫຼືອໃນທຸກດ້ານທີ່ຈຳເປັນ ບໍ່ວ່າຈະເປັນເຄື່ອງອຸປະໂພກ-ບໍລິໂພກຂັ້ນພື້ນຖານ ລວມໄປເຖິງການຊ່ວຍເຫຼືອດ້ານການແພດ ເນື່ອງຈາກໂຮງໝໍປະຈຳເມືອງ ແລະ ສຸກສາລາຂະໜາດນ້ອຍຫຼາຍແຫ່ງໄດ້ຮັບຄວາມເສຍຫາຍຈາກແຜ່ນດິນໄຫວຄັ້ງນີ້.
![](https://blogger.googleusercontent.com/img/b/R29vZ2xl/AVvXsEj049G_nS75xDqGzsDNG9ZmmwChl7dZwSqgSmmVeqUTyXpyvZOn_J_BsM6v6wW3wircwzimlIDcDxK1cLqs-ZU1ymOPfXXtZGDjy7N92-RvzQUNfwbtskqPXyCj87lezfYa0YMQyDdw0io/s1600/000_1858F4.jpg)
ຂະນະທີ່ອົງການກາແດງອິນໂດເນເຊຍ ເຊິ່ງເປັນໜຶ່ງໃນໜ່ວຍງານທີ່ລົງພື້ນທີ່ປະສົບໄພພິບັດເປີດເຜີຍວ່າ ບ້ານເຮືອນປະຊາຊົນໃນເຂດລອມບອກເໜືອໄດ້ພັງເສຍຫາຍທັງໝົດ ເຊັ່ນດຽວກັບລະບົບພື້ນຖານໂຄງລ່າງຫຼາຍແຫ່ງ ທີ່ເສຍຫາຍຈົນເຖິງຂັ້ນຖືກຕັດຂາດໃນບາງຊ່ວງທາງ ໂດຍສະເພາະແມ່ນຂົວຫຼາຍແຫ່ງໄດ້ຮັບຄວາມເສຍຫາຍ. ນອກຈາກນີ້ ພື້ນທີ່ກະສິກຳຍັງໄດ້ຮັບຄວາມເສຍຫາຍເປັນວົງກວ້າງ ແຕ່ຊາວກະສິກອນສ່ວນໃຫຍ່ສະໝັກໃຈອາໄສຢູ່ໃນພື້ນທີ່ຕໍ່ໄປ ເພາະເປັນຫ່ວງສັດລ້ຽງ ແລະ ພື້ນພັນຂອງຕົນເອງ.
![](https://blogger.googleusercontent.com/img/b/R29vZ2xl/AVvXsEiCCGR3EtkcJ8St2pVQ0jvnfJTJBPDjX3oipPqkPTdFVpPGRzDkyeum_ryuWmWdhN79Z-PHbYeN8O702OOI8kL8-DrZ0XwIKpqpw2bOVApEkgtLK6cATBA5wfjhv0DB8AQHSOc8XWJFdjo/s1600/000_1878BP.jpg)
![](https://blogger.googleusercontent.com/img/b/R29vZ2xl/AVvXsEh_0pO7wuzE7r0rcHL210c1tSLI7GyrQEohv0O7UVdk4DghDlI3tKRX-PFx7yIc6dEtrWE3ckENlrpzJPHHQ2SymatNVlKnZm8ceepVgRj5dv75F2EANFJLcaDUQ1raI92OQyXuqr9TRZA/s1600/000_1868DI.jpg)
ໃນດ້ານສຳນັກງານບໍລິຫານຈັດການໄພພິບັດແຫ່ງຊາດຂອງອິນໂດເນເຊຍ ລາຍງານຈຳນວນຜູ້ເສຍຊີວິດຈາກແຜ່ນດິນໄຫວຄັ້ງນີ້ ມີຢ່າງໜ້ອຍ 130 ຄົນ ແລະ ໄດ້ຮັບບາດເຈັບອີກຫຼາຍກວ່າ 230 ຄົນ, ຂະນະທີ່ປະຊາຊົນຫຼາຍກວ່າ 156,000 ຄົນຕ້ອງອົບພະຍົບອອກຈາກບ້ານເຮືອນ ແລະ ກາຍເປັນຜູ້ບໍມີທີ່ພັກອາໄສ, ໃນຂະນະດຽວກັນ ເຈົ້າໜ້າທີ່ກູ້ໄພ ໄດ້ອົບພະຍົບນັກທ່ອງທ່ຽວຫຼາຍກວ່າ 4,600 ຄົນ ອອກຈາກເກາະກີລີ ເຊິ່ງຕັ້ງຢູ່ບໍ່ໄກຈາກເກາະລອມບອກ ແລະ ເປັນໜຶ່ງໃນສະຖານທີ່ທ່ອງທ່ຽວທີ່ມີຊື່ສຽງຂອງອິນໂດເນເຊຍ. ສ່ວນສະໜາມບິນສາກົນລອມບອກໃຫ້ບໍລິການໄດ້ຕາມປົກກະຕິ ແລະ ສາຍການບິນທຸກແຫ່ງພະຍາຍາມເພີ່ມຈຳນວນຖ້ຽວບິນ ເພື່ອລຳລຽງນັກທ່ອງທ່ຽວອອກຈາກພື້ນທີ່ໃຫ້ໄວທີ່ສຸດ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ